జగన్‌పై దాడి కేసు: శ్రీనివాసరావును కస్టడీలోకి తీసుకోనున్న ఎన్ఐఏ

ఆంధ్రప్రదేశ్ ప్రతిపక్షనేత, వైసీపీ అధినేత వైఎస్ జగన్మోహన్ రెడ్డిపై విశాఖ విమానాశ్రయంలో జరిగిన దాడి కేసులో భాగంగా నిందితుడు శ్రీనివాసరావును ఎన్ఐఏ తమ కస్టడీలోకి తీసుకోనుంది. ఇప్పటికే విజయవాడ చేరుకున్న ఎన్ఐఏ అధికారులకు ఏపీ పోలీసులు శ్రీనివాస్‌ను అప్పగించనున్నారు.

అనంతరం బెజవాడ ప్రభుత్వాసుపత్రిలో అతనికి వైద్య పరీక్షలు చేయించనున్నారు. పరీక్షల తర్వాత శ్రీనివాస్‌ను హైదరాబాద్‌లోని ఎన్ఐఏ కార్యాలయానికి తరలించనున్నారు. అతనిని వారంపాటు తమ కస్టడీలో ఉంచుకుని అధికారులు పలు విచారణలు జరుపుతారు. శ్రీనివాస్‌ను ఎన్‌ఐఏ కస్టడీకి అప్పగిస్తూ నిన్న న్యాయస్థానం ఆదేశాలు జారీ చేసిన సంగతి తెలిసిందే.