దాడి జరిగిన తర్వాత జగన్ విశాఖలో ఎందుకు ఆగలేదంటే......

: విశాఖ ఎయిర్‌పోర్ట్‌లో వైసీపీ చీఫ్ వైఎస్ జగన్‌పై దాడి జరిగిన తర్వాత వెంటనే హైద్రాబాద్‌కు  విమానంలో రావడం వెనుక పలు కారణాలున్నాయని  ఆ పార్టీ నేతలు చెబుతున్నారు

నెల్లూరు: విశాఖ ఎయిర్‌పోర్ట్‌లో వైసీపీ చీఫ్ వైఎస్ జగన్‌పై దాడి జరిగిన తర్వాత వెంటనే హైద్రాబాద్‌కు  విమానంలో రావడం వెనుక పలు కారణాలున్నాయని  ఆ పార్టీ నేతలు చెబుతున్నారు. ఈ ఘటన‌ జరిగిన సమయంలో  జగన్‌తో పాటు ఉన్న ఆ పార్టీ ఎమ్మెల్యే మేకపాటి గౌతం రెడ్డి పలు కారణాలను  మీడియాకు వివరించారు.

మంగళవారం నాడు ఆయన నెల్లూరులో  మీడియాతో మాట్లాడారు. విశాఖ ఎయిర్‌పోర్ట్‌లో జగన్‌పై దాడి  జరిగిన వెంటనే  హైద్రాబాద్‌ బయలుదేరి రావడానికి గల కారణాలను  వైసీపీ ఎమ్మెల్యే మేకపాటి గౌతం రెడ్డి వివరించారు.

విశాఖ విమానాశ్రయంలో దాడి జరిగిన వెంటనే హైద్రాబాద్‌కు రావడాన్ని టీడీపీ నేతలు  తీవ్రంగా తప్పుబట్టారు.ప్రభుత్వాసుపత్రిలో ఎందుకు చికిత్స చేయించుకోలేదు.. హైద్రాబాద్‌ ప్రైవేట్ ఆసుపత్రిలో ఎందుకు చికిత్స చేయించుకొన్నారనే విషయమై  టీడీపీ నేతలు విమర్శలు గుప్పించిన విషయం తెలిసిందే.

ఈ తరుణంలో వైసీపీ ఎమ్మెల్యే ఈ విషయమై వివరణ ఇచ్చారు.  ఒకవేళ మొదటి సారి  దాడి విఫలమైతే రెండోసారి  జగన్‌పై ప్రత్యర్థులు దాడికి పాల్పడే అవకాశం ఉండొచ్చనే భయంతో  హైద్రాబాద్‌కు వెళ్లినట్టు ఆయన చెప్పారు.

విశాఖపట్టణంలో కంటే హైద్రాబాద్‌లో మెరుగైన చికిత్స తీసుకొనే అవకాశం ఉంటుందనే కారణంగానే హైద్రాబాద్‌కు వచ్చినట్టు ఆయన వివరించారు. విశాఖ ఎయిర్‌పోర్ట్‌లో  జగన్‌కు చేసిన ఫస్ట్‌ఎయిడ్ బాక్స్ కనీసం సరైన మందులు కూడ లేవని ఆయన గుర్తు చేశారు. 

జగన్‌పై దాడి జరిగిన వెంటనే నిందితుడు శ్రీనివాసరావు వైసీపీ కార్యకర్త అంటూ ఏపీ పోలీసులు చేసిన స్టేట్‌మెంట్  కూడ జగన్‌పై దాడి ఘటనను ప్రజల దృష్టి నుండి మరల్చేందుకే జరిగిందని  ఆయన అభిప్రాయపడ్డారు.

సంబంధిత వార్తలు