మిర్యాలగూడ అసెంబ్లీ సీటుకు ప్రణయ్ భార్య అమృత పోటీ

త్వరలో జరిగే అసెంబ్లీ ఎన్నికల్లో మిర్యాలగూడ అసెంబ్లీ స్థానం నుండి అమృతను బీఎల్ఎఫ్ నుండి తాము బరిలోకి దింపుతామని సీపీఎం రాష్ట్ర కార్యదర్శి తమ్మినేని వీరభ్రదం ప్రకటించారు. 

మిర్యాలగూడ: త్వరలో జరిగే అసెంబ్లీ ఎన్నికల్లో మిర్యాలగూడ అసెంబ్లీ స్థానం నుండి అమృతను బీఎల్ఎఫ్ నుండి తాము బరిలోకి దింపుతామని సీపీఎం రాష్ట్ర కార్యదర్శి తమ్మినేని వీరభ్రదం ప్రకటించారు. అమృతకు అన్ని పార్టీలు మద్దతివ్వాలని కోరారు.

మంగళవారం నాడు మిర్యాలగూడ మాజీ ఎమ్మెల్యే జూలకంటి రంగారెడ్డి, ప్రోఫెసర్ కంచ అయిలయ్యతో కలిసి తమ్మినేవి వీరభద్రం ప్రణయ్ కుటుంబసభ్యులను పరామర్శించారు. 

మిర్యాలగూడ అసెంబ్లీ సెగ్మెంట్ నుండి సీపీఎం అభ్యర్థులు పలుమార్లు విజయం సాధించారు.  అయితే మిర్యాలగూడలో ప్రణయ్ హత్య చోటు చేసుకొన్న నేపథ్యంలో  ఆ కుటుంబాన్ని పరామర్శించిన బీఎల్ఎఫ్  కన్వీనర్.. సీపీఎం రాష్ట్ర కార్యదర్శి తమ్మినేని వీరభద్రం సంచలన ప్రతిపాదన తీసుకొచ్చారు.

మిర్యాలగూడలో తమది బలమైన పార్టీ...  అయినా అమృతను బీఎల్ఎఫ్ తరపున అసెంబ్లీ బరిలోకి దింపుతామని తాము ప్రతిపాదిస్తున్నట్టు తమ్మినేని వీరభద్రం ప్రతిపాదించారు. అన్ని రాజకీయ పార్టీలు  అమృతకు మద్దతుగా నిలవాలని ఆయన కోరారు.

నాలుగు రోజుల క్రితం అమృత భర్త ప్రణయ్  జ్యోతి ఆసుపత్రి ఆవరణలో అత్యంత దారుణంగా హత్య చేశారు.  కులాంతర వివాహం చేసుకొన్నందుకు గాను అమృత తండ్రి మారుతీరావు ప్రణయ్ ను హత్య చేయించాడు.

ఎన్నికలు వస్తున్నందున  మిర్యాలగూడ నుండి అమృతను బరిలోకి దింపాలని ప్రతిపాదిస్తున్నట్టు తమ్మినేని చెప్పారు. ఈ విషయమై ఇతర రాజకీయ పార్టీలు ఏ రకంగా స్పందిస్తాయో చూడాలి.