మాతోనే అన్ని విషయాలు షేర్ చేసుకొనేవాడు: ప్రణయ్ స్నేహితులు

మాకు ఇబ్బంది కల్గకూడదనే ఉద్దేశ్యంతోనే  బెదిరింపు కాల్స్  వచ్చిన విషయం కూడ  తమకు చెప్పలేదని ప్రణయ్ స్నేహితులు గుర్తు చేసుకొన్నారు. 

pranay

మిర్యాలగూడ:మాకు ఇబ్బంది కల్గకూడదనే ఉద్దేశ్యంతోనే బెదిరింపు కాల్స్ వచ్చిన విషయం కూడ తమకు చెప్పలేదని ప్రణయ్ స్నేహితులు గుర్తు చేసుకొన్నారు. తల్లిదండ్రులు, తన భార్యతో కూడ షేర్ చేసుకోలేని విషయాలు తమతో షేర్ చేసుకొనేవాడని స్నేహితులు గుర్తు చేసుకొంటున్నారు. 

ప్రణయ్ చిన్ననాటి స్నేహితుడు విష్ణు కన్నీరుమున్నీరుగా విలపించాడు. ప్రణయ్ తో తనకు ఉన్న బంధాన్ని ఆయన గుర్తుచేసుకొన్నాడు. ప్రణయ్ అమృతతో కలిసి పారిపోయే సందర్భంలో కూడ తనకే ఈ విషయాన్ని ముందు చెప్పాడని విష్ణు గుర్తు చేసుకొన్నాడు. వారం రోజులక్రితమే తనతో మాట్లాడినట్టు చెప్పారు. అవే చివరి మాటలయ్యాయన్నారు.

విదేశాలకు వెళ్లేందుకు ప్లాన్ చేసుకొంటున్నట్టు వారం క్రితమే చెప్పాడన్నారు. ఎలాంటి ఇబ్బందులు లేవని తనకు చెప్పాడన్నారు. అయితే అప్పటికీ కూడ తనకు బెదిరింపు ఫోన్లు వస్తున్న విషయాన్ని ప్రణయ్ తమ వద్ద దాచిపెట్టాడన్నారు.

తన వల్ల మాకు ఇబ్బందులు ఎదురుకాకూడదనే ఉద్దేశ్యంతోనే బెదిరింపు ఫోన్లు వస్తున్న విషయాన్ని ప్రణయ్ చెప్పలేదని విష్ణు గుర్తు చేసుకొన్నాడు. అమృతకు ఏమైనా జరిగితే తాము ఊరుకోబోమని విష్ణు హెచ్చరించాడు. 

కులం పేరుతో ఇంతటి దారుణానికి పాల్పడడాన్ని విష్ణుతో పాటు అతని స్నేహితులు జీర్ణించుకోలేకపోతున్నారు. ప్రణయ్ కు గొడవలంటే ఇష్టం ఉండేవి కావని ఆయన మరో స్నేహితుడు గుర్తు చేసుకొన్నాడు. గొడవలు జరుగుతున్నా వాటికి దూరంగా ఉండేవాడన్నారు.

తన అమృత కోసం చచ్చిపోతానని కూడ తనతో చెప్పేవాడని విష్ణు కన్నీళ్లు పెట్టుకొన్నాడు. తన పెళ్లి సమయంలో కూడ తాము అండగా నిలిచిన ఉన్న విషయాన్ని గుర్తు చేసుకొన్నారు.

ఈ వార్తలు చదవండి