ప్రణయ్ హత్య: పోలీసుల అదుపులో కాంగ్రెసు నేత

మారుతీరావు తన అల్లుడిని హత్య చేసేందుకు సుపారీ గ్యాంగ్‌ను మాట్లాడుకున్నాడని, ఆ గ్యాంగ్‌ హత్యకు మూడు రోజుల ముందే పట్టణానికి చేరుకుందని, వారికి మారుతీరావే షెల్టర్‌ కల్పించారని పోలీసులు గుర్తించినట్లు సమాచారం.

Pranay

నల్లగొండ: ప్రణయ్ హత్య కేసులో పోలీసులు కాంగ్రెసు నేత కరీంను అదుపులోకి తీసుకున్నట్లు వార్తలు వస్తున్నాయి. ప్రణయ్ హత్య చేయించడానికి కరీం అమృత వర్షిణికి సహకరించినట్లు ఆరోపణలు వచ్చాయి. దీంతో కరీంను పోలీసులు అదుపులోకి తీసుకున్నట్లు తెలుస్తోంది.

డీల్‌ కుదిర్చిన మధ్యవర్తులను, వాహనాల డ్రైవర్లను శనివారం సాయంత్రానికి పోలీసులు అదుపులోకి తీసుకున్నారు. మారుతీరావు, శ్రవణ్‌కుమార్‌లపై ఐపీసీ 302, 120 (బీ), 109, ఎస్సీ, ఎస్టీ అట్రాసిటీ సెక్షన్ల కింద కేసు నమోదు చేసినట్లు డీఎస్పీ పి.శ్రీనివాస్‌ తెలిపారు. హంతక ముఠాను గాలించేందుకు ఐదు ప్రత్యేక బృందాలను రంగంలోకి దింపామని, ఒకటి, రెండు రోజుల్లో అందరినీ అదుపులోకి తీసుకుంటామని చెప్పారు.

మారుతీరావు తన అల్లుడిని హత్య చేసేందుకు సుపారీ గ్యాంగ్‌ను మాట్లాడుకున్నాడని, ఆ గ్యాంగ్‌ హత్యకు మూడు రోజుల ముందే పట్టణానికి చేరుకుందని, వారికి మారుతీరావే షెల్టర్‌ కల్పించారని పోలీసులు గుర్తించినట్లు సమాచారం. తన కూతురు ఆస్పత్రికి వచ్చిన విషయాన్ని మారుతీరావు ఎప్పటికప్పుడు ఫోన్‌ద్వారా తెలుసుకుంటూనే ఉన్నాడని చెబుతున్నారు. 

మధ్యాహ్నం ప్రణయ్‌ హత్య జరిగే సమయానికి ప్రధాన నిందితుడు మారుతీరావు నల్లగొండ జిల్లా కేంద్రంలోని కలెక్టరేట్‌ వద్ద ఉన్నాడని, ఒక పనికోసం ఉన్నతాధికారులను కలిసేందుకు నల్లగొండకు వచ్చాడని సమాచారం. 

హత్య జరిగిన తర్వాత ఫోన్‌ రావడంతో ఆయన కలెక్టరేట్‌ నుంచి వెళ్లిపోయాడని, అయితే ఎటుపోవాలో పాలుపోక జాతీయ రహదారిపై చక్కర్లు కొట్టాడని, కేతేపల్లి, కట్టంగూరు తదితర ప్రాంతాల్లో తిరిగినట్లు తెలుస్తోంది. 

ఈ వార్తాకథనాలు చదవండి