జగన్‌పై దాడి: అందుకే శ్రీనివాస్‌ను కేజీహెచ్‌కు తెచ్చామని సీఐ

  శ్రీనివాసరావు  ఇవాళ ఉదయం, మధ్యాహ్నం భోజనం చేయలేదని విశాఖ ఎయిర్‌పోర్ట్ సీఐ మల్ల శేషు తెలిపారు.

విశాఖపట్టణం:  శ్రీనివాసరావు  ఇవాళ ఉదయం, మధ్యాహ్నం భోజనం చేయలేదని విశాఖ ఎయిర్‌పోర్ట్ సీఐ మల్ల శేషు తెలిపారు. సాధారణ వైద్య చికిత్సల్లో భాగంగానే  కేజీహెచ్‌కు శ్రీనివాసరావును  తీసుకొచ్చినట్టుగా ఆయన తెలిపారు.

ఓ తెలుగు న్యూస్ ఛానెల్‌కు ఇచ్చిన ఇంటర్వ్యూలో శ్రీనివాసరావు  ఆరోగ్య పరిస్థితి గురించి వివరించారు.  తమ కస్టడీలో శ్రీనివాసరావు మూడు రోజులుగా ఉన్నాడని ఆయన చెప్పారు. రెండు రోజులుగా సరిగా భోజనం చేయడం లేదన్నారు. టిపిన్, మధ్యాహ్న, రాత్రి భోజనం సక్రమంగానే అందిస్తున్నట్టు ఆయన తెలిపారు.

కానీ, భోజనం తినడానికి మాత్రం శ్రీనివాసరావు  అయిష్టంగా ఉన్నారని ఆయన చెప్పారు.  నాన్ వెజ్ పట్ల  ఇష్టంగా లేడన్నారు. లెటర్‌లో రాసినట్టుగానే తన అవయవాలు దానం చేయండని చెబుతున్నాడని మల్లశేషు చెప్పారు.

పోలీసు కస్టడీలో ఉన్నందుకు బెంగగా ఉన్న కారణంగా భోజనం సరిగా చేయడం లేదా... ఇతర కారణాలున్నాయా అనే విషయం అర్ధంకావడం లేదన్నారు.  పోలీసు కస్టడీలో ఉన్న నిందితుడికి రొటీన్ చెకప్ చేయిస్తామని... ఇందులో భాగంగానే  శ్రీనివాసరావును కేజీహెచ్‌కు తరలించినట్టు ఆయన చెప్పారు.

తొలుత డాక్టర్ దేముడు బాబుతో పరీక్షించిన సమయంలో కూడ బీపీ, పల్స్ నార్మల్‌గానే ఉన్నాయని  చెప్పాడని... కానీ, ఎందుకైనా మంచిదనే కేజీహెచ్ కు తరలించినట్టు శేషు చెప్పారు.  భోజనం సరిగా చేయని కారణంగా నీరసంగా ఉన్నాడని సీఐ అభిప్రాయపడ్డారు. 

సంబంధిత వార్తలు