మిత్రులకు ఇచ్చే సీట్ల సంఖ్య ఇదే: 10న కాంగ్రెస్ తొలి జాబితా

74 అభ్యర్థుల జాబితాను కాంగ్రెస్ పార్టీ సెంట్రల్ ఎన్నికల కమిటీ ఖరారు చేసిందని తెలంగాణ రాష్ట్ర కాంగ్రెస్ పార్టీ ఇంచార్జీ కుంతియా స్పష్టం చేశారు. మిత్రపక్షాలకు 25 స్థానాలను కేటాయించినట్టు చెప్పారు.

న్యూఢిల్లీ: 74 అభ్యర్థుల జాబితాను కాంగ్రెస్ పార్టీ సెంట్రల్ ఎన్నికల కమిటీ ఖరారు చేసిందని తెలంగాణ రాష్ట్ర కాంగ్రెస్ పార్టీ ఇంచార్జీ కుంతియా స్పష్టం చేశారు. మిత్రపక్షాలకు 25 స్థానాలను కేటాయించినట్టు చెప్పారు.

గురువారం నాడు  న్యూఢిల్లీలో  కాంగ్రెస్ పార్టీ  సెంట్రల్ ఎన్నికల సమావేశం ముగిసిన తర్వాత  కుంతియా మీడియాతో మాట్లాడారు. తొలి జాబితాను  నవంబర్ 10వ తేదీన విడుదల చేస్తామని ఆయన ప్రకటించారు.

టీడీపీకి 14, టీజేఎస్ కు 8, సీపీఐ 3 స్థానాలను కేటాయించినట్టు ఆయన స్పష్టం చేశారు. 

సీపీఐ మాత్రం కనీసం  నాలుగు సీట్లను కేటాయించాలని కోరుతోంది.  అయితే అనివార్య పరిస్థితులు ఉత్పన్నమైతే మరో స్థానాన్ని సీపీఐకు కేటాయించే అవకాశం ఉంది. ఈ పార్టీలతో పాటు  తెలంగాణ ఇంటి పార్టీకి కూడ మరో స్థానాన్ని కేటాయించే అవకాశం లేకపోలేదని కాంగ్రెస్  వర్గాల నుండి తెలుస్తోంది.

గతంలోనే  54 అసెంబ్లీ  స్థానాలకు అభ్యర్థులను ఫైనల్ చేసింది.  ఇవాళ మరో 20 మంది అభ్యర్థుల పేర్లను కాంగ్రెస్ పార్టీ అధిష్టానం ఖరారు చేసింది. దీంతో కాంగ్రెస్ పార్టీ 74 మంది అభ్యర్థుల జాబితాను ఫైనల్ చేసింది. ఈ నెల 11, 12 తేదీల్లో మరోసారి కాంగ్రెస్ పార్టీ స్క్రీనింగ్ కమిటీ  సమావేశం నిర్వహించనున్నట్టు కుంతియా తెలిపారు.ఈ సమావేశంలో మిగిలిన కాంగ్రెస్ అభ్యర్థుల జాబితాను ప్రకటించే అవకాశం ఉంది.

ఇదిలా ఉంటే  టీజేఎస్‌కు 11 స్థానాల జాబితా ఇచ్చి 8 స్థానాలతో సరిపెట్టారు. సీపీఐకు కేవలం మూడు స్థానాలు మాత్రమే కేటాయించనున్నారు. సీపీఐ రాష్ట్ర కార్యవర్గం నవంబర్ 9వ తేదీన అత్యవసరంగా సమావేశం కానుంది.   74 మంది అభ్యర్థుల జాబితాను  నవంబర్ 10వ తేదీన విడుదల చేయనున్నట్టు కుంతియా ప్రకటించారు.

సంబంధిత వార్తలు