అభిమానంతోనే పిల్లోడు దాడి, జగన్ కు లవ్ లెటర్ రాసిన నిందితుడు: సోమిరెడ్డి

ప్రతిపక్ష నాయకుడు వైసీపీ అధినేత వైఎస్ జగన్ పై చిన్నపిల్లోడు దాడి చేస్తే దాన్ని టీడీపీకి అంటగట్టడం ఏమాత్రం సరికాదని మంత్రి సోమిరెడ్డి చంద్రమోహన్ రెడ్డి అన్నారు. జగన్ పై దాడి కేవలం అభిమానంతోనే అభిమాని చేశాడని చెప్పుకొచ్చారు. కడప జిల్లాలో ధర్మపోరాట దీక్షలో పాల్గొన్న సోమిరెడ్డి హత్యారాజకీయాలు చెయ్యాల్సిన దౌర్భాగ్యం టీడీపీకి పట్టలేదన్నారు.   

కడప: ప్రతిపక్ష నాయకుడు వైసీపీ అధినేత వైఎస్ జగన్ పై చిన్నపిల్లోడు దాడి చేస్తే దాన్ని టీడీపీకి అంటగట్టడం ఏమాత్రం సరికాదని మంత్రి సోమిరెడ్డి చంద్రమోహన్ రెడ్డి అన్నారు. జగన్ పై దాడి కేవలం అభిమానంతోనే అభిమాని చేశాడని చెప్పుకొచ్చారు. కడప జిల్లాలో ధర్మపోరాట దీక్షలో పాల్గొన్న సోమిరెడ్డి హత్యారాజకీయాలు చెయ్యాల్సిన దౌర్భాగ్యం టీడీపీకి పట్టలేదన్నారు. 

నిందితుడు శ్రీనివాస్ ఎందుకు హత్య చేశాడో లేఖలో చెప్పాడు కదా అని ప్రశ్నించారు. జగన్ కు అభిమానంతో 10 పేజీల లవ్ లెటర్ రాసి దాడి చేశాడన్నారు. అయితే చంద్రబాబే కావాలని హత్య చేయించేందుకు కుట్రపన్నారంటూ వైసీపీ ఆరోపించడం ఎంత దిగజారుడుతనానికి నిదర్శనమని మండిపడ్డారు. 

గతంలో సెక్రటేరియట్ లో వైఎస్ పై ఓ వ్యక్తి కత్తితో దాడి దాడి చేసేందుకు ప్రయత్నిస్తే రాజశేఖర్ రెడ్డి తప్పించుకున్నారే తప్ప చంద్రబాబు కుట్ర అని ఆరోపించలేదన్నారు. అలాగే అలిపిరి ఘటనలో చంద్రబాబు నాయుడు గాయపడితే అది వైఎస్ కుట్ర అని అనలేదు అని గుర్తు చేశారు. 

శాంతయుత రాజకీయాలకు టీడీపీ పెట్టింది పేరు అని సోమిరెడ్డి అన్నారు. ఇకపోతే జగన్ పై దాడి జరిగిన వెంటనే ఢిల్లీలో బీజేపీ నేతలు ప్రెస్మీట్లు పెట్టి రాష్ట్రపతి పాలనకు డిమాండ్ చేస్తారా అని నిలదీశారు. ఇదంతా జగన్ బీజేపీల మధ్య లాలూచీ రాజకీయాలకు నిదర్శనమని సోమిరెడ్డి ధ్వజమెత్తారు. 

ఇకపోతే కడప జిల్లాకు సాగునీరందించిన మహానుభావుడు చంద్రబాబునాయుడు అని కొనియాడారు. పట్టిసీమ ప్రాజెక్టు ద్వారా గోదావరి జలాలను కృష్ణానదికి తెచ్చి రాయలసీమను సస్యశ్యామలం చేసిన ఘనత చంద్రబాబుదేనని చెప్పారు. 

ప్రత్యేక హోదా, విశాఖ రైల్వే జోన్, కడప ఉక్కు ఫ్యాక్టరీలపై కేంద్రంతో పోరాడుతున్నామని సోమిరెడ్డి తెలిపారు. నరేంద్రమోదీని ఢీ కొట్టే సత్తా ఒక్క చంద్రబాబు నాయుడుకు మాత్రమే ఉందని అవిశ్వాస తీర్మానం రోజునే తెలిసిందన్నారు. ఇక తాడో పేడో తేల్చుకునేందుకు రెడీ అవుతున్నట్లు తెలిపారు. 

ఈ వార్తలు కూడా చదవండి