జయరాం హత్య కేసు: ఆ ఐదుగురు పోలీసుల పాత్రపై విచారణ

పారిశ్రామిక వేత్త చిగురుపాటి జయరాం హత్య కేసులో బంజారాహిల్స్ పోలీసులు విచారణ వేగవంతం చేశారు. జయరాంను హత్య చేసిన ప్రధాన నిందితుడు రాకేశ్ రెడ్డికి సహకరించినట్లుగా ఆరోపణలు ఎదుర్కోంటున్న ఐదుగురు పోలీస్ అధికారులను బంజారాహిల్స్ పోలీస్ స్టేషన్‌లో విచారించనున్నారు.

రాకేశ్ రెడ్డి కాల్‌డేటాను విశ్లేషించగా.. వీరంతా అతనితో టచ్‌లో ఉన్నట్లు సమాచారం. వీరిలో ఓ పోలీస్ అధికారి...జయరాంను హత్య చేసి యాక్సిడెంట్‌గా చిత్రీకరించాలని రాకేశ్‌కు సలహా ఇచ్చారు. ఈ కేసులో మిగిలిన పోలీసుల పాత్రను తేల్చనున్నారు పోలీసులు.

ఇప్పటికే నందిగామలో క్రైమ్ సీన్ రీకనస్ట్రక్షన్ చేశారు. జూబ్లీహిల్స్‌లో జయరాంను హత్య చేసి నందిగామ వరకు కారులో తీసుకొచ్చిన రాకేశ్ రెడ్డి ఆ సమయంలో ఎవరెవరితో మాట్లాడాడు... ఎక్కడెక్కడ ఆగాడు వంటి విషయాలపై ఆరా తీయనున్నారు.

దర్యాప్తులో భాగంగా ఇప్పటి వరకు 50 మందిని పోలీసులు ప్రశ్నించారు. అలాగే అమ్మాయి ఉందంటూ జయరాంకు ఫోన్ చేసిన జూనియర్ ఆర్టిస్ట్ సూర్య పాత్రపైనా నేడు విచారణ జరపనున్నారు.