అమ్మాయి కోసం రాకేశ్ ఇంటికి జయరాం.. జూనియర్ ఆర్టిస్ట్ కీలకపాత్ర

పారిశ్రామిక వేత్త జయరాం హత్య కేసులో అనుహ్య మలుపు తిరిగింది. ఆయన హత్య కేసులో తెలుగు చిత్ర పరిశ్రమకు చెందిన జూనియర్ ఆర్టిస్ట్ సూర్య కీలకపాత్ర పోషించినట్లు పోలీసులు గుర్తించారు. గత నెల 29 సాయంత్రం జయరాంకు ఫోన్ చేసిన సూర్య.. మంచి అమ్మాయి ఉందని ఆయనతో చెప్పినట్లుగా సమాచారం.

దీంతో మరుసటి రోజు సూర్యకు జయరాం ఫోన్ చేశాడు. వెంటనే చిగురుపాటిని సరాసరి రాకేశ్ రెడ్డి ఇంటికి సూర్య తీసుకెళ్లాడు. జయరాంను రాకేశ్ రెడ్డి ఇంట్లో వదిలివేసిన తర్వాత రాకేశ్, సూర్య కలిసి భోజనం కూడా చేసినట్లు పోలీసుల దర్యాప్తులో తేలింది.

ఈ విషయాలన్నీ విచారణలో రాకేశ్ రెడ్డి చెప్పినట్లుగా తెలుస్తోంది. డబ్బుల విషయంలో జయరాం, రాకేశ్‌ల మధ్య గొడవ జరిగిందని.. రాకేశ్ కోపంతో జయరాం తలపై కొట్టడం వల్లే మరణించినట్లు పోలీసులు తెలిపారు.

అనంతరం జయరాం మృతదేహాన్ని కారులో తీసుకెళ్లి నందిగామలో పడవేసినట్లు వెల్లడించారు. హత్యను యాక్సిడెంట్‌గా చిత్రీకరించే ప్రయత్నం చేసినట్లు రాకేశ్ రెడ్డి విచారణలో చెప్పినట్లు పోలీసులు తెలిపారు.   దీంతో జూనియర్ ఆర్టిస్ట్ సూర్యను పోలీసులు అదుపులోకి తీసుకోనున్నారు.