అమ్మాయిలను పంపుతాననేవాడు: రాకేశ్‌రెడ్డి బాధితుడి ఫిర్యాదు

కోస్టల్ బ్యాంక్ అధినేత, ఎక్స్‌ప్రెస్ టీవీ ఛైర్మన్ చిగురుపాటి జయరాం చౌదరి హత్య కేసు విచారణలో రాకేశ్ రెడ్డి చట్ట వ్యతిరేక కార్యకలాపాలు బయటపడుతున్నాయి. తీగ లాగితే డొంక కదిలినట్టు జయరాం హత్యతో గతంలో రాకేశ్ వల్ల నష్టపోయిన బాధితులంతా ఒక్కొక్కరుగా బయటకొస్తున్నారు.

తాజాగా రాకేశ్ రెడ్డికి పలువురిని బెదిరించిన ఆడియో టేపులు వెలుగులోకి వస్తున్నాయి. గతంలో ఓ రియల్ ఎస్టేట్ వ్యాపారికి చెల్లించాల్సిన డబ్బులివ్వకుండా అతనిని రాకేశ్ రెడ్డి బెదిరించాడు. బెంగళూరులో రియల్ ఎస్టేట్ బిజినెస్ పేరుతో .. తన వద్ద నుంచి రూ.1.5 కోట్లు తీసుకున్నట్లు రాజ్‌కుమార్ అనే వ్యక్తి చెప్పాడు.

డబ్బులు అడిగితే తనను మూడేళ్ల క్రితం బాలానగర్ ‌ఏసీపీ నాగరాజారెడ్డి వద్దకు పిలిపించి రాకేశ్ రెడ్డి బెదిరించాడని అతను ఆవేదన వ్యక్తం చేశాడు. అక్కడితో ఆగకుండా డబ్బులు అడిగిన ప్రతీసారి పోలీస్ అధికారులతో తనను బెదిరించేవాడని రాజ్‌కుమార్ తెలిపాడు.

డబ్బులు గురించి ప్రస్తావిస్తే.. అందుకు ప్రతిగా అమ్మాయిలను పంపుతానని అనేవాడన్నాడు. రాకేశ్‌పై ఫిర్యాదు చేసినా పోలీసులు పట్టించుకునేవారు కాదని వెల్లడించాడు. పోలీసులు చర్యలు తీసుకోకపోవడంతో చివరికి కోర్టును ఆశ్రయించినట్లు రాజ్‌కుమార్ వాపోయాడు.

రాకేశ్ రెడ్డి పెద్ద దొంగని, జయరామ్‌కు అప్పు ఇచ్చేంత స్థోమత అతనికి లేదన్నాడు. రాజకీయ నేతలతో ఫోటోలు దిగి, వారితో పరిచయం ఉందని తన జోలికి వస్తే అంతు చూస్తానంటూ రాకేశ్ బెదిరింపులకు దిగేవాడని పేర్కొన్నాడు. తన లాంటి వారు చాలామందిని రాకేశ్ రెడ్డి మోసం చేసేవాడని రాజ్‌కుమార్ వివరించాడు.