ఏపీలో రక్తికట్టని కోడికత్తి నాటకం, ఢిల్లీలో డ్రామా: కాల్వ

విశాఖపట్నం విమానాశ్రయంలో జరిగిన దాడి గురించి వైసీపీ అధ్యక్షుడు వైఎస్ జగన్‌కు ముందే స్పష్టంగా తెలుసునని మంత్రి కాల్వ శ్రీనివాసులు తెలిపారు. మానసికంగా సిద్ధమయ్యారు కాబట్టే దాడి తర్వాత జగన్‌లో ఎలాంటి హావభావాలు లేవని కాల్వ వ్యాఖ్యానించారు.   

అమరావతి: విశాఖపట్నం విమానాశ్రయంలో జరిగిన దాడి గురించి వైసీపీ అధ్యక్షుడు వైఎస్ జగన్‌కు ముందే స్పష్టంగా తెలుసునని మంత్రి కాల్వ శ్రీనివాసులు తెలిపారు. మానసికంగా సిద్ధమయ్యారు కాబట్టే దాడి తర్వాత జగన్‌లో ఎలాంటి హావభావాలు లేవని కాల్వ వ్యాఖ్యానించారు. 

దాడి జరిగిన తర్వాత దాడికి పాల్పడిన వ్యక్తిని కొట్టొద్దని జగన్‌ వారించినట్లు పోలీసు విచారణలో వెల్లడైందని మంత్రి కాల్వ వివరించారు. ఘటన జరిగిన తర్వాత నవ్వుతూ వెళ్లిన వ్యక్తి హైదరాబాద్‌ చేరుకున్నాక సానుభూతి కోసం ప్రయత్నించారని ఆరోపించారు. జగన్‌పై జరిగిన దాడిని అందరం ఖండించామని, ఆ ఘటన జరగకుండా ఉండాల్సిందని అనుకున్నామన్నారు. 

దాడి ఘటనను చిలవలు పలవలు చెయ్యాలని హైదరాబాద్‌ నుంచి హస్తిన వరకు చేసిన కుట్రను మాత్రమే తాము ప్రశ్నించామని వివరించారు. జగన్‌ ఆడిన డ్రామా రక్తికట్టలేదని, ప్రజలెవరూ దీన్ని నమ్మలేదని గ్రహించిన వైసీపీ నేతలు సీన్‌ను ఢిల్లీకి మార్చారని కాల్వ ధ్వజమెత్తారు. 

కుట్రలో భాగంగానే జగన్‌పై దాడి కేసును సీబీఐకి అప్పగించాలని వైసీపీ నేతలు డిమాండ్ చేస్తున్నారని మంత్రి కాల్వ ఆరోపించారు. కేసును సీబీఐకి అప్పగించేందుకు తమకెలాంటి అభ్యంతరం లేదన్నారు. బీజేపీ, వైసీపీ, టీఆర్ఎస్ కలిసి ఏపీ ప్రభుత్వాన్ని దోషిగా నిలబెట్టాలని చూస్తున్నాయని మండిపడ్డారు. 

ఈ వార్తలు కూడా చదవండి