పవన్‌ హిట్‌ వెనకాల బాలయ్య హస్తం.. తెరవెనుక జరిగిన అసలు విషయం బయటపెట్టిన నిర్మాత..

టాలీవుడ్‌ ఇండస్ట్రీలో బాలయ్యకి, మెగా ఫ్యామిలీకి మధ్య చిన్న గ్యాప్‌ ఎప్పుడూ కంటిన్యూ అవుతుంటుందనే టాక్‌ వినిపిస్తుంటుంది. కానీ అవన్నీ పక్కన పెట్టి పవన్‌ కళ్యాణ్‌ కోసం బాలయ్య ఓ హెల్ప్ చేయడం ఇప్పుడు హాట్‌ టాపిక్‌ అవుతుంది. 

బాలకృష్ణ(Balakrishna) ఇటీవల రెండు రీమేక్‌లు వదులుకున్నారు. `వకీల్‌ సాబ్‌` కథ మొదట ఆయన వద్దకే వచ్చింది. కానీ రీమేక్‌ చేయడం ఇష్టం లేక, తాను సెట్‌ కాననే ఉద్దేశంతో ఆయన ఆ సినిమాని వద్దనుకున్నాడు. దాన్ని పవన్‌ చేసిన విషయం తెలిసిందే. ఇటీవల వచ్చిన `భీమ్లా నాయక్‌` (Bheemla Nayak) కూడా మొదటి బాలయ్యనే అనుకున్నారు. కానీ ఆయన నో చెప్పడంతో పవన్‌ చేశారు. ఈరెండు సినిమాలు పవన్‌కి మంచి కమ్‌ బ్యాక్‌గా నిలిచాయి. 

ఇదిలా ఉంటే స్ట్రెయిట్‌ సినిమాలను పక్కన పెట్టి మరీ పవన్‌(Pawan Kalyan) రెండేళ్ల రాజకీయ గ్యాప్ తర్వాత రెండు రీమేక్ లతో ఆకట్టుకున్నారు. విజయాలను అందుకున్నారు. టికెట్ల రేట్ల తగ్గింపు, కరోనా వంటి ప్రతికూల పరిస్థితిల్లోనూ ఈ చిత్రాలు బ్రేక్‌ ఈవెన్‌ అయ్యాయని ట్రేడ్‌ వర్గాల టాక్‌. పవన్‌ కూడా సక్సెస్‌ ట్రాక్‌లో పడేలా చేసింది. ఇదిలా ఉంటే `భీమ్లా నాయక్‌` హిట్‌ వెనకాల బాలయ్య హస్తం ఉందనేది ఇప్పుడు లేటెస్ట్ న్యూస్‌. 

మలయాళ హిట్‌ చిత్రం `అయ్యప్పనుమ్‌ కోషియుమ్‌` చిత్ర రీమేక్‌ రైట్స్ దక్కించుకున్న సితార ఎంటర్‌టైన్‌మెంట్స్ అధినేత సూర్యదేవర నాగవంశీ.. బాలయ్య, రానాలతో కలిసి ఈ చిత్రం రీమేక్‌ చేయాలనుకున్నారు. అందుకోసం బాలకృష్ణని, రానాలను కలిశారు. రానా చేసేందుకు ఓకే చెప్పాడు. కానీ బాలయ్య మాత్రం నో చెప్పాడు. తనకు ఈ సినిమా సెట్‌ కాదన్నారు. అంతటితోవదిలేయలేదు, ఎవరు చేస్తే బాగుంటుందో కూడా ఆయనే సజెస్ట్ చేయడం విశేషం. 

నాకంటే ఈ సినిమాలో భీమ్లా నాయక్ పాత్రని పవన్‌ చేస్తే బాగుంటుందని, సలహాలిచ్చాడట. లేటెస్ట్ గా `అన్‌స్టాపబుల్‌ విత్‌ ఎన్బీకే 2` రెండో ఎపిసోడ్‌లో ఈ విషయాన్ని వెల్లడించారు. ఈ షోకి `భీమ్లా నాయక్‌` నిర్మాత నాగవంశీ గెస్ట్ గా రాగా, ఈ సినిమా ప్రస్తావన వచ్చింది. `భీమ్లా నాయక్‌` లో మొదట హీరో ఎవరు అని అడగ్గా, `మీరే కదా సార్‌. మీరు పవన్‌ పేరు చెబితేనే ఆయనతో చేశాం` అని తెలిపారు. 

సాగర్‌ కే చంద్ర దర్శకత్వంలో త్రివిక్రమ్ పర్యవేక్షణలో రూపొందిన `భీమ్లా నాయక్‌` డీసెంట్‌ హిట్‌ని అందుకుంది. దీంతో పవన్‌ హిట్‌ సినిమా వెనకాల బాలయ్య హస్తం ఉందని చెప్పడంలో అతిశయోక్తి లేదు. అంతేకాదు పవన్‌ రెండు హిట్లకి కారణం పరోక్షంగా బాలకృష్ణనే కావడం విశేషం. అదే సమయంలో తమ మధ్య ఎలాంటి గ్యాప్‌ లేదనే విషయం కూడా ఈ సంఘటనతో తేలిపోతుందంటున్నారు ఇరు హీరోల అభిమానులు. 

బాలకృష్ణ ప్రస్తుతం `వీరసింహారెడ్డి` (Veera simha reddy)చిత్రంలో నటిస్తున్నారు. గోపీచంద్‌ మలినేని దర్శకత్వం వహించే ఈ చిత్ర టైటిల్‌ని శుక్రవారమే ప్రకటించిన విషయం తెలిసిందే. శృతి హాసన్‌ హీరోయిన్‌గా నటిస్తున్న ఈచిత్రాన్ని మైత్రీ మూవీ మేకర్స్ నిర్మిస్తున్నారు. సంక్రాంతి కానుకగా సినిమాని విడుదల చేయబోతున్నారు.