రిషబ్ పంత్ ను వదులుకుంటుందా? - ఐపీఎల్ 2025 మెగా వేలానికి ముందు ఢిల్లీ క్యాపిట‌ల్స్ సంచలన నిర్ణ‌యాలు

IPL 2025 - Rishabh Pant : ఇండియ‌న్ ప్రీమియ‌ర్ లీగ్ (ఐపీఎల్) 2025 కోసం భార‌త క్రికెట్ నియంత్ర‌ణ మండ‌లి (బీసీసీఐ), ఐపీఎల్ ఫ్రాంఛైజీలు సిద్ధ‌మ‌వుతున్నాయి. అయితే, ఐపీఎల్ 2025 కి ముందు మెగా వేలం నిర్వ‌హించ‌నున్నారు. దీంతో దాదాపు అన్ని ఫ్రాంఛైజీల‌లో భారీ మార్పులు క‌నిపించ‌వ‌చ్చు.

ఘోర కారు ప్ర‌మాదంతో దాదాపు ఏడాది కాలం త‌ర్వాత క్రికెట్ గ్రౌండ్ లోకి అడుగుపెట్టిన రిష‌బ్ పంత్ ఐపీఎల్ 2024 తో అద్భుత పున‌రాగ‌మ‌నం చేశాడు. అయితే, రాబోయే ఐపీఎల్ 2025 సీజ‌న్ లో ఢిల్లీ క్యాపిట‌ల్స్ త‌ర‌ఫున రిష‌బ్ పంత్ ఆడ‌టం లేద‌ని జోరుగా క్రికెట్ వ‌ర్గాల్లో చ‌ర్చ‌సాగింది. 

రిషబ్ పంత్ ఢిల్లీ క్యాపిటల్స్‌ను విడిచిపెట్టి, చెన్నై సూపర్ కింగ్స్ లేదా ఇతర ఫ్రాంచైజీలలో ఒకదానిలో చేరుతాడనే పుకార్లు  ఇండియన్ ప్రీమియర్ లీగ్ (ఐపిఎల్) 2025 మెగా వేలానికి ముందు క్రికెట్ వ‌ర్గాల్లో హాట్ టాపిక్ అయింది. పంత్ ప‌ట్ల పూర్తి సంతృప్తితో లేని ఢిల్లీ క్యాపిట‌ల్స్ అత‌న్ని రిటెన్ష‌న్ చేసుకునే అవ‌కాశం లేద‌ని ప‌లు నివేదిక‌లు పేర్కొన్నాయి. 

వికెట్ కీపర్-బ్యాటర్‌ను వ‌దులుకోవాల‌నేది ఆ ఫ్రాంఛైజీ తీసుకున్న త‌ప్పు నిర్ణ‌యంగా ప్ర‌స్తుతం భార‌త్-బంగ్లాదేశ్ టెస్టులో నిరూపించాడు పంత్. సూప‌ర్ సెంచ‌రీతో చెల‌రేగాడు. ఈ సెంచ‌రీ దెబ్బంతో ఢిల్లీ క్యాపిట‌ల్స్ ఫ్రాంఛైజీ త‌న నిర్ణ‌యాన్ని మార్చుకుంద‌ని తెలుస్తోంది. 

ఢిల్లీ క్యాపిటల్స్ దీర్ఘకాలిక ప్రణాళికలో భాగంగా 2021లో రిషబ్ పంత్‌ను ఫ్రాంచైజీకి కెప్టెన్‌గా ఎంపిక చేసింది. 2020 ఫైనలిస్టులు ఐపీఎల్ 2025 మెగా వేలానికి ముందు అతనిని కొనసాగించడం ద్వారా ఆ ప్రణాళికను అమలులోకి తీసుకురావడానికి సిద్ధంగా ఉన్నట్లు తెలుస్తోంది. 2024లో ఢిల్లీ క్యాపిటల్స్‌కు నాయకత్వం వహించిన పంత్ ఐపీఎల్‌లో తిరిగి వచ్చినప్పుడు 446 పరుగులు చేశాడు.

ఐపీఎల్ 2025 మెగా వేలానికి ముందు రిషబ్ పంత్ ఢిల్లీ క్యాపిటల్స్ టాప్ రిటెన్షన్ పిక్‌గా ఉండబోతున్నాడు. గత ఎడిషన్‌కు దూరమైన తర్వాత 2024లో ఐపీఎల్‌లోకి తిరిగి వచ్చిన పంత్, 40.55 సగటుతో 155 స్ట్రైక్ రేట్‌తో 446 పరుగులు చేశాడు. అయితే, జ‌ట్టును ముందుకు న‌డ‌ప‌డంలో ఫ్రాంఛైజీ సంతోషంగా లేద‌నే వార్త‌లు వ‌చ్చాయి. 

అలాగే, రిటెన్ష‌న్ మొత్తానికి సంబంధించి పంత్ - ఢిల్లీ క్యాపిటల్స్ మధ్య విభేదాలు ఉన్నాయని ఊహాగానాలు ఉన్నాయి, అయితే, టాప్ బ్రాకెట్‌లో ఉన్న ఫ్రాంచైజీ ద్వారా పంత్‌ను ఉంచుకుంటారని ఢిల్లీ క్యాపిటల్స్ మేనేజ్‌మెంట్ పేర్కొంద‌ని క్రిక్‌బజ్ నివేదిక‌లు పేర్కొన‌డంతో ఈ టాపిక్ కు పుల్ స్టాప్ ప‌డింది. 

ఈ నివేదిక ప్రకారం 2022-24 సైకిల్‌లో ఢిల్లీ క్యాపిటల్స్‌కు జ‌ట్టులో రూ.16 కోట్ల బ్రాకెట్‌లో ఉన్న పంత్ ఆ జ‌ట్టుకు మొదటి రిటెన్ష‌న్ ఎంపికగా ఉంటాడు. అయితే ఫ్రాంఛైజీ పర్స్ మొత్తాన్ని బట్టి పంత్ ధ‌ర మ‌రింత పెరిగే అవకాశం ఉంది.

ఐపీఎల్ 2021 రెండవ భాగంలో శ్రేయాస్ అయ్యర్ స్థానంలో కెప్టెన్‌గా కొనసాగిన పంత్.. ఫ్రాంచైజీ భవిష్యత్తుగా పరిగణిస్తూ జ‌ట్టును ముందుకు న‌డిపించే బాధ్య‌త‌లు అప్ప‌గించారు. ఇప్పుడు పంత్ ను జ‌ట్టుతోనే అంటిపెట్టుకుని ఆ ప్ర‌ణాళిక‌లు, వ్యూహాల‌ను అమ‌లు చేసేందుకు సిద్ధంగా ఉంది ఢిల్లీ క్యాపిట‌ల్స్. 

బీసీసీఐ ఐదు రిటెన్షన్‌లను అనుమతించినట్లయితే రిషబ్ పంత్ తర్వాత ఫ్రాంచైజీకి అక్షర్ పటేల్, కుల్దీప్ యాదవ్‌లు రెండు, మూడో రిటెన్షన్‌లు అవుతారని నివేదిక పేర్కొంది. వీరితో పాటు జేక్ ఫ్రేజర్-మెక్‌గర్క్, ట్రిస్టన్ స్టబ్స్ ఇద్దరు విదేశీ ప్లేయ‌ర్లు కూడా ఈ రిటెన్ష‌న్ లో ఉంటారు. అన్‌క్యాప్డ్ ప్లేయర్‌ల ఆరవ ఎంపిక ఉంటే ఢిల్లీ క్యాపిట‌ల్స్ వికెట్ కీపర్ బ్యాటర్ అభిషేక్ పోరెల్‌ను కొనసాగించే అవకాశం ఉంది.

ఐపీఎల్ 2024 లో పంత్ నేతృత్వంలోని ఢిల్లీ క్యాపిటల్స్ నెట్ రన్ రేట్ కారణంగా ప్లేఆఫ్స్‌కు చేరుకోలేకపోయింది. పాయింట్ల పట్టికలో ఆరో స్థానంతో స‌రిపెట్టుకుంది. అయితే, ఐపీఎల్ మెగా వేలం, రిటెన్ష‌న్ ల‌కు సంబంధించిన నియమాలను బీసీసీఐ ఇంకా ప్రకటించలేదు కానీ కొన్ని రోజుల క్రితం ప‌లు రిపోర్టులు సూచించినట్లు ఈ వారంలో ఎప్పుడైనా దీనిపై ప్ర‌క‌ట‌న‌ రావచ్చు. మెగా వేలం నవంబర్ చివరి భాగంలో భారతదేశం వెలుపల జరిగే అవకాశం వుంది.