ఇది నా లవ్ స్టోరీ రివ్యూ

తరుణ్, ఓవియా జంటగా ఇది నా లవ్ స్టోరీ
వాలెంటైన్స్ డే సందర్భంగా రిలీజైన మూవీ
ఈ మూవీ రివ్యూ వివరాలు చూద్దాం..

రొమాంటిక్ ప్రేమకథా చిత్రాల్లో నటించి తనకంటూ ఓ ప్రత్యేక ఇమేజ్‌ను సంపాదించుకున్న హీరో తరుణ్. కానీ ఆ ఇమేజ్ ఎంతోకాలం నిలవలేదు. మధ్యలో అపజయాలతో తరుణ్ బాగా వెనకబడిపోయాడు. దీంతో చాలా కాలంగా సినిమాలకు దూరంగా ఉంటున్నాడు. ఇన్నాళ్లకు ‘ఇది నా లవ్ స్టోరీ’ చిత్రంతో మరోసారి రీఎంట్రీ ఇచ్చాడు. ప్రేమికుల రోజు కానుకగా ఈ సినిమా ప్రేక్షకుల ముందుకు వచ్చింది. మరి సినిమా ఎలా ఉంది...

కథ:
అభిరామ్(తరుణ్) యాడ్ ఫిల్మ్ మేకర్. ఒక యాడ్‌ను షూట్ చేయడానికి అరకు వెళ్తాడు. అక్కడ ఒక అమ్మాయిని చూసి ఇష్టపడతాడు. కనిపించినట్లే కనిపించి మాయమైపోతుంది ఆ అమ్మాయి. ఇంతలో తన చెల్లెలు ఒత్తిడి చేయడంతో పెళ్లి చేసుకోవడానికి శృతి అనే అమ్మాయిని కలవడానికి అభి వెళ్తాడు. తను మొదటిచూపులోనే ఇష్టపడ్డ అమ్మాయి, శృతి ఒక్కరే కావడంతో సంతోషపడతాడు. ఇద్దరు ఒకరితో ఒకరు మాట్లాడుకొని.. ఒకరి గురించి మరొకరు తెలుసుకుంటారు. శృతిని అభి ప్రేమించడం మొదలుపెడతాడు. ఈ క్రమంలో తను శృతి కాదని ఆమె స్నేహితురాలు అభినయ(ఓవియా) అని తెలుసుకుంటాడు. ఆ తరువాత ఏం జరిగింది..? అభి ప్రేమను అభినయ అంగీకరించిందా..? వీరి ప్రేమలో ఎలాంటి మలుపులు చోటు చేసుకున్నాయి..? అనే విషయాలతో సినిమా నడుస్తుంది.

విశ్లేషణ:
ఐదేళ్ల క్రితం కన్నడలో సూపర్ హిట్ అయిన ‘సింపుల్ ఆగి ఒంధ్ లవ్ స్టోరీ’ సినిమాకు రీమేక్‌గా ఈ చిత్రాన్ని తెరకెక్కించారు. కన్నడ సినిమాలో ట్రీట్మెంట్ కొత్తగా ఉండడంతో సినిమాకు మంచి రెస్పాన్స్ వచ్చింది. రొమాన్స్, కామెడీను మిక్స్ చేసి చక్కగా సినిమాను నడిపించారు. కానీ తెలుగుకు వచ్చేసరికి సినిమా బాగా నిరాశ పరిచింది. సినిమా లైన్ బాగున్నప్పటికీ దాన్ని తెరపై ఆవిష్కరించే విధానంలో తప్పులు దొర్లాయి. ఇద్దరు ప్రేమికుల మధ్య సహజ సంభాషణలతో సినిమాను చక్కగా నడిపించవచ్చు. కానీ ప్రాసల కోసం ప్రయత్నించి అడ్డదిడ్డమైన డైలాగులు వారితో పలికించారు.

‘కుక్క బిస్కెట్‌లో కుక్క ఉండదు కానీ క్రీమ్ బిస్కెట్‌లో క్రీమ్ ఉంటుంది’ అనేది మచ్చుకు ఒకటి. ఇటువంటి డైలాగులు సినిమాలో లెక్కలేనన్ని ఉన్నాయి. లవ్ స్టోరీ అని ఆశించి సినిమాకు వెళ్లే ప్రేక్షకులకు హీరోహీరోయిన్లతో పలికించిన డైలాగులు విసుగు తెప్పిస్తాయి. ‘ఆపండి బాబోయ్’ అని థియేటర్‌లో అరవని ప్రేక్షకుడు ఉండడు. పోస్టర్లు బాగున్నాయి, ఫీల్ గుడ్ లవ్ స్టోరీ అయి ఉంటుందని సినిమాకు వెళ్లామా ఇక అంతే సంగతి. కమ్ బ్యాక్ ఫిల్మ్ అంటూ తరుణ్ ఇలాంటి సినిమాలో ఎలా నటించాడో అర్థం కాదు. అతడి పాత్రను కూడా దర్శకుడు బలంగా రాసుకోలేదు. సినిమా మొత్తం హీరో పాయింట్ ఆఫ్ వ్యూలో చూపించడం కూడా రుచించదు.

సినిమాలో హీరోకి ఒక లవ్ స్టోరీ, హీరోయిన్‌కు ఒక లవ్ స్టోరీ ఉంటుంది. ఆ రెండు స్టోరీల్లో విషయం ఉండదు సరికదా ఆ ఎపిసోడ్లు మరింత విసిగిస్తాయి. ఇక వీరిద్దరి మధ్య నడిచే ప్రేమకథలో ఒక ఎమోషన్ కానీ, ఫీల్ కానీ ఉండదు. పతాక సన్నివేశాతను వర్ణించడానికి మాటలు కూడా సరిపోవు. రెండు పాత్రలను తీసుకొని ఒక్కరోజులో నడిచే కథ అంటూ దర్శకుడు చేసిన ప్రయోగం ఏమాత్రం వర్కవుట్ కాలేదు. సినిమాకు ఇది హైలైట్ అని చెప్పుకోవడానికి ఒక్క సీన్ కూడా లేదు. తెరపై తరుణ్, ఓవియాల జంట సెట్ కాలేదనిపిస్తుంది. వారి మధ్య కెమిస్ట్రీ పండలేదు. రెండు, మూడు బోల్డ్ సన్నివేశాల్లో కూడా వీరి నటన ఆకట్టుకోదు.

తరుణ్ ముఖంలో వయసు కొట్టొచ్చినట్లు కనిపిస్తోంది. లవర్ బాయ్‌గా కనిపించడానికి నానాతంటాలు పడ్డాడు కానీ వర్కవుట్ కాలేదు. ఓవియా సినిమాకు పెద్ద మైనస్. నటన పరంగా, గ్లామర్ పరంగా ఆకట్టుకోలేకపోయింది. మంచు మనోజ్ చేసిన అతిథి పాత్ర ఆకట్టుకుంటుంది. దర్శకుడు రమేష్ గోపి స్క్రీన్‌ప్లే ఆకట్టుకోదు. పాటలు అంతంత మాత్రంగానే ఉన్నాయి. నేపథ్య సంగీతం పర్వాలేదనిపిస్తుంది. సినిమాటోగ్రఫీ వర్క్ బాగుంది. కొన్ని లొకేషన్స్ ను అందంగా చూపించారు. ఎడిటింగ్ వర్క్ బాగుంది. ఈ మధ్య కాలంలో ఇంత బలహీనమైన ప్రేమకథతో సినిమాలు రాలేదనే చెప్పాలి. చివరిగా వాలైంటన్స్ డే నాడు ఈ ప్రేమకథ వికటించింది.