పెట్టిన పార్టీ జెండా ఎత్తేసి బీజేపీలోకి కన్నడస్టార్ ఉపేంద్ర

First Published 6, Mar 2018, 1:18 PM IST
kannada actor upendra joins bjp quits his own party
Highlights
  • ఇటీవలే పార్టీ పెట్టిన కన్నడ నటుడు ఉపేంద్ర
  • తాజా రాజకీయ పరిణామాలతో పార్టీలోంచి తప్పుకున్న ఉపేంద్ర
  • తాజాగా పెట్టిన పార్టీ వదిలేసి బీజేపీకి ఉపేంద్ర

కన్నడ స్టార్ హీరో, దర్శకుడు ఉపేంద్ర తాను స్థాపించిన పార్టీ నుంచే బయటకు వచ్చేస్తున్నారు. పార్టీలోని అంతర్గత కలహాల కారణంగా ఉపేంద్ర పార్టీని వీడుతున్నారు. కర్ణాటక ప్రజ్ఞావనత జనతా పక్ష (కేపీజేపీ) అనే పార్టీని ఉపేంద్ర గతేడాది అక్టోబర్‌లో స్థాపించారు. అయితే ఇప్పుడు పార్టీ టిక్కెట్ల విషయంలో చీఫ్ జనరల్ సెక్రటరీ మహేష్ గౌడ, ఉపేంద్ర మధ్య వివాదం తలెత్తింది. ఉపేంద్ర వైఖరి నియంతలా ఉందని పార్టీలోని చాలా మంది నేతలు బహిరంగంగానే అసంతృప్తిని వెళ్లగక్కుతున్నారు. ఉపేంద్రకు వ్యతిరేకంగా కొంతమంది నేతలు ఏకమవడంతో ఉపేంద్ర బయటికి వచ్చేయాలని నిర్ణయించుకున్నారట.



కేపీజేపీకి చెందిన కీలక నేతలు ఈరోజు (మార్చి 6న) సమావేశం కానున్నారు. ఈ సమావేశంలో ఉపేంద్ర పార్టీలో ఉంటారా.. బయటికి వెళ్లిపోతారా అనే విషయం ఖరారు అయిపోతుందని విశ్వసనీయ వర్గాల సమాచారం. వాస్తవానికి కేపీజేపీ పార్టీని స్థాపించినప్పుడు ఉపేంద్ర భారీ సభ ఏర్పాటుచేశారు. పార్టీ మానిఫెస్టోను ప్రకటించారు. మహేష్ గౌడను పార్టీ చీఫ్ జనరల్ సెక్రటరీగా నియమిస్తున్నట్లు వెల్లడించారు. పార్టీని కూడా మహేష్ గౌడ పేరిటే రిజిస్టర్ చేయించారు.
 

ఇదిలా ఉంటే, వచ్చే అసెంబ్లీ ఎన్నికల్లో పార్టీ టిక్కెట్ల కేటాయింపులతో పాటు అన్ని అధికారాలను తనకే ఇవ్వాలని ఉపేంద్ర డిమాండ్ చేసినట్లు మహేష్ గౌడ ఆరోపించారు. దీనికి తాము నిరాకరించామని కూడా వెల్లడించారు. అయితే పార్టీ టిక్కెట్లు కేటాయించే విషయంలో అధికారాలు తనకే ఉండాలని ఉపేంద్ర అంటున్నారు. పార్టీ విషయంలో తనకు స్పష్టమైన ప్రణాళికలు ఉన్నాయని చెబుతున్నారు. ‘ఆటో, ట్యాక్సీ డ్రైవర్లు పార్టీ కోసం ఎంతో శ్రమించారు. వారిలో కొంత మందికి టిక్కెట్లు ఇవ్వాలి. కానీ అలాంటి వాళ్లకు టిక్కెట్లు ఇస్తే కనీసం 2 శాతం ఓట్లు కూడా రావని మహేష్ అన్నారు. నాకు చాలా బాధనిపించింది’ అని ఉపేంద్ర ఆవేదన వ్యక్తం చేశారు.
 

మొత్తానికి ఉపేంద్రకు, పార్టీలోని నేతలకు పడటంలేదనేది స్పష్టంగా తెలుస్తోంది. ఈరోజు సమావేశం అనంతరం ఉపేంద్ర తన నిర్ణయాన్ని వెల్లడించనున్నారు. ప్రస్తుతానికైతే ఆయన బీజేపీలోకి వెళ్తారనే ప్రచారం జరుగుతోంది. అయితే పార్టీలోని కొంతమంది మాత్రం ఉపేంద్ర మరో కొత్త పార్టీని స్థాపిస్తారని అంటున్నారు. మరి ఉపేంద్ర ఎలాంటి నిర్ణయం తీసుకుంటారో చూడాలి.

loader