జయరాం హత్య కేసు: ఇవాళ పోలీసుల కస్టడీలోకీ నిందితులు

కోస్టల్ బ్యాంక్ అధినేత, ప్రముఖ పారిశ్రామిక వేత్త చిగురుపాటి జయరాం హత్యకేసులో జూబ్లీహిల్స్ పోలీసులు విచారణను మరింత వేగవంతం చేశారు. జయరాంను హత్య చేసిన ప్రధాన నిందితులు రాకేశ్ రెడ్డి, శ్రీనివాస్‌లను జ్యూడీషియల్ కస్టడీకి అనుమతివ్వాలని కోరుతూ జూబ్లీహిల్స్ పోలీసులు నాంపల్లి కోర్టులో పిటిషన్ దాఖలు చేశారు.

దీనికి సమ్మతించిన న్యాయస్థానం నిందితులిద్దరిని మూడు రోజుల పాటు కస్టడీకి అనుమతిస్తూ మంగళవారం ఆదేశాలు జారీ చేసింది. దీంతో ఇవాళ రాకేశ్ రెడ్డి, శ్రీనివాస్‌లను చంచల్‌గూడ జైలు నుంచి అదుపులోకి తీసుకోనున్నారు.

జయరాం-శిఖా చౌదరి సంబంధాలు, జయరాం భార్య పద్మశ్రీ చేసిన ఆరోపణలపై పోలీసులు వీరిని ప్రశ్నించే అవకాశం ఉంది. శిఖా చౌదరి నివసిస్తున్న విల్లాకు గత నెల 29న జయరామ్ వచ్చినట్లు అధికారులు నిర్థారించారు.

ఈ క్రమంలో ఆయన అక్కడకు ఎందుకు వెళ్లారనే అంశంపై ఆరా తీస్తున్నారు. ఆయన వచ్చినప్పుడు అక్కడ ఎవరెవరు ఉన్నారు..? అక్కడ ఏం జరిగింది..? అనే అంశాలు తెలుసుకోవడానికి శిఖా చౌదరి ఇంట్లోని పనిమనిషిని పోలీసులు విచారించారు. బుధవారం రాకేశ్ రెడ్డి, శ్రీనివాస్‌లను విచారిస్తే కేసులో మరిన్ని కోణాలు వెలుగులోకి వచ్చే అవకాశం ఉంది.