జయరాం కేసు: విచారణ ప్రారంభించిన తెలంగాణ పోలీసులు, శిఖాకు నోటీసులు..?

కోస్టల్ బ్యాంక్ అధినేత, ప్రముఖ పారిశ్రామిక వేత్త చిగురురాటి జయరామ్ చౌదరి హత్య కేసులో తెలంగాణ పోలీసులు విచారణ ప్రారంభించారు. ఏపీ పోలీసుల దర్యాప్తు వల్ల నిందితులకు శిక్ష పడదని కేసును విచారించాల్సిందిగా జయరామ్ సతీమణి పద్మశ్రీ ఇచ్చిన ఫిర్యాదు మేరకు.. ఏపీ పోలీసులు కేసును తెలంగాణకు బదిలీ చేశారు.

దీనిలో భాగంగా నిన్న రాత్రే జూబ్లీహిల్స్ పోలీసులు ఎఫ్ఐఆర్ నమోదు చేశారు. పద్మశ్రీ ఇచ్చిన ఫిర్యాదును సైతం ఎఫ్ఐఆర్‌లో పొందుపరిచారు. విచారణలో భాగంగా కృష్ణాజిల్లా జైలులో ఉన్న రాకేశ్ రెడ్డిని హైదరాబాద్‌కు తీసుకొచ్చేందుకు ప్రయత్నాలు ముమ్మరం చేశారు.

ఇందుకోసం జూబ్లీహిల్స్ పోలీసులు పీటీ వారెంట్ దాఖలు చేశారు. హైదరాబాద్‌లో కేసు విచారణ నిమిత్తం శిఖా చౌదరికి తెలంగాణ పోలీసులు నోటీసులు ఇచ్చే అవకాశం ఉంది. అలాగే జయరామ్ భార్య పద్మశ్రీ స్టేట్‌మెంట్‌ను సైతం రికార్డు చేయనున్నారు.

అనంతరం రాకేశ్ ఇంట్లో సోదాలు చేసే అవకాశాలు కనిపిస్తున్నాయి. జయరామ్‌ను హత్య చేసి కారులో విజయవాడ తరలించేందుకు రాకేశ్‌కు మరో నలుగురు సహకరించినట్లుగా పోలీసులు అనుమానిస్తున్నారు.  ఈ సమయంలో రాకేశ్‌తో ఉన్నదెవరు అన్న దానిపై విచారించనున్నారు.