నాకు అంగుళం భూమి వున్నా చూపించండి: బొత్సకు సుజనా సవాల్

రాజధాని మార్పు అంటే ఒక చొక్కా తీసేసి మరో కొత్త చొక్కా కొనుక్కోవడం కాదని సుజనా వ్యాఖ్యానించారు. అభివృద్ధి వికేంద్రీకరణ అనేది మంచిదేనని... అయితే అప్పటి ప్రభుత్వం రాజధానికి కావాల్సిన అన్ని రకాల ప్రక్రియలను పూర్తిచేసిందని ఇటువంటి పరిస్థితుల్లో బొత్స వ్యాఖ్యలు ప్రజలను ఆందోళనలోకి నెట్టాయని సుజనా ధ్వజమెత్తారు. 

మంత్రి బొత్స విసిరిన సవాల్‌ను స్వీకరిస్తున్నాన్నారు బీజేపీ రాజ్యసభ సభ్యుడు సుజనా చౌదరి. సోమవారం ఆయన ఏపీ బీజేపీ అధ్యక్షుడు కన్నా లక్ష్మీనారాయణతో కలిసి రాజధాని గ్రామాలైన తుళ్లూరు, మందడం, రాయపూడిలలో పర్యటించారు.

ఈ సందర్భంగా ఆయన మాట్లాడుతూ.. రాజధాని ప్రాంతంలో తనకు భూమి ఉన్నట్లు బొత్స నిరూపించాలని... ఆధారాలు లేకుండా ఇష్టమొచ్చినట్లు మాట్లాడొద్దని సుజనా హితవు పలికారు.

రాజధానిలోని 29 గ్రామాల్లో తనకు అంగుళం భూమి ఉందని వైసీపీ నేతలు నిరూపించాలని.. ఎవరైనా తన పేరు మీద కొనుక్కుంటే చూపించాలని డిమాండ్ చేశారు. వైసీపీ సర్కార్ రాజధానిని మారుస్తుందని తాను భావించడం లేదన్నారు ..

కొద్దిరోజుల క్రితం జరిగిన అసెంబ్లీ సమావేశాల్లో రాజధాని పనులను ఆపలేదని స్వయంగా బొత్స సత్యనారాయణ సమాధానమిచ్చారని సుజనా గుర్తు చేశారు. కానీ దానికి విరుద్ధంగా అన్ని పనులు ఆగిపోయాయని సుజనా చౌదరి మండిపడ్డారు.

మంత్రి హోదాలో వున్న వ్యక్తి అటువంటి వ్యాఖ్యలు సరికాదన్నారు. రాజధాని మార్పు అంటే ఒక చొక్కా తీసేసి మరో కొత్త చొక్కా కొనుక్కోవడం కాదని సుజనా వ్యాఖ్యానించారు.

అభివృద్ధి వికేంద్రీకరణ అనేది మంచిదేనని... అయితే అప్పటి ప్రభుత్వం రాజధానికి కావాల్సిన అన్ని రకాల ప్రక్రియలను పూర్తిచేసిందని ఇటువంటి పరిస్థితుల్లో బొత్స వ్యాఖ్యలు ప్రజలను ఆందోళనలోకి నెట్టాయని.. ప్రజలకు బీజేపీ అండగా వుంటుందని సుజనా స్పష్టం చేశారు. 

అమరావతి భూముల చిట్టా విప్పుతా: సుజనాకు బొత్స కౌంటర్