సెప్టెంబర్ 1 నుండి మీ జేబు గుల్లే? గ్యాస్, పెట్రోల్, క్రెడిట్ కార్ట్ ధరలు, నిబంధనల్లో కీలక మార్పులు!

ఆగస్టు నెల ముగియడానికి ఇంకా కొన్ని రోజులే ఉన్నాయి. ఈ నేపథ్యంలో, రాబోయే కొత్త నెల సెప్టెంబర్ 1 నుండి చాలా పెద్ద మార్పులు జరగబోతున్నాయి. ఈ మార్పుల్లో ఎల్‌పీజీ గ్యాస్ సిలిండర్ ధర, క్రెడిట్ కార్డ్ నియమాలు కూడా ఉన్నాయి. అంతేకాకుండా, ప్రభుత్వ ఉద్యోగులకు డియర్‌నెస్ అలవెన్స్‌కు సంబంధించి ప్రత్యేక ప్రకటనలు ఉండవచ్చు. సెప్టెంబర్ నెలలో ఏయే మార్పులు జరగవచ్చు?  అది మీ జేబుపై ఎంత ప్రభావం చూపుతుందో? చూద్దాం.

ప్రతి నెల మొదటి తేదీన భారత ప్రభుత్వం ఎల్‌పీజీ ధరను సవరిస్తుంది. వాణిజ్య గ్యాస్ సిలిండర్లు, గృహోపయోగం కోసం ఉపయోగించే గ్యాస్ సిలిండర్ల ధరల్లో మార్పులు చోటుచేసుకుంటున్నాయి. ఈ నేపథ్యంలో ఈసారి కూడా ఎల్‌పీజీ సిలిండర్ ధరలో మార్పు వస్తుందని భావిస్తున్నారు. గత నెలలో వాణిజ్య ఎల్‌పీజీ గ్యాస్ సిలిండర్ ధర రూ.8.50 పెరిగింది. జూలైలో దీని ధర రూ.30 తగ్గింది. 

ఎల్‌పీజీ సిలిండర్ల ధరలతో పాటు, చమురు మార్కెటింగ్ కంపెనీలు ఏవియేషన్ టర్బైన్ ఫ్యూయల్ (ఏటీఎఫ్) , సిఎన్‌జి-పిఎన్‌జి ధరలను కూడా సవరిస్తాయి. దీని కారణంగా, మొదటి తేదీన వాటి ధరల్లో కూడా మార్పులు చూడవచ్చని భావిస్తున్నారు. 

నకిలీ కాల్స్, నకిలీ సందేశాలను అరికట్టేందుకు టెలికాం కంపెనీలను ట్రాయ్ హెచ్చరించింది. దీని కోసం ట్రాయ్ కఠినమైన మార్గదర్శకాలను జారీ చేసింది. జియో, ఎయిర్‌టెల్, వోడాఫోన్, ఐడియా, బిఎస్‌ఎన్‌ఎల్ వంటి టెలికాం కంపెనీలు 140 మొబైల్ నంబర్‌లతో ప్రారంభించి బ్లాక్‌చెయిన్ ఆధారిత డిఎల్‌టి (డిస్ట్రిబ్యూటెడ్ లెడ్జర్ టెక్నాలజీ ప్లాట్‌ఫామ్‌)కు టెలిమార్కెటింగ్ కాల్స్,  వాణిజ్య సందేశాలను పంపాలని ట్రాయ్ కోరింది. 

సెప్టెంబర్ 1 నుండి, హెచ్‌డిఎఫ్‌సి బ్యాంక్ యుటిలిటీ బిల్ చెల్లింపు లావాదేవీలపై రివార్డ్ పాయింట్‌ల పరిమితిని నిర్ణయించనుంది. దీని కింద కస్టమర్‌లు ఈ లావాదేవీలపై నెలకు 2,000 పాయింట్‌లను మాత్రమే పొందగలరు.థర్డ్ పార్టీ యాప్‌ల ద్వారా చెల్లింపులు చేయడంపై హెచ్‌డిఎఫ్‌సి బ్యాంక్ ఎలాంటి రివార్డ్‌లను అందించదు. 

సెప్టెంబర్ 2024 నుండి, ఐడిఎఫ్‌సి ఫస్ట్ బ్యాంక్ క్రెడిట్ కార్డ్‌లపై చెల్లించాల్సిన కనీస మొత్తాన్ని తగ్గించనుంది. చెల్లింపు తేదీని కూడా 18 నుండి 15 రోజులకు తగ్గిస్తారు. ఇది కాకుండా, మరో మార్పు - సెప్టెంబర్ 1, 2024 నుండి అమలు కానుంది.  UPI తో పాటు ఇతర ప్లాట్‌ఫామ్‌లలో చెల్లింపులు చేయడానికి RuPay క్రెడిట్ కార్డ్‌లను ఉపయోగించే కస్టమర్‌లు ఇతర చెల్లింపు సేవా ప్రొవైడర్ల క్రెడిట్ కార్డ్‌లను ఉపయోగించే వారికి లభించే రివార్డ్ పాయింట్స్ ని పొందుతారు. 

ఆధార్ కార్డును ఉచితంగా అప్‌డేట్ చేసుకోవడానికి చివరి తేదీ సెప్టెంబర్ 14గా నిర్ణయించారు. ఆ తర్వాత, ఆధార్‌కు సంబంధించిన కొన్ని విషయాలను ఉచితంగా అప్‌డేట్ చేయలేరు. సెప్టెంబర్ 14 తర్వాత, ఆధార్‌ను అప్‌డేట్ చేయడానికి మీరు రుసుము చెల్లించాల్సి ఉంటుంది. అయితే, ఆధార్‌ను ఉచితంగా అప్‌డేట్ చేసుకోవడానికి చివరి తేదీ జూన్ 14, 2024, దీనిని సెప్టెంబర్ 14, 2024 వరకు పొడిగించారు. 

సెప్టెంబర్‌లో కేంద్ర ప్రభుత్వ ఉద్యోగులకు కీలక ప్రకటన వెలువడే అవకాశం ఉంది. ప్రభుత్వ ఉద్యోగులకు డియర్‌నెస్ అలవెన్స్ 3 శాతం పెరిగే అవకాశం ఉంది. ప్రస్తుతం ప్రభుత్వ ఉద్యోగులకు 50 శాతం డియర్‌నెస్ అలవెన్స్ (డిఏ) అందజేస్తున్నారు, 3 శాతం పెంపు తర్వాత, అది 53 శాతానికి చేరుకుంటుంది.