ఆర్ ఆర్ ఆర్ దర్శకుడు రాజమౌళిపై ఒక ఫన్నీ మీమ్ రూపొందించారు. సదరు వీడియోలో మంచు లక్ష్మి కూడా ఉన్నారు. ఆమె ఆసక్తికరంగా స్పందించారు.
దర్శకుడు రాజమౌళి ఇప్పుడో గ్లోబల్ పర్సనాలిటీ. ఆయన దర్శకత్వం వహించిన ఆర్ ఆర్ ఆర్ మూవీ ఒరిజినల్ సాంగ్ విభాగంలో ఆస్కార్ గెలుచుకుంది. నాటు నాటు సాంగ్ ఆస్కార్ కి ఎంపిక కాగా సంగీతం, సాహిత్యం సమకూర్చిన కీరవాణి, చంద్రబోస్ వేదిక పైకి వెళ్లి ఆస్కార్ అందుకున్నారు. ఈ ఆస్కార్ గెలుచుకోవడం వెనుక సమిష్టి కృషి ఉంది. మెయిన్ క్రెడిట్ మాత్రం రాజమౌళికి ఇవ్వాల్సిందే. ఏడాది కాలంగా రాజమౌళి అమెరికాకే పరిమితమై... ఆర్ ఆర్ ఆర్ చిత్రాన్ని ప్రపంచానికి పరిచయం చేసే పనిలో ఉన్నారు.
అంతర్జాతీయ వేదికలపై ప్రదర్శితమైన ఆర్ ఆర్ ఆర్ మూవీ ఆస్కార్ సభ్యుల దృష్టిలో పడింది. ఒరిజినల్ సాంగ్ విభాగంలో ఇండియాకు ఆస్కార్ తెచ్చిన మొట్టమొదటి చిత్రంగా ఆర్ ఆర్ ఆర్ చరిత్రకెక్కింది. ఇదిలా ఉంటే రాజమౌళి మీద ఓ నెటిజన్ ఒక మీమ్ చేశాడు. ఆర్ ఆర్ ఆర్ టైటిల్ ని ఆయన పలికే విధానాన్ని మంచు లక్ష్మి తప్పుబట్టినట్లు రెండు వీడియోలు మిక్స్ చేసి ట్రోల్ వీడియో రూపొందించాడు.
ఆ వీడియోలో రాజమౌళి ఆర్ ఆర్ ఆర్ అని పలకగానే... మంచు లక్ష్మి అందుకుంటూ 'ఆర్' అని ఇలా పలికితే దొరికిపోతారు. ఆర్ అనేది నోట్లో దొర్లాలి అని చెబుతుంది. రాజమౌళి, మంచు లక్ష్మి వేర్వేరు సందర్భాల్లో మాట్లాడిన వీడియోలు జత చేసి ఆయన ఇంగ్లీష్ ఉచ్ఛరణ మీద ఫన్నీ వీడియో చేశారు. అది సోషల్ మీడియాలో వైరల్ అయ్యింది. దీంతో ఆ వీడియో మీద మంచు లక్ష్మి స్పందించారు.
రామ రామ రామ... అని కామెంట్ పెట్టారు. నన్ను ఇలా కూడా ట్రోల్ చేస్తున్నారా? ఇది దారుణం అన్న అర్థంలో మంచు లక్ష్మి ఆ తరహా కామెంట్ చేశారు. మంచు లక్ష్మి ట్వీట్ వైరల్ గా మారింది. మంచు లక్ష్మి చాలా కాలం అమెరికాలో ఉన్నారు. అమెరికన్ యాక్సెంట్ లో ఆమె ఇంగ్లీష్ అద్భుతంగా ఉంటుంది. కొన్ని సందర్భాల్లో ఇంగ్లీష్ పదాలు, అక్షరాలు ఎలా పలకాలో ఆమె చెప్పారు. ఆ వీడియోలను కూడా మీమ్స్ కి వాడేస్తున్నారు మీమర్స్. కాగా అమెరికాలో ఎన్టీఆర్, రామ్ చరణ్ స్థానిక యాక్సెంట్ లో మాట్లాడే ప్రయత్నం చేస్తున్నారు. ఇది ఒకింత విమర్శల పాలవుతుంది.
