హీరోయిన్ మాళవిక నాయర్ ముద్దు సీన్(PhaPha)లో నటించింది. హీరోగా నటించిన నాగశౌర్యతో ఆమె లిప్ లాక్ చేసింది. ఇది చాలా రోజులుగా హాట్ టాపిక్ అవుతుంది. ఈ నేపథ్యంలో తాజాగా దీనిపై హీరోయిన్ మాళవిక నాయర్ రియాక్ట్ అయ్యింది.
`ఫలానా అబ్బాయి ఫలానా అమ్మాయి` చిత్రంలో హీరోయిన్ మాళవిక నాయర్ ముద్దు సీన్లో నటించింది. హీరోగా నటించిన నాగశౌర్యతో ఆమె లిప్ లాక్ చేసింది. ఇది చాలా రోజులుగా హాట్ టాపిక్ అవుతుంది. ఈ నేపథ్యంలో తాజాగా దీనిపై హీరోయిన్ మాళవిక నాయర్ రియాక్ట్ అయ్యింది. ఆమె చెబుతూ, అది తనకు ఎలాంటి ఇబ్బంది అనిపించలేదని చెప్పింది. అది కావాలని ఇరికించిన సన్నివేశం కాదని, కథలో భాగమైన, కథకి అవసరమైన సన్నివేశం అని, అందుకే నటించినట్టు చెప్పింది. కథ డిమాండ్ మేరకే చేశామని వెల్లడించింది. ఆ విషయంలో తనకు అభ్యంతరం లేదని చెప్పింది.
నాగశౌర్య, మాళవిక నాయర్ జంటగా నటించిన `ఫలానా అబ్బాయి ఫలానా అమ్మాయి` చిత్రానికి శ్రీనివాస్ అవసరాల దర్శకత్వం వహించగా, పీపుల్స్ మీడియా ఫ్యాక్టరీ, దాసరి ప్రొడక్షన్స్ పతాకాలపై టిజి విశ్వ ప్రసాద్, పద్మజ దాసరి నిర్మించారు. ఈ నెల 17న సినిమా విడుదల కాబోతుంది. ఇప్పటికే విడుదలైన టీటర్, ట్రైలర్, పాటలకు మంచి రెస్పాన్స్ వచ్చింది. ప్రీ రిలీజ్ ఈవెంట్ గ్రాండ్గా జరిగింది. టాలీవుడ్సెలబ్రిటీలు, దర్శక, నిర్మాతలు పాల్గొని సినిమాకి అభినందనలు తెలిపారు.
తాజాగా సోమవారం హీరోయిన్ మాళవిక నాయర్ మీడియాతో ముచ్చటించారు. ఈ సందర్భంగా ఆమె ఇంటర్వ్యూ విశేషాలు తెలుసుకుందాం. ఫలానా అబ్బాయి ఫలానా అమ్మాయి ప్రయాణం ఎలా ఉంది? అనే ప్రశ్నకి మాళవిక స్పందిస్తూ, ట్రైలర్ మళ్లీ మళ్లీ చూస్తూనే ఉన్నాను. నటిగా నేను ఎవరనేది చూపించే చిత్రమిది. ఇప్పటిదాకా ఒక నటిగా సినిమాలు చేశాను.. నటిగా ఏం చేయాలో అంతవరకే చేశాను. కానీ ఇది అన్ని విభాగాల పరంగా నాకు దగ్గరైన సినిమా. శ్రీనివాస్ లాంటి ప్రతిభగల దర్శకుడితో పని చేయడం సంతోషం కలిగించింది. ఆయన అమెరికా వెళ్లి ఎంతో సాంకేతిక నేర్చుకొని ఇక్కడికి వచ్చి తెలుగు సినిమాలు చేయడం అభినందించదగ్గ విషయం. ఆయనకు భాషపై మంచి పట్టు, గౌరవం ఉన్నాయి. ఆయన వల్లే నా తెలుగు మెరుగుపడింది.
'ఫలానా అబ్బాయి ఫలానా అమ్మాయి' కథ ఎలా ఉండబోతోంది?
మామూలుగా ప్రేమ కథలు రెండు మూడేళ్ళ వ్యవధిలో జరిగినట్లు చూపిస్తుంటారు. అయితే ఇందులో 18 నుంచి 28 ఏళ్ల వరకు ప్రయాణం చూపిస్తారు. మొత్తం ఏడు చాప్టర్లు ఉంటాయి. ఒక్కో చాప్టర్ ఒక్కో థీమ్ తో ఉంటుంది. ప్రేమ, ద్వేషం, హాస్యం ఇలా అన్ని భావోద్వేగాలు ఉంటాయి. వయసును బట్టి నాగ శౌర్య పాత్ర తాలూకు వైవిధ్యాన్ని చక్కగా చూపించారు. నేను కూడా నా పాత్రకు పూర్తి న్యాయం చేశానని భావిస్తున్నాను. నేను పోషించిన అనుపమ పాత్ర నా నిజ జీవితానికి దగ్గరగా ఏముండదు. నాగ శౌర్య పోషించిన సంజయ్ పాత్ర మాత్రం కాస్త దగ్గరగా ఉంటుంది. అయితే పాత్రలు, సన్నివేశాలు సహజంగా నిజ జీవితంలో మనకు ఎదురైనట్లుగా ఉంటాయి. కళ్యాణి మాలిక్ గారు అద్భుతమైన సంగీతం అందించారు. అన్ని పాటలు ఉన్నాయి. అందరికీ కనుక చాటు మేఘమా పాట బాగా నచ్చింది. నాకు నీతో సాంగ్ ఇంకా ఎక్కువ నచ్చింది.
హీరో నాగశౌర్య, దర్శకుడు గురించి చెబుతూ, నాగశౌర్య తన చుట్టూ ఉన్నవాళ్లు ఆనందంగా ఉండాలి అనుకుంటారు. ఎవరైనా బాధగా ఉంటే వాళ్ళని నవ్వించే ప్రయత్నం చేస్తారు. ఆయనది చిన్న పిల్లల మనస్తత్వం. షూటింగ్ సమయంలో ప్రతి షాట్ అవ్వగానే ఎలా చేశాను, ఇంకా ఏమైనా చేయాలా అని దర్శకుడు శ్రీనివాస్ గారిని అడుగుతుంటారు. దర్శకుడు శ్రీనివాస్ అవసరాల చాలా సరదాగా ఉంటారు. ఏమున్నా మనసుని నొప్పించకుండా ముఖం మీదే సున్నితంగా చెప్పేస్తారు. ఆయన నటీనటుల మ్యానరిజమ్స్ మీద దృష్టి పెట్టరు. ఎమోషన్స్ రాబట్టుకోవడం మీద దృష్టి పెడతారు. నిర్మాతలు వివేక్ గారితో ఇది నాకు రెండో సినిమా. చాలా కూల్ గా, కామ్ గా ఉంటారు. ధమాకా లాంటి ఘన విజయం తర్వాత ఈ సినిమా వస్తుండటం సంతోషంగా ఉంది. ఈ నాలుగేళ్లలో శ్రీనివాస్ గారికి నిర్మాతలు విశ్వప్రసాద్ గారు ఎంతో సపోర్ట్ చేశారు. కోవిడ్ సమయంలో మా పట్ల ప్రత్యేక శ్రద్ధ తీసుకున్నారు.
నాగశౌర్య గారు ఈ సినిమా పట్ల చాలా నమ్మకంగా ఉన్నారు.. ఈ సినిమా రీమేక్ చేసినా ఆ మ్యాజిక్ ని రిపీట్ చేయలేరు అన్నారు.. అంతలా సినిమాలో ఏముంది?
అలా ఎందుకు అన్నారో మీకు సినిమా చూస్తే అర్థమవుతుంది. షూటింగ్ సమయంలో అసలు అక్కడ ఎలాంటి మ్యాజిక్ జరుగుతుంది అనేది దర్శకుడికి, డీఓపీకి, నటీనటులకు అర్థమవుతుంది. ఆ నమ్మకంతోనే శౌర్య అలా అని ఉంటారు. ఈ సినిమా కోసం ఆయన ఎంతో కష్టపడ్డారు. ఈ సినిమా ఓ ప్రయోగమే. రెగ్యులర్ సినిమా అనలేను. అలా అని మనకి తెలియని భావోద్వేగాలు కాదు. చూస్తున్నంత సేపు ఓ మంచి అనుభూతి కలుగుతుంది. నా పాత్ర చాలా సంతృప్తిగా ఉంది. 18 నుంచి 28 ఏళ్లు.. ఈ పదేళ్ల ప్రయాణంలో మనలో ఎన్నో మార్పులు వస్తాయి, మన ఆలోచనా విధానం మారుతుంది. మన భావోద్వేగాలు మారుతుంటాయి. అందుకే నా పాత్రలో నటనకి ఎంతో ఆస్కారం ఉంది.
ప్రీ రిలీజ్ వేడుకలో డైరెక్టర్ బాబీ గారు మీ కళ్ళు బాగున్నాయి అని చెప్పడం ఎలా అనిపించింది?
ఆనందం కలిగించింది. గతంలో కూడా కొందరు దర్శకులు కళ్ళు బాగుంటాయి అని ప్రశంసించారు. మా అమ్మ కళ్ళు కూడా అలాగే ఉంటాయి. అవే నాకు వచ్చాయి. నటిగా నా ప్రయత్నం నేను చేసుకుంటూ వెళ్తున్నాను. ఇలాంటి సినిమాలు చేయాలి, ఇలాంటి పాత్రలే చేయాలి అనుకోవట్లేదు. కథ, పాత్ర నచ్చితే అన్ని జోనర్లలో సినిమాలు చేయడానికి సిద్ధంగా ఉన్నాను. వచ్చిన ప్రతి సినిమా చేయడంలేదు. నా మనసుకి నచ్చిన సినిమాలను మాత్రమే ఎంపిక చేసుకొని నటిస్తున్నాను. ప్రస్తుతం `అన్నీ మంచి శకునములే`, `డెవిల్` సినిమాలు చేస్తున్నా` అని తెలిపింది మాళవిక నాయర్.
