తెలుగులో హీరోయిన్ గా పలు చిత్రాల్లో నటించిన తాప్సీ బాలీవుడ్ లో అవకాశాలు రావడంతో ముంబైకి షిఫ్ట్ అయింది. సరికొత్త కథలను ఎన్నుకుంటూ హిట్టు మీద హిట్టు అందుకుంటూ తన కెరీర్ ని జాగ్రత్తగా ప్లాన్ చేసుకుంటుంది.

ప్రస్తుతం ఈ భామ 'బద్లా' అనే సినిమాలో నటిస్తోంది. అమితాబ్ బచ్చన్ ప్రధాన పాత్రలో నటించిన ఈ సినిమా ట్రైలర్ ని తాజాగా ప్రేక్షకుల ముందుకు తీసుకువచ్చారు. సుజాయ్ ఘోష్ డైరెక్ట్ చేసిన ఈ సినిమా సస్పెన్స్, థ్రిల్లర్ గా తెరకెక్కించారు. వ్యాపారవేత్త అయిన ఓ మహిళ(తాప్సీ) మరో వ్యక్తితో కలిసి ఓ హోటల్ లో స్టే చేయాల్సివస్తుంది.

ఇంతలో ఆమెను ఎవరో తలపై బలంగా కొట్టగా స్పృహ కోల్పోతుంది. ఆమె లేచి చూసేసరికి తనతో పాటు వచ్చిన వ్యక్తి శవంగా పడి ఉంటాడు. కేసు హీరోయిన్ కి చుట్టుకోవడంతో పేరున్న లాయర్(అమితాబ్) సహాయం కోరుతుంది.

ఆ తరువాత ఏం జరిగిందనేదే సినిమా. ట్రైలర్ ని ఆసక్తికరంగా కట్ చేయడంతో సినిమాపై అంచనాలు పెరిగిపోయాయి. మార్చి 8న సినిమా ప్రేక్షకుల ముందుకు రానుంది.