అమ్మ సపోర్ట్ తోనే అక్క ఎదిగిందన్న నటి అంజలి సోదరి ఆరాధ్య
- టాలీవుడ్ లోకి మరో హిరోయిన్ సోదరి
- దక్షిణాదిలో తనకంటూ ప్రత్యేక గుర్తింపు తెచ్చుకున్న అంజలి
- తాజాగా అంజలి సోదరి ఆరాధ్య ఇండస్ట్రీ ఎంట్రీ
కథానాయికల చెల్లాయిలు.. వెండి తెరపై అడుగుపెట్టడం, తమ సత్తా చాటుకోవడం చూస్తూనే ఉన్నాం. ఆ జాబితాలో మరో అమ్మాయి చేరింది. తనే అంజలి సోదరి.. ఆరాధ్య. తాను కూడా అక్కలా వెండి తెరపై రాణిస్తానని ధీమాగా చెబుతోంది. శనివారం సాయింత్రం హైదరాబాద్లో విలేకరులతో మాట్లాడింది ఆరాధ్య. ``చిన్నప్పటి నుంచీ నాకు సినిమాలంటే ఇష్టం. నీ కళ్లు బాగుంటాయి.. సినిమాల్లోకి వెళ్లొచ్చు కదా? అని సన్నిహితులు చెప్పేవారు.
అక్క అంజలి సినిమాల్లో సక్సెస్ అయింది. తనని స్ఫూర్తిగా తీసుకొని నేను కూడా అడుగుపెట్టా. అక్క తెలుగు చిత్రసీమలో తనకంటూ ఓ స్థానం సంపాదించుకొంది. అదృష్టం అనేదానికంటే అక్క పడిన కష్టమే.. తన ఉన్నతికి కారణం. మా అమ్మ కూడా తనకి బాగా సపోర్ట్ చేసింది. అమ్మ సహకారం ఉంటుందన్న ధైర్యంతోనే నేనూ చిత్రసీమలో అడుగుపెట్టా.
సినిమాకి ఏమేం కావాలో... వాటిపై శిక్షణ పొందా. చిన్నప్పుడే నృత్యం నేర్చుకొన్నా. నటిగా నాకు పేరొచ్చే ఎలాంటి పాత్ర అయినా చేస్తా. పాత్రకు తగ్గట్టుగా కనిపిస్తా. గ్లామరా, నటన.. అనేదానికంటే మంచి పాత్రలు, మంచి కథలే ముఖ్యం. ప్రస్తుతం తమిళంలో ఓ చిత్రంలో నటిస్తున్నా. సముద్ర దర్శకత్వం వహిస్తున్నారు. తెలుగులోనూ ఓ సినిమా చేస్తున్నా. ఒకట్రెండు సినిమాలు చర్చల దశలో ఉన్నాయి`` అంటోంది.
ఆరాధ్యకి ఇష్టమైన నటుడు ఎవరు అని అడిగితే.. `ప్రభాస్` అని చెబుతోంది. `బాహుబలికంటే ముందే.. ఈశ్వర్ సమయం నుంచే ప్రభాస్ అభిమానిని. కథానాయికల విషయానికొస్తే జయసుధగారిని బాగా ఇష్టపడతా. నా ఆల్టైమ్ ఫేవరెట్ నటి ఆమెనే`` అంటోంది.