కోడెల సూసైడ్: కన్నీళ్లు పెట్టుకొన్న చంద్రబాబు

ఏపీ మాజీ స్పీకర్ కోడెల శివప్రసాదరావు ఆత్మహత్యతో చంద్రబాబునాయుడు చలించిపోయారు.

chandrababu naidu cries after paying tribute to kodela siva prasada rao

Amaravati, First Published Sep 16, 2019, 6:04 PM IST

అమరావతి:ఏపీ అసెంబ్లీ మాజీ స్పీకర్ కోడెల శివప్రసాదరావు ఆత్మహత్యపై ఏపీ మాజీ సీఎం చంద్రబాబునాయుడు కన్నీళ్లు పెట్టుకొన్నారు. తాను ఏనాడూ ఇలా మాట్లాడాల్సి వస్తోందని చంద్రబాబునాయుడు చెప్పారు.

సోమవారం నాడు గుంటూరులోని టీడీపీ కార్యాలయంలో కోడెల శివప్రసాద్ రావు చిత్రపటానికి పూలమాలలు వేసి చంద్రబాబునాయుడు నివాళులర్పించారు.ఈ సంర్భంగా ఆయన భావోద్వేగానికి గురయ్యారు.

డాక్టర్‌గా ఉన్న వ్యక్తి ఫ్యాన్‌కు ఉరివేసుకుని చనిపోవడం ఊహించని పరిణామమన్నారు. ఎంత క్షోభకు గురైతే ఇలాంటి అఘాయిత్యానికి పాల్పడతారో ప్రజలంతా ఆలోచించాలన్నారు.ఎంత క్షోభకు గురైతే ఇలాంటి అఘాయిత్యానికి పాల్పడతారో ప్రజలంతా ఆలోచించాలని చంద్రబాబు కోరారు.

మానసిక క్షోభ, భరించలేని అవమానంతోనే కోడెల ఆత్మహత్యకు పాల్పడ్డారని చంద్రబాబు అన్నారు.మూడు నెలలుగా కోడెలను వేధింపులకు గురిచేశారని ఆరోపించారు. కోడెల టైగర్‌గా బతికాడని, భయం ఎరుగని వ్యక్తి అని.. అలాంటి వ్యక్తిని దారుణంగా వేధింపులకు గురిచేశారని చంద్రబాబునాయుడు గుర్తు చేశారు. పల్నాడు పులి అని కోడెలను కార్యకర్తలు పిలుచుకొనేవారని ఆయన గుర్తు చేశారు.

జగన్ ప్రభుత్వం అమానవీయంగా ప్రత్యర్థులపై పడుతున్నారని మండిపడ్డారు. కోడెల పోరాటయోధుడని, ఎన్ని సమస్యలు, కేసులు వచ్చినా పోరాడదామని గతంలో తనను కలిసినప్పుడు చెప్పానని అన్నారు.

ప్రభుత్వం చేస్తోన్న అవమానాలను కోడెల భరించలేకపోయారని చంద్రబాబు అభిప్రాయపడ్డారు. విచారణ, దర్యాప్తు పేరుతో వెంటాడి వేధించారని ప్రభుత్వ తీరుపై చంద్రబాబు మండిపడ్డారు.

రూపాయికే పేదలకు వైద్యం అందించిన గొప్ప వ్యక్తి అని కీర్తించారు. వైద్య వృత్తిని వదిలి ప్రజల కోసం రాజకీయాల్లోకి వచ్చారని అన్నారు. బసవతారకం క్యాన్సర్ ఆస్పత్రి ఏర్పాటులో చొరవ తీసుకున్న మొదటి వ్యక్తి కోడెల అని చెప్పారు. కోటప్పకొండ అభివృద్ధిలో కోడెల పాత్ర ఎంతో ఉందన్నారు. తెలుగుదేశం పార్టీ బలోపేతానికి కోడెల శిప్రసాద్ ఎనలేని సేవలు అందించారని గుర్తుచేసుకున్నారు.