సెంట్రల్ సీటు ఇవ్వలేదనే జగన్‌పై విమర్శలు: రాధాపై సామినేని ఫైర్

గతాన్ని ఒకసారి గుర్తు చేసుకుని నిర్ణయం తీసుకోవాలని వంగవీటి రాధను కోరారు వైసీసీ నేత సామినేని ఉదయభాను. హైదరాబాద్ వైసీపీ కేంద్ర కార్యాలయంలో మాట్లాడిన ఆయన రాధ పార్టీ మార్పు, జగన్‌పై విమర్శలపై స్పందించారు.

నాడు పీసీసీ నాయకులతో విభేదించి మరీ వైఎస్ రాజశేఖరరెడ్డి.. రంగాకి టికెట్ ఇప్పించారని ఆయన గుర్తుచేశారు. రంగా హత్య దోషులను శిక్షించాలని వైఎస్ పోరాటం చేశారన్నారు. కృష్ణాజిల్లాలో రాధను బలమైన నేతగా చేయడానికి జగన్ ఎంతో కృషిచేశారని సామినేని తెలిపారు.

రంగా విగ్రహావిష్కరణ కార్యక్రమాలకు వెళ్లేందుకు రాధకు ఎవ్వరూ అడ్డంకి చెప్పలేదన్నారు. రాష్ట్రంలో ఏ నేతకి ఇవ్వనంత ప్రాధాన్యతను జగన్.. రాధాకృష్ణకు ఇచ్చారని, కానీ దానిని వంగవీటి సరిగా ఉపయోగించుకోలేదన్నారు.

విజయవాడలో దళితులకు ఇళ్ల నిర్మాణం కోసమే రంగా ఆనాడు దీక్ష చేశారని ఉదయభాను గుర్తు చేశారు. రాధా తొందరపడ్డారని ఆవేదన వ్యక్తం చేశారు. రంగా హత్య వెనుక తెలుగుదేశం పార్టీ ఉందని రాష్ట్రం మొత్తానికి తెలుసన్నారు. ఆనాడు హంతకులు వచ్చిన బస్సుకు తెలుగుదేశం జెండాలు ఉన్నాయన్నారు.

రాధాకు జగన్ మూడు కీలకమైన పదవులు అప్పగించారని కానీ వాటిని ఆయన తన స్థాయికి తగ్గట్టుగా ఉపయోగించుకోలేక పోయారన్నారు. బెజవాడ సెంట్రల్ సీటులో పార్టీ పటిష్టతకు రాధాకృష్ణ కృషి చేయలేదని విమర్శించారు. ఆ సీటు తనకు ఇవ్వలేదనే అక్కసుతోనే జగన్‌పై రాధ ఆరోపణలు చేస్తున్నారని సామినేని అన్నారు.