జగన్‌పై వంగవీటి రాధా విమర్శలు: నాని కౌంటర్

సింహాం కడుపున పుట్టిన రాధ.. రంగా అభిమానులను బాధపడే నిర్ణయాన్ని తీసుకున్నారన్నారు వైసీపీ నేత పేర్ని నాని. వైఎస్సార్ కాంగ్రెస్ పార్టీపైనా, వైఎస్ జగన్‌పైనా వంగవీటి రాధ చేసిన ఆరోపణలకు నాని కౌంటర్ ఇచ్చారు. రాముడు లక్ష్మణుడిని చూసుకున్నట్లుగా నా గుండెల్లో పెట్టుకుని చూసుకుంటానని జగన్ ఆ రోజు చెప్పారని నాని గుర్తు చేశారు.

వంగవీటి మోహనరంగా రాజకీయాలకు అతీతమైన వ్యక్తన్నారు. రంగా విగ్రహావిష్కరణకు వెళ్లడానికి జగన్ ఏ రోజు అభ్యంతరం చెప్పలేదన్నారు. వైఎస్సార్ కాంగ్రెస్ పార్టీ యువజన విభాగం అధ్యక్షుని హోదాలో ఉన్న రాధాను పార్టీలకు అతీతంగా రంగా అభిమానులు పలు కార్యక్రమాలకు ఆహ్వానిస్తారన్నారు.

అయితే ఆయా నియోజకవర్గాల్లో పర్యటనలకు వెళ్లేముందు వైసీపీ నేతలను కలవాలని జగన్ చెప్పారని నాని తెలిపారు. అంతే తప్పించి రంగా విగ్రహావిష్కరణ కార్యక్రమాలకు తన అనుమతి తీసుకుని వెళ్లాలని జగన్ ఏ రోజు చెప్పలేదన్నారు.

రంగా హత్యకు టీడీపీకి సంబంధం లేదని రాధ చెప్పడం సరికాదన్నారు. రంగాను హత్య చేయించింది తెలుగుదేశం పార్టీ నేతలేనని మారుమూల ప్రాంతాల్లో ఎవరిని అడిగినా చెబుతారని నాని వెల్లడించారు. రాధకు విలువనివ్వకపోయుంటే దేవినేని నెహ్రూ చేరి వుండే వారని ఆయన తెలిపారు. చంద్రబాబు ట్రాప్‌లో పడొద్దని రాధాకు పేర్నినాని సూచించారు.