తాజా వార్తలు

వైఎస్సార్ నవోదయ పథకం ద్వారా రాష్ట్రంలో నిరుద్యోగితను మరింత తగ్గించే ప్రయత్నం చేస్తున్నట్లు ఆర్థిక మంత్రి బుగ్గన వెల్లడించారు. అందుకోసమే సీఎం జగన్ ప్రత్యేకంగా శ్రద్ద చూపించి ఈ పథకాన్ని ప్రారంభించారని అన్నారు. రాష్ట్ర ఆర్థిక బలోపేతం కోసమే ఈ  వైఎస్సార్ నవోదయ స్కీమ్ ను ప్రభుత్వం తీసుకొచ్చిందన్నారు. జిడిపిలో వాటా కలిగిన 8 శాతం ఎగుమతుల్లో దాదాపు  40శాతం ఎంఎస్ఎంఈ ద్వారానే  జరుగుతోందన్నారు.

గాంధీజీ సంకల్పయాత్రలో భాగంగా గురువారం ఉదయం కృష్ణాజిల్లా నూజివీడు లో రాజ్యసభ సభ్యుడు సుజనా చౌదరి నాయకత్వంలో పాదయాత్ర నిర్వహించారు. స్థానిక సబ్ కలెక్టర్ కార్యాలయం నుంచి గాంధీజీ సంకల్ప పాదయాత్ర ప్రారంభమైంది. జంక్షన్ రోడ్డులోని యస్ కన్వెన్షన్ హాలులో నాయకులు కార్యకర్తలతో సమావేశం నిర్వహించారు.ఈ సందర్బంగా సుజనాచౌదరి మాట్లాడుతూ గాంధీ గారి ఆశయాలను ప్రజలు మర్చిపోతున్నారని అందుకే ప్రధాని నరేంద్రమోడీ ఆదేశాలమేరకు గాంధీజీ సంకల్ప యాత్ర మొదలపెట్టినట్లు చెప్పారు. ఈ కార్యక్రమంలో ఏలూరు పార్లమెంట్ ఇంచార్జి చిన్నం రామకోటయ్య, జిల్లా మండల నాయకులు పాల్గొన్నారు

ఉరుములు, మెరుపులతో కూడిన భారీ వర్షం కారణంగా గురువారం హుజూర్ నగర్ లో జరగాల్సిన ముఖ్యమంత్రి కేసీఆర్ బహిరంగ సభ క్యాన్సిల్ అయ్యింది. భారీ వర్షం కారణంగా హెలికాప్టర్ అక్కడ దిగలేదని విమానయానశాఖ అభ్యంతరం వ్యక్తం చేసింది. ముఖ్యమంత్రి కేసీఆర్ వెళ్లాల్సిన హెలికాప్టర్ కి క్లియరెన్స్ ఇవ్వకపోవడంతో భారీ బహిరంగసభ క్యాన్సిల్ అయ్యింది.

ఆర్టీసీ సమ్మె ప్రత్యామ్నాయంగా నియమించిన టెంపరరీ డ్రైవర్ల ఆగడాలు రోజురోజుకూ మితిమీరిపోతున్నాయి. సమ్మె మొదలయినప్పటి నుండి నిత్యం రోజు రెండు మూడు ఆక్సిడెంట్ లు జరుగుతున్నాయి. తాజా గా ఈ రోజు యూసుఫ్ గూడ చెక్ పోస్ట్ వద్ద టెంపరరీ డ్రైవర్ ఓ కారుకు యాక్సిడెంట్ చేశాడు.

అయోధ్య కేసులో వాదనలు పూర్తయ్యాయి. రామ జన్మభూమి- బాబ్రీ మసీదుకి సంబంధించిన భూ వివాదంపై సుప్రీమ్ కోర్టులో వాదనలు పూర్తయ్యాయి. తుది తీర్పును నవంబర్ 15న వెల్లడించనుంది. ఈ నేపథ్యంలో శ్రీశ్రీ రవిశంకర్, ఖలీఫుల్లా, శ్రీరామ్ పాంచు లతో గతంలో సుప్రీమ్ ఏర్పాటు చేసిన కమిటీ తన నివేదికను కూడా నిన్న సుప్రీమ్ కోర్టుకు సమర్పించింది.

మాజీ ఎంపీ పొంగులేటి శ్రీనివాసరెడ్డి ఆధ్వర్యంలో కల్లూరు మండలం నారాయణపురం లో నిర్వహిస్తున్న"సహస్ర చండీయాగం' చివరి పూర్ణాహుతికి వెడుతూ టీటీడీ ఛైర్మన్ వైవీ సుబ్బారెడ్డి తిరువూరు ఎమ్మెల్యే కార్యాలయం దగ్గర కాసేపు ఆగారు. ఆయనకు ఎమ్మెల్యే కొక్కిలిగడ్డ రక్షణనిధి, పార్టీ శ్రేణులు ఘనస్వాగతం పలికారు. అనంతరం  టీటీడీ ఛైర్మన్ వైవీ సుబ్బారెడ్డి, ఎమ్మెల్యే రక్షణనిధి చండియగానికి హాజరయ్యారు.

కృష్ణానది కరకట్ట వెంట ఉన్న శైవక్షేత్రం అమీలో అక్రమంగా నిర్మించిన బాత్ రూమ్స్, క్యాంటీన్లను కూల్చివేశారు. అమరావతి, తుళ్లూరు మండలం తాళ్లాయపాలెం గ్రామంలో ఈ అక్రమనిర్మాణాలను CRDA అసిస్టెంట్ డైరెక్టర్ మధుసూదనరావు ఆధ్వర్యంలో 10 మంది లేబర్స్ తో అక్రమ నిర్మాణాలను అధికారులు కూల్చివేశారు.

విశాఖ జిల్లా భీమిలీ భీచ్ లో ముఖ్యమంత్రి జగన్, మంత్రి అవంతీ శ్రీనివాసరావుల బొమ్మలకు మత్స్యకారులు పాలాభిషేకం చేశారు. మత్స్యకారుల వేట నిషేధం పరిష్కారం 4000 నుండి 10000 లకు ప్రభుత్వం పెంచడం పై మత్స్యకారులు హర్షం వ్యక్తం చేసారు. పాలాభిషేకం అనంతరం ర్యాలీ   నిర్వహించారు.  

తెలంగాణ ముఖ్యమంత్రి, టీఆర్ఎస్ అధినేత కేసీఆర్ సభ రద్దయ్యింది. మధ్యాహ్నం నుంచి భారీ వర్షం కురుస్తోంది. ఎంతకు వాన తెరిపినివ్వకపోవడంతో సభను రద్దు చేయాలని టీఆర్ఎస్ నేతలు నిర్ణయం తీసుకున్నట్లు తెలుస్తోంది. వర్షం కారణంగా సభా వేదిక చిత్తడిగా మారిపోయింది.

గుంటూరు జిల్లా అచ్చంపేట లో భవననిర్మాణ కార్మికులు ‘రావాలి ఇసుక కావాలి ఇసుక’ నినాదంతో ర్యాలీ నిర్వహించారు. ఇసుక లేక ఉపాధి కోల్పోయిన కార్మికులకు పదివేల రూపాయలు కరువు భృతి అందజేయాలని వారు తహసీల్దార్ గారికి అర్జీలు అందజేశారు.