IRCTC గోదావరి టెంపుల్ టూర్: అంతర్వేది, అన్నవరం, ద్రాక్షారామ క్షేత్రాల దర్శనం.. బడ్జెట్‌లో ఇవి ఫ్రీ

IRCTC Godavari Temple Tour: ఐఆర్‌సీటీసీ 3 రాత్రులు, 4 రోజుల గోదావరి టెంపుల్ ప్యాకేజీని ప్రారంభించింది. అన్నవరం, అంతర్వేది, ద్రాక్షారామ దర్శనం కోసం తీసుకొచ్చిన ఈ సూపర్ టూర్ ప్యాకేజీ పూర్తి వివరాలు ఇక్కడ తెలుసుకుందాం.

Image Credit : Gemini

అన్నవరం నుంచి ద్రాక్షారామం వరకు.. IRCTC గోదావరి ప్యాకేజీ పూర్తి వివరాలు ఇవే

ఐఆర్‌సీటీసీ సౌత్ సెంట్రల్ జోన్ భక్తుల కోసం ఒక అద్భుతమైన ఆఫర్‌ను అందుబాటులోకి తెచ్చింది. "గోదావరి టెంపుల్ టూర్" (ప్యాకేజీ కోడ్: SHR029) పేరుతో 3 రాత్రులు, 4 రోజుల ప్రత్యేక ప్యాకేజీని తీసుకొచ్చింది. ఈ ప్యాకేజీ ద్వారా అన్నవరం, కోనసీమ, రాజమండ్రి, అంతర్వేది, పంచారామ క్షేత్రమైన ద్రాక్షారామం వంటి శక్తివంతమైన దివ్య క్షేత్రాలను సందర్శించవచ్చు.

ద్రాక్షారామం అంటే దక్ష ప్రజాపతి నివాస స్థలం. ఈ క్షేత్రంలో కొలువైన భీమేశ్వర స్వామి పంచారామాలలో అత్యంత శక్తివంతమైన శివుని రూపంగా భావిస్తారు. ప్రతి శుక్రవారం ప్రారంభమయ్యే ఈ ప్యాకేజీకి సంబంధించిన పూర్తి షెడ్యూల్, టికెట్ ధరలు, రూల్స్ వివరాలు గమనిస్తే..

Image Credit : ANI

ఐఆర్‌సీటీసీ గోదావరి టూర్ షెడ్యూల్ ఇదే

ఐఆర్‌సీటీసీ గోదావరి టూర్ ప్యాకేజీలో రైలు ప్రయాణంతో పాటు ఏసీ వాహనాల్లో స్థానిక క్షేత్రాల సందర్శన సౌకర్యాన్ని కల్పించారు.

డే 1 (శుక్రవారం): లింగంపల్లి రైల్వే స్టేషన్ నుంచి రాత్రి 20:30 గంటలకు, సికింద్రాబాద్ నుంచి రాత్రి 21:15 గంటలకు రైలు నంబర్ 12738 (గౌతమి ఎక్స్‌ప్రెస్) ద్వారా ప్రయాణం ప్రారంభమవుతుంది. రాత్రికి రైలులోనే ప్రయాణం ఉంటుంది.

డే 2 (శనివారం): ఉదయం 04:38 గంటలకు రాజమండ్రి రైల్వే స్టేషన్‌కు చేరుకుంటారు. అక్కడి నుంచి హోటల్‌కు వెళ్లి ఫ్రెషప్ అయిన తర్వాత అన్నవరం ప్రయాణమవుతారు. సాయంత్రం తిరిగి రాజమండ్రి వచ్చి గోదావరి ఘాట్, ఇస్కాన్ టెంపుల్ సందర్శిస్తారు. రాత్రికి రాజమండ్రిలోనే బస ఉంటుంది.

డే 3 (ఆదివారం): హోటల్ చెకౌట్ చేసి అంతర్వేది బయలుదేరుతారు. అక్కడ లక్ష్మీ నరసింహస్వామి ఆలయం, బీచ్‌ను సందర్శిస్తారు. అనంతరం అప్పనపల్లి శ్రీ బాల బాలాజీ ఆలయం, ఐనవిల్లి విఘ్నేశ్వర ఆలయం, ద్రాక్షారామం ఆలయాన్ని దర్శిస్తారు. సాయంత్రం రాజమండ్రి రైల్వే స్టేషన్‌లో రాత్రి 20:18 గంటలకు రైలు నంబర్ 12737 (గౌతమి ఎక్స్‌ప్రెస్) ఎక్కుతారు.

డే 4 (సోమవారం): ఉదయం 04:35 గంటలకు సికింద్రాబాద్, 05:55 గంటలకు లింగంపల్లి చేరుకోవడంతో టూర్ పూర్తవుతుంది.

Image Credit : ANI

ఐఆర్‌సీటీసీ గోదావరి టూర్ ప్యాకేజీ ఛార్జీలు

ఈ ప్యాకేజీ ధరలు ప్రయాణికుల సంఖ్య, కేటగిరీ ఆధారంగా ఉంటాయి.

ఒకరి నుంచి ముగ్గురు ప్రయాణికులు:

• కంఫర్ట్ (3AC): సింగిల్ షేరింగ్ రూ. 15,400, ట్విన్ షేరింగ్ రూ. 8,990, ట్రిపుల్ షేరింగ్ రూ. 7,230. చైల్డ్ విత్ బెడ్ (5-11 ఏళ్లు) రూ. 6,140, చైల్డ్ విత్ అవుట్ బెడ్ (5-11 ఏళ్లు) రూ. 5,020.

• స్టాండర్డ్ (SL): సింగిల్ షేరింగ్ రూ. 13,840, ట్విన్ షేరింగ్ రూ. 7,430, ట్రిపుల్ షేరింగ్ రూ. 5,670. చైల్డ్ విత్ బెడ్ రూ. 4,580, చైల్డ్ విత్ అవుట్ బెడ్ రూ. 3,460.

నలుగురి నుంచి ఆరుగురు ప్రయాణికులకు (గ్రూప్):

• కంఫర్ట్ (3AC): ట్విన్ షేరింగ్ రూ. 7,490, ట్రిపుల్ షేరింగ్ రూ. 6,680. చైల్డ్ విత్ బెడ్ రూ. 6,140, చైల్డ్ విత్ అవుట్ బెడ్ రూ. 5,020.

• స్టాండర్డ్ (SL): ట్విన్ షేరింగ్ రూ. 5,930, ట్రిపుల్ షేరింగ్ రూ. 5,120. చైల్డ్ విత్ బెడ్ రూ. 4,580, చైల్డ్ విత్ అవుట్ బెడ్ రూ. 3,460.

Image Credit : Asianet News

ఐఆర్‌సీటీసీ గోదావరి టూర్ రూల్స్ ఇవే

మొత్తం సీట్ల కోటాలో స్లీపర్ నాన్-ఏసీ 06, 3AC 06 సీట్లు అందుబాటులో ఉంటాయి. హోటల్ చెక్-ఇన్ సమయం మధ్యాహ్నం 12 గంటలు. ఆన్‌లైన్ టిక్కెట్‌లు ప్రయాణానికి 4 రోజుల ముందు జారీ అవుతాయి. సీట్ల కేటాయింపు సెంట్రలైజ్డ్ పద్ధతిలో జరుగుతుంది కాబట్టి బెర్త్ మార్పులు కుదరవు. రైలు ఆలస్యం లేదా ప్రయాణికుల నిర్లక్ష్యం వల్ల దర్శనం/సేవలు కోల్పోతే ఐఆర్‌సిటిసి బాధ్యత వహించదు.

Image Credit : ANI

క్యాన్సిలేషన్ నిబంధనలు

టికెట్ రద్దు చేయాలనుకుంటే www.irctctourism.com వెబ్‌సైట్ ద్వారా మాత్రమే రద్దు చేసుకోవాలి. ప్రయాణానికి 15 రోజుల ముందు రద్దు చేస్తే రూ. 250 మినహాయిస్తారు. 8-14 రోజుల ముందు రద్దు చేస్తే 25%, 4-7 రోజుల ముందు రద్దు చేస్తే 50% రుసుము కట్ చేస్తారు. 4 రోజుల కంటే తక్కువ సమయంలో రద్దు చేస్తే ఎలాంటి రీఫండ్ లభించదు. బుకింగ్ కోసం సికింద్రాబాద్‌లోని ఐఆర్‌సీటీసీ ఆఫీస్‌ను సంప్రదించవచ్చు లేదా 8287932229 / 8287932228 / 9701360701 ఫోన్ నంబర్లకు కాల్ చేసి వివరాలు తెలుసుకోవచ్చు.