“ధృవ” మూవీ రివ్యూ జోనర్- యాక్షన్ థ్రిల్లర్ ధృవ రిలీజ్ డేట్: డిసెంబర్ 9, 2016 దర్శకత్వం : సురేందర్ రెడ్డి నిర్మాతలు : అల్లు అరవింద్, ఎన్.వి.ప్రసాద్ నటీనటులు : రామ్ చరణ్, అరవింద్ స్వామి, రకుల్ ప్రీత్.. సంగీతం : హిపాప్ తమిజా

కథ :

ధృవ (రామ్ చరణ్), అతని స్నేహితులు ఐపీఎస్ ట్రైనింగ్ లో ఉండగానే ఎవరికీ తెలీకుండా సిటీలో జరిగే చిన్నపాటి క్రైమ్స్ ని అరికడుతూ నేరస్థుల్ని పోలీసులకు పట్టుబడేలా చేస్తుంటారు. అలా వాళ్ళు పోలీసులకు అప్పగించిన నేరస్తుల్లో ఒకడు సులభంగా తప్పించుకుని బయట తిరగడం గమనించిన ధృవ, అతని స్నేహితులు అదంతా ఎలా జరిగింది అని ఆలోచిస్తుండగానే ధృవ ఎన్నాళ్లగానో తను రీసెర్చ్ చేస్తున్న ఒక అంశం గురించి చెప్తాడు. దాన్ని సాల్వ్ చేస్తే ఈ చిన్న చిన్న నేరాలన్నింటికీ కారణమైన పెద్ద క్రిమినల్ ను అంతం చేయొచ్చని, అదే తన గోల్ అని చెప్పి ఆ క్రిమినల్ కోసం వేట మొదలు పెడతాడు ధృవ.

తన గోల్ రీచ్ అయ్యేందుకు నేరస్థున్ని వెతుకుతున్న ధృవకు అనుకోకుండా సిద్దార్థ అభిమన్యు (అరవింద స్వామి) అనే సైంటిస్ట్ తో గొడవ మొదలవుతుంది. అసలు సిద్దార్థ అభిమన్యు ఎవరు? అతని బ్యాక్ గ్రౌండ్ ఏంటి ? అతనికి, ధృవకి మధ్య ఫైట్ ఎందుకు మొదలైంది ? అది ఎలా సాగింది ? ఆ ఫైట్ లో చివరికి ఎవరు, ఎలా గెలిచారు ? అన్నదే మిగతా స్టోరీ.

ప్లస్ పాయింట్స్ :

ఈ సినిమాకు మేజర్ ప్లస్ పాయింట్ కథ. కథతో పాటు ఆ కథ చుట్టూ బలంగా అల్లిన స్రీన్‌ప్లే. ఒక పెద్ద క్రిమిన‍ల్‌ను పడితే, చిన్న చిన్న క్రిమినల్స్ అంతమవుతారంటూ, ఆ పెద్ద క్రిమినల్‍తోనే హీరో పోరాడడం ఇంట్రెస్టింగ్ పాయింట్. హీరో-విలన్‌ మధ్య జరిగే మైండ్‌గేమ్ మంచి కిక్ ఇచ్చింది. రామ్ చరణ్.. పోలీస్ ఆఫీసర్ ధృవ పాత్రలో అద్భుతంగా నటించాడు. ముఖ్యంగా ఆ పాత్ర కోసం ఎంతోకష్టపడి బిల్డ్ చేసిన ఫిజిక్‌తో చరణ్ ప్రెజెన్స్ బాగుంది. నటనపరంగానూ ఈ సినిమాతో చరణ్ మరో స్థాయికి వెళ్ళాడనే చెప్పాలి. చాన్నాళ్లకు తనకు సూటయ్యే సీరియస్ తరహా కథను చరణ్ ఎంచుకున్నాడు.

ఇక విలన్ రోల్ సిద్ధార్థ్ అభిమన్యుగా నటించిన అరవింద్ స్వామి పాత్రలో వేరొకరిని ఊహించుకోలేం అన్నట్టుగా నటించాడాయన. చిన్న చిన్న ఎక్స్‌ప్రెషన్స్‌ని కూడా చాలా జాగ్రత్తగా, తెలివిగా పలికించడంలో అరవింద్ స్వామి నటన సినిమాకే మేజర్ హైలైట్స్ లో ఒకటి. గతంలో క్రేజీ హీరోల్లో ఒకరైన ఆయన, ఇలా ఒక ఇంట్రెస్టింగ్ రోల్‌తో మళ్ళీ తెలుగు తెరకు పరిచయమవ్వడం ధృవ సినిమాకు కలిసొచ్చింది. రకుల్ ప్రీత్ కూడా తన పాత్ర పరిధిమేరకు చాలా బాగా నటించింది. పరేషానురా అన్న పాటలో చేసిన గ్లామర్ షో కనులవిందు అనే చెప్పాలి.

సినిమా పరంగా చూసుకుంటే పోలీస్ ట్రైనింగ్, విలన్ ఇంట్రడక్షన్, ఇంటర్వెల్ ట్విస్ట్, కథలోని అసలైన ఎలిమెంట్‌ను చివరివరకూ థ్రిల్లింగ్‌గా నడపడం, తెలుగు సినిమా స్టైల్‌కు భిన్నంగా ఉండే క్లైమాక్స్, సిట్యుయేషనల్ సాంగ్స్, సురేందర్ రెడ్డి స్టైలిష్ మేకింగ్ ఇలా చాలా ప్లస్‌లే ఉన్నాయి సినిమాకు.

మైనస్ పాయింట్స్ :

సెకండాఫ్ కొన్నిచోట్ల కథనం నెమ్మదిగా సాగినట్లనిపించింది. ఇక్కడ కూడా సస్పెన్స్‌ బాగానే అందుకున్నా చాలా చోట్ల సినిమా నెమ్మదిగా కదిలింది. రెండున్నర గంటలకు పైనే ఉన్న రన్‌టైమ్ కూడా కాస్త ఎక్కువనే చెప్పాలి. సెకండాఫ్ కాస్త తగ్గించి నేటివిటీకి తగ్గట్టుగా స్క్రీన్ ప్లే స్పీడ్ కాస్త పెంచితే బాగుండేది. ఇక కథలో అక్కడక్కడా వచ్చే కొన్ని లాజిక్స్ సరైనవే అయినా సామాన్య ప్రేక్షకులకి వెంటనే అర్థం కాకపోవచ్చు.

టెక్నికల్ డిపార్ట్ మెంట్:

దర్శకుడు సురేందర్ రెడ్డి తమిళంలో ఘన విజయం సాధించిన కథను, పెద్దగా మార్పులేవీ చేయకుండా, ఇక్కడి ప్రేక్షకులకు తగ్గట్టుగా స్టైలిష్ గా తనదైన మార్క్ కనిపించేలా సన్నివేశాలను మార్చుకొని రాసిన స్క్రీన్‌ప్లే చాలా బాగుంది. తమిళ వర్షన్ చూసిన వారికి కూడా ఈ సినిమా నచ్చేలా చేయడంలో సురేందర్ రెడ్డి సక్సెస్ అయి మరో అడుగు ముందుకేశాడని చెప్పొచ్చు. ఇక మేకింగ్ పరంగా సురేందర్ రెడ్డి ఎప్పట్లానే తన బ్రాండ్‌ను మరొకసారి చాటుకున్నారు. అందరూ సురేందర్‌ను స్టైలిష్ ఫిల్మ్‌మేకర్ అని ఎందుకంటారో ఈ సినిమా చూసి తెలుసుకోవచ్చు.

ఇక పీ.ఎస్.వినోద్‌కు ఇప్పుడున్న సినిమాటోగ్రాఫర్స్‌లో తనదైన మార్క్ సృష్టించుకున్నవారిగా పేరుంది. ఆయన తనదైన ఫ్రేమింగ్, లైటింగ్ వాడుతూ తెలుగు సినిమా స్థాయి పెంచే విజువల్స్ అందించాడనే చెప్పాలి. హిపాప్ థమిజా అందించిన పాటలు ఫర్వాలేదనేలానే ఉన్నా, బ్యాక్‌గ్రౌండ్ స్కోర్ మాత్రం ఓ రేంజ్‌లో ఉంది. ఎడిటింగ్ బాగుంది. యాక్షన్ కొరియోగ్రఫీని అభినందించకుండా ఉండలేం. ఇక గీతా ఆర్ట్స్ ప్రొడక్షన్ వ్యాల్యూస్‌కు వంక పెట్టడానికి లేదు.

చివరగా :

‘తనీ ఒరువన్’ కి రీమేక్ గా వచ్చిన ధృవ చిత్రం రామ్ చరణ్ కెరీర్లో ఒక మంచి చిత్రంగా నిలుస్తుంది. సినిమా కథ, బోల్డ్ గా, ఇంటలిజెంట్ గా సాగే ఫస్టాఫ్, సెకండాఫ్ కథనాలు, బ్యాక్ గ్రౌండ్ స్కోర్, అరవింద స్వామి, రామ్ చరణ్ ల నటన, సురేందర్ రెడ్డి స్టైలిష్ మేకింగ్ సినిమాకి మేజర్ ప్లస్ పాయింట్స్ కాగా, సెకండాఫ్ కథనం కాస్త నెమ్మదిగా అనిపించడం, అయినా సామాన్య ప్రేక్షకులకు త్వరగా ఎక్కని కొన్ని లాజిక్స్ సినిమాలోని మైనస్ పాయింట్స్. మొత్తం మీద చూస్తే రామ్ చరణ్ లాంటి ఒక స్టార్ హీరో కెరీర్లోని కీలక సమయంలో ఎంచుకోవలసిన సరైన కథనే ఎంచుకుని జాగ్రత్తగా తెరకెక్కించిన ఈ యాక్షన్ థ్రిల్లర్ ప్రేక్షకులను ఖచ్చితంగా మెప్పిస్తుంది.

ఏసియానెట్ రేటింగ్: 3.5/5