మెగా హీరోల్లో అల్లు అర్జున్ స్థానం ప్రత్యేకమైనది. సౌత్ సినీ పరిశ్రమలో బన్నీకి స్టైలిష్ స్టార్ అనే బిరుదు కూడా ఉంది. ఎప్పటికప్పుడు డ్రెసింగ్, డాన్సులు, లుక్స్, యాక్టింగ్ అన్నింటిలోనూ కొత్త కొత్త స్టైల్స్ క్రియేట్ చేసే బన్నీ యూత్ కి ఒక ఫ్యాషన్ ఐకాన్. తనకు తెలుగులోనే గాక కర్ణాటక, కేరళ, తమిళనాడులో సైతం మరే తెలుగు హీరోకి లేని క్రేజ్, మార్కెట్ ఉన్నాయి. మలయాళం ప్రేక్షకులైతే అల్లు అర్జున్ ను ప్రేమగా మల్లు అర్జున్ అని పిలుచుకుంటారు. అంతటి ఫాలోయింగ్ ఉన్న ఈ మెగా హీరో తాజాగా కొత్త రికార్డ్ ని సొంతం చేసుకున్నాడు. ట్విట్టర్ లో మిలియన్ మార్క్ దాటిన అల్లు అర్జున్ డీజే సినిమాలో పంచె కట్టుతో అదరగొడతాడట..
స్టార్ హీరోల్లో వరుస సక్సెస్ లతో దూసుకుపోతున్న హీరో అల్లు అర్జున్. ‘రేసు గుర్రం, సన్ ఆఫ్ సత్యమూర్తి, సరైనోడు’ వంటి చిత్రాలతో బన్నీ మార్కెట్, ఇమేజ్ అమాంతం పెరిగిపోయాయి. ప్రస్తుతం ఈ స్టైలిష్ స్టార్ చేస్తున్న తాజా చిత్రం ‘దువ్వాడ జగన్నాథం’. హరీష్ శంకర్ ఈ సినిమాని డైరెక్ట్ చేస్తున్నాడు. ఎప్పటికప్పుడు తన ప్రతి సినిమాలో సరికొత్త స్టైల్ తో ఆకట్టుకునే బన్నీ ఈ సినిమాలో ఒక బ్రాహ్మణ కుటుంబానికి చెందిన యువకుడి గెటప్ లో పంచె కట్టులో సాంప్రదాయబద్దంగా కనిపిస్తాడట.
అందుకోసం బన్నీ ఇప్పటికే ఆ స్టైల్ ను వంటపట్టించుకోవడానికి ప్రాక్టీస్ కూడా చేస్తున్నాడట. ఈ గెటప్ తో పాటు మాస్ లుక్ తో మరో గెటప్ లో కూడా బన్నీ అలరిస్తాడని తెలుస్తోంది. దీన్నిబట్టి హరీష్ శంకర్ రూపొందిస్తున్న ఈ యాక్షన్ ఎంటర్టైనర్ లో ఎంటర్టైన్మెంట్ కి ఏమాత్రం కొదవుండదని తెలుస్తోంది. ఇకపోతే ఈ మధ్యే షూటింగ్ మొదలైన ఈ చిత్రంలో బన్నీకి జోడీగా పూజా హెగ్డే నటిస్తోంది. శ్రీ వెంకటేశ్వర క్రియేషన్స్ బ్యానర్ పై దిల్ రాజు నిర్మిస్తున్న ఈ చిత్రానికి దేవి శ్రీ సంగీతం అందిస్తుండగా, ఆయాంకా బోస్ సినిమాటోగ్రఫీ అందిచనున్నారు.
ఇక తాజాగా అల్లు అర్జున్ ట్విట్టర్ అకౌంట్ ఫాలోవర్స్ సంఖ్య 1 మిలియన్ కి చేరుకుంది. మిలియన్ ఫాలోవర్స్ ని సంపాదించడం అంటే మామూలు విషయం కాదు. ఒక్క తెలుగులోనే గాక ఇతర భాషల్లో, పరిశ్రమల్లో ఫాలోయింగ్ ఉండబట్టే బన్నీకి ఈ ఘనత దక్కింది. దీంతో బన్నీ కూడా తనను మిలియన్ మార్క్ టచ్ చేసేలా చేసిన అభిమానవులకు థ్యాంక్స్ చెప్పాడు. ప్రస్తుతం హరీష్ శంకర్ డైరెక్షన్లో ‘దువ్వాడ జగన్నాథం’ చిత్రంలో నటిస్తున్న బన్నీ లింగుస్వామి దర్శకత్వంలో ఒక ద్విభాషా చిత్రాన్ని చేయనున్నాడు.
