హైదరాబాద్ కు చేరుకున్న టీమిండియా క్రికెటర్లు... రేపే ఉప్పల్ లో తొలి వన్డే

హైదరాబాద్ : ఇండియా - న్యూజిలాండ్ జట్ల మధ్య వన్డే సీరిస్ హైదరాబాద్ లో ప్రారంభంకానుంది. ఉప్పల్ లోని అంతర్జాతీయ క్రికెట్ స్టేడియంలో జరగనున్న తొలి వన్డే కోసం ఇండియన్ క్రికెట్ టీం హైదరాబాద్ కు చేరుకుంది. సోమవారం సాయంత్రమే రోహిత్ శర్మ సారథ్యంలోని ఇండియన్ టీం శంషాబాద్ విమానాశ్రయానికి చేరుకుంది. దీంతో తమ అభిమాన క్రికెటర్లను చూసేందుకు అభిమానులు ఎగబడ్డారు. విమానాశ్రయం నుండి భారీ బందోబస్తు మధ్య ప్రత్యేక బస్సులో క్రికెటర్లంతా పార్క్ హయత్ కు చేరుకున్నారు. రేపు (బుధవారం) ఉప్పల్ స్టేడియంలో న్యూజిలాండ్ తో ఆతిథ్య ఇండియన్ టీం తలపడనుంది. ఈ ఏడాదే వన్డే ప్రపంచకప్ జరగనున్న నేపథ్యంలో ఈ సీరిస్ ను ఇరుజట్లు ప్రతిష్టాత్మకంగా తీసుకున్నాయి. స్వదేశంలో వన్డే సీరిస్ గెలిచి సత్తా చాటాలని టీమిండియా, రోహిత్ సేనను చిత్తుచేయాలన్న న్యూజిలాండ్ టీం ముమ్మర ప్రాక్టీస్ చేస్తున్నాయి.