కేసీఆర్‌కు షాక్: గజ్వేల్ ఎస్ఐలపై హైకోర్టు ఆదేశాలు

ఉమ్మడి మెదక్ జిల్లాలోని గజ్వేల్ అసెంబ్లీ నియోజకవర్గం పరిధిలోని ఇద్దరు ఎస్ఐల తీరుపై హైకోర్టు ఆగ్రహం వ్యక్తం చేసింది. 

ములుగు ప్రజా ఆశిర్వాద సభ

గజ్వేల్: ఉమ్మడి మెదక్ జిల్లాలోని గజ్వేల్ అసెంబ్లీ నియోజకవర్గం పరిధిలోని ఇద్దరు ఎస్ఐల తీరుపై హైకోర్టు ఆగ్రహం వ్యక్తం చేసింది. డిసెంబర్ 3వ తేది నాటికి ఈ విషయమై వివరణ ఇవ్వాలని రాష్ట్ర ఎన్నికల సంఘాన్ని, పోలీసు శాఖను హైకోర్టు ధర్మాసనం ఆదేశించింది.

గజ్వేల్ అసెంబ్లీ నియోజకవర్గ పరిధిలో పోలీసులు అధికార టీఆర్ఎస్ కు అనుకూలంగా వ్యవహరిస్తున్నారని ఆరోపిస్తూ కాంగ్రెస్ పార్టీ నేత బొల్లారం ఎల్లయ్య హైకోర్టులో పిటిషన్ దాఖలు చేశారు. ఈ పిటిషన్‌పై హైకోర్టు ధర్మాసనం రాష్ట్ర ఎన్నికల అధికారులను, రాష్ట్ర పోలీసు శాఖను వివరణ కోరింది.

హైకోర్టు చీఫ్ జస్టిస్ టీ.బీ. రాధాకృష్ణన్, జస్టిస్ ఎస్వీ భట్టులతో కూడిన ధర్మాసనం ఈ మేరకు శుక్రవారం నాడు ఆదేశాలు జారీ చేసింది.
గజ్వేల్ అసెంబ్లీ సెగ్మెంట్ నుండి తెలంగాణ అపద్ధర్మ సీఎం కేసీఆర్ పోటీ చేస్తున్నారు. గత ఎన్నికల్లో కూడ ఇదే స్థానం నుండి కేసీఆర్ పోటీ చేసి విజయం సాధించారు.

కేసీఆర్ పోటీ చేస్తున్నందున అధికార పార్టీకి అనుకూలంగా పోలీసులు వ్యవహరిస్తున్నారని కాంగ్రెస్ పార్టీ నేతలు హైకోర్టును ఆశ్రయించారు.గత మూడేళ్ల నుండి ఈ ఇద్దరు ఎస్ఐలు అదే ప్రాంతంలో పనిచేస్తున్నారని కాంగ్రెస్ నేతలు గుర్తు చేస్తున్నారు. 

అధికార పార్టీకి అనుకూలంగా ఇతర పార్టీ నేతలను, కార్యకర్తలను ఈ ఇద్దరు ఎస్ఐలు ఇబ్బందులకు గురి చేస్తున్నారని కాంగ్రెస్ పార్టీ నేతలు ఆరోపించారు. ఈ పిటిషన్‌ను విచారించిన హైకోర్టు ధర్మాసనం సోమవారం నాటికి తమ వివరణను ఇవ్వాలని ఎన్నికల సంఘం అధికారులను, పోలీసు శాఖను ఆదేశించింది.

సంబంధిత వార్తలు