ఏనుగు నరసింహారెడ్డి కవిత: రాలక ముందటిపూలు
పూల రాలక ముందు అంటూ ప్రముఖ కవి ఏనుగు నరసింహా రెడ్డి అంటున్నారు. ఆయన రాసిన కవితను ఇక్కడ చదవండి.
 )
Followఇన్నాళ్ళుగా
నడిచీ నడిచీ
ఇప్పుడు దారితప్పుతరు
పిల్లల్లాగే అమ్మలు
అర్థం లేకుండా మాట్లాడుతరు
అదే తొవ్వలో
ప్రయాణం చేస్తూ
చేరాల్సిన గమ్యం
యాదిమరుస్తరు
పిల్లలు
నచ్చిన పదం
వల్లించినట్లే
అమ్మలు పదేపదే
చెప్పిందే చెబుతుంటరు
కనిపించని కాలం
లొంగదీసుకున్నట్లు
నిన్న కనిపించిన దృశ్యం
క్రమంగా మసకబారుతుంటది
పిల్లల్లాగే అమ్మలు
అల్లరి చేస్తుంటరు
ఎన్నో నడిపించిన లోకంలో
ఏదీ నడిపించలేని సంగతి
వాళ్ళకసలే అర్థంకాదు
ప్లిల్లాగే అమ్మలు
ఇల్లంతా తామే
ఐపోతరు
అప్పటి నుండీ
తనచుట్టే తిరిగిన ఇల్లు
ఇప్పుడు మాత్రం
తిరగదా అని
వాళ్ళ గోల
పిల్లల్లాగే అమ్మలు
పిచ్చిపిచ్చి చేస్తుంటరు
ఎక్కడో మొదలుపెట్టి
ఎక్కడనో తేలే
తెల్లారగట్ల బాలసంతు కథలా
పిల్లల్లాగే అమ్మలు
మనకసలే పట్టని ముచ్చట్లు
వల్లెవేస్తుంటరు.
పుట్టక ముందటి
లోకం నుండి తెచ్చిన
సందేశం పిల్లల్ని
అలా తీరుస్తుంది
తర్వాత వెళ్ళాల్సిన
లోకాల మీది మోజు
అమ్మల్నలా మారుస్తుంది
పిల్లలు
ఎంతగోల చేసినా
ముద్దే
మారాం ఎక్కువైతే
చంకనేసుకొని
గుండె కద్దుకుంటాం
పిల్లల్లాగే
అమ్మలు కూడా
ఆరాటం చేస్తే
మనం అమ్మలకు
అమ్మలం కావలసిన
పరిణతికి రావలసిందే
-ఏనుగు నరసింహారెడ్డి
క్లిక్ చేసి ఏసియా నెట్ న్యూస్ తెలుగు వాట్సాప్ చానెల్·ను ఫాలో అవ్వండి
