చిరంజీవికి సిస్టర్ రోల్ లో నటించిన నలుగురు హీరోయిన్లు ఎవరో తెలుసా? ఆ ఇద్దరిది సాహసమే..

మెగాస్టార్ చిరంజీవి (Chiranjeevi) తో ఒక్క సినిమా అయినా చేయాలని చాలా మంది హీరోయిన్లు ఆశిస్తుంటారు. కానీ ఈ నటీమణులు మాత్రం చిరుతో సిస్టర్ రోల్స్ లో నటించి కెరీర్ లో పెద్ద సాహసమే చేశారు.  

మెగా స్టార్ చిరంజీవి (Megastar Chiranjeevi) ఎంతో మంది హీరోయిన్లతో  కలిసి పని చేశారు. ఈ తరం హీరోయిన్లు కూడా ఆయనతో సినిమా చేసేందుకు ఆసక్తి చూపిస్తున్నారు. బాస్ సరసన బిగ్ స్క్రీన్ పై మెరిసేందుకు ప్రయత్నాలు కూడా చేస్తున్నారు. ఇదిలా ఉంటే.. నలుగురు స్టార్ హీరోయిన్లు మాత్రం చిరుకు సిస్టర్ రోల్స్ లో నటించి ఆశ్చర్య పరిచారు. వారి గురించి తెలుసుకుందాం. 

శ్రీలంకలో జన్మించిన కేరళ నటి, దివంగత సుజాత (Sujatha)  తమిళ చిత్రాలతో బాగా గుర్తింపు తెచ్చుకున్నారు. కన్నడ, మలయాళం, హిందీలో హీరోయిన్ గా స్టార్ హీరోల సరసన నటించి మెప్పించారు. తెలుగులోనూ ‘గోరింటాకు’, తదితర చిత్రాలతో అలరించింది. అయితే సుజాత చిరుకు మొట్టమొదట చెల్లెలు పాత్రలో నటించిన హీరోయిన్ గా ముద్ర వేసుకున్నారు. 1982లో వచ్చిన ‘సీతాదేవి’ చిత్రంలో చిరంజీవికి చెల్లెలుగా నటించారు. అయితే అంతకు ముందు 1980లో కృష్ణం రాజు, చిరంజీవి మల్టీస్టారర్ గా వచ్చిన ‘ప్రేమ తరంగాలు’ చిత్రంలో చిరుకు హీరోయిన్ గా నటించడం విశేషం. ఆ తర్వాత ‘బిగ్ బాస్’లో తల్లిగానూ నటించి ఆశ్చర్యపరిచారు. ఈమె 2011 ఏప్రిల్ లో తుదిశ్వాస విడిచారు. అన్ని భాషల్లో కలిపి 300కుపైగా సినిమాల్లో నటించింది. 

సీనియర్ నటి ఖుష్బూ సుందర్ (Kushboo Sundar)  కొన్ని వందల సినిమాల్లో నటించారు. తమిళం, మలయాళం, కన్నడ, హిందీ, తెలుగులో హీరోయిన్ గా ప్రేక్షకులను అలరించింది. లీడ్ యాక్ట్రెస్ గానే కాకుండా పలు కీలక పాత్రలు కూడా పోషించారు. టాలీవుడ్ లో హీరోయిన్ గా మెప్పించిన ఖుష్బూ చిరంజీవికి మాత్రం సోదరి పాత్రలో నటించింది. ఏఆర్ మురగదాస్ దర్శకత్వం వహించిన ‘స్టాలిన్’ చిత్రంలో చిరుకు అక్కగా ‘జాన్సీ’ పాత్రలో అలరించింది. అద్భుతమైన ప్రదర్శనతో ఆకట్టుకుంది. ప్రస్తుతం కీలక పాత్రల్లో మెరుస్తోంది.

లేడీ సూపర్ స్టార్ నయనతార (Nayanthara) సెకండ్ ఇన్నింగ్స్ లోనూ అదరగొడుతున్నారు. కీలక పాత్రలు కూడా పోషిస్తున్నారు. హీరోయిన్ గానే ఇంకా కెరీర్ ను లీడ్ చేస్తున్న ఈ స్టార్ హీరోయిన్ చిరంజీవికి చెల్లెలిగా నటించింది. ‘గాడ్ ఫాదర్’ చిత్రంలో చిరుకు సిస్టర్ రోల్ పోషించి అలరించింది. స్టార్ స్టేటస్ ఉన్న నయనతార.. మెగాస్టార్ కు చెల్లెలుగా నటించడం సాహసమనే చెప్పాలి. ఏదేమైనా ప్రేక్షకుల నుంచి మంచి రెస్పాన్స్ సొంతం చేసుకున్నారు. 

‘మహానటి’తో హీరోయిన్ కీర్తి సురేష్ (Keerthy Suresh) దేశవ్యాప్తంగా మంచి క్రేజ్ సంపాదించుకున్నారు. ఆమె నటనకు మంచి గుర్తింపు దక్కింది. దీంతో స్టార్ హీరోలకు జోడీగా ఆఫర్లు వచ్చాయి. మహేశ్ బాబు, వరుణ్ ధావన్, నాని వంటి స్టార్స్ తో అలరిస్తోంది. ఇప్పుడిప్పుడు భారీ ప్రాజెక్ట్స్ లో నటిస్తున్న కీర్తి సురేష్ రీసెంట్ గానే చిరుకు చెల్లెలుగా నటించింది. మెహర్ రమేశ్ దర్శకత్వంలో వచ్చిన ‘భోళా శంకర్’లో చిరంజీవితో సిస్టర్ రోల్ లో నటించి అలరించింది.