నాలుగోసారి అధికారాన్ని అందుకోవాలనుకున్న బీజేపీకి, వరుసగా 15 ఏళ్లు అధికారాన్ని కోల్పోయి ఈసారి ఎలాగైనా పవర్‌లోకి రావాలనుకుంటున్న కాంగ్రెస్‌లను అయోమయానికి గురిచేస్తూ మధ్యప్రదశ్ ఓటర్లు తీర్పునిచ్చారు. ఎవరికి స్పష్టమైనా ఆధిక్యాన్ని కట్టబెట్టకుండా త్రిశంకు స్వర్గంలో నిలబెట్టారు.

ఎన్నికల ఫలితాల్లో కాంగ్రెస్ 112, బీజేపీ 108, బీఎస్పీ 5, ఇతరులు 6 స్థానాల్లో ఆధిక్యంలో ఉన్నారు. అయితే కేంద్రంలోని ఎన్డీఏ మద్ధతుతో బీజేపీ మరోసారి ఇక్కడ ప్రభుత్వాన్ని ఏర్పాటు చేసే అవకాశం ఉందని విశ్లేషకులు భావిస్తున్నారు.

మధ్యప్రదేశ్‌లో కాంగ్రెస్ 15 ఏళ్ల నుంచి అధికారానికి దూరంగా ఉంది... 2003, 2008, 2013 అసెంబ్లీ ఎన్నికల్లో వరుసగా బీజేపీ అధికారంలోకి వచ్చింది. ముఖ్యమంత్రి శివరాజ్‌సింగ్ చౌహాన్‌ పనితీరుతో పాటు మోడీ హవాతో కమలం ఇక్కడ వికసించింది.

దీంతో ఇక్కడ కాంగ్రెస్ అధికారంలోకి రాదని ఆ పార్టీ శ్రేణులే ఒక నిర్ణయానికి వచ్చాయి. అయితే బీజేపీకి నాలుగోసారి అధికారం దక్కనీయకూడదనే కృతనిశ్చయంతో కాంగ్రెస్ సర్వశక్తులు ఒడ్డింది. రాష్ట్ర కాంగ్రెస్ వ్యవహారాల ఇన్‌ఛార్జ్‌గా బాధ్యతలు చేపట్టిన కమల్‌నాథ్ పార్టీలోని గ్రూపులను అరికట్టారు..

అందరినీ ఏకతాటిపైకి తెచ్చేందుకు ప్రయత్నించారు. యువనేత జ్యోతిరాధిత్య సింధియా ప్రచార కమిటీ ఛైర్మన్‌గా రాష్ట్రంలో సుడిగాలి పర్యటన చేపట్టారు. కాంగ్రెస్ ప్రయత్నాలు ఫలించి ఈసారి అధికార మార్పు వైపు ప్రజలు మొగ్గు చూపారని తెలుస్తోంది.

గిట్టుబాటు ధరలు లేక, సరైన ఆదాయం లేక ఇబ్బంది పడిన రైతులు బీజేపీ ప్రభుత్వంపై నిరసనకు దిగారు. దీనికి తోడు మందసౌర్‌లో పోలీసుల కాల్పుల్లో పలువురు రైతులు చనిపోవడంతో బీజేపీ రైతన్నల ఆగ్రహానికి గురవ్వాల్సి వచ్చింది.

అలాగే తొలిసారిగా హిందుత్వ, గో సంరక్షణ అస్త్రాలను కాంగ్రెస్ సంధించింది. గోవుల కోసం ప్రతి గ్రామంలో గోసంరక్షణ శాలలు నిర్మిస్తామని హామీ ఇచ్చింది. దీనిలో భాగంగానే కమల్‌నాథ్, సింధియా, రాహుల్ గాంధీలు ఆలయాలను దర్శించిన తర్వాతనే ప్రచారం మొదలుపెట్టారు.

ఈ సారి రాష్ట్ర కాంగ్రెస్ వ్యవహారాల ఇన్‌ఛార్జి కమల్‌నాథ్ కీలకపాత్ర పోషించారు. ఎన్నికల్లో గెలవాలంటే నేతలు ఈసారి విభేదాలు పక్కనబెట్టి ముందుకు సాగాలని.. క్రమశిక్షణ ఉల్లంఘనలకు పాల్పడితే తీవ్ర హెచ్చరికలుంటాయని కాంగ్రెస్ అధిష్టానం కఠినంగా హెచ్చరించడంతో అందరూ కలిసి పనిచేశారు.

కమల్‌నాథ్ ప్రతి నియోజకవర్గంలోని బూత్ స్థాయిలో చక్రం తిప్పారు. సరైన అభ్యర్థులను ఎంపిక చేయడంతో పాటు రెబల్స్ విషయంలో జాగ్రత్తలు తీసుకున్నారు. మహాకౌశల్ ప్రాంతంపై ప్రత్యేకంగా దృష్టిసారించిన ఆయన గిరిజనుల ఓట్లు పొందడంలో కీలకంగా వ్యవహరించారు.

అన్నింటికి మించి నిరుద్యోగులు బీజేపీ పాలనపై ఆగ్రహంతో ఉన్నారు. వీరితో పాటు యువత కాంగ్రెస్ వైపు మొగ్గుచూపారు. అలాగే పెద్దనోట్ల రద్దు, జీఎస్టీ వంటి ఆర్థిక సంస్కరణలపై సామాన్యులు ఆగ్రహంతో ఉండటం హస్తానికి కలిసొచ్చింది.

అయితే ముఖ్యమంత్రి శివరాజ్‌సింగ్ చౌహాన్ పాలనపై ప్రజలు అంతగా విసుగు చెందలేదని వస్తున్న ఫలితాలను బట్టి అంచాన వేయవచ్చు. మెజారిటీ లేని చోట్లే ప్రభుత్వాలను ఏర్పాటు చేసిన బీజేపీ మధ్యప్రదేశ్‌లో ఏం చేయబోతుందో ఒకటి, రెండు రోజుల్లోనే తెలుస్తుంది.