ఆ బాధ ఇప్పటికీ ఉంది, కెఎల్ రాహుల్ స్క్రీన్ షాట్ తీసి పంపాడు... విరాట్ కోహ్లీ ఎమోషనల్ కామెంట్స్...

ఐపీఎల్ కెరీర్‌లో ఇప్పటిదాకా 14 సీజన్లపాటు ఒకే జట్లుకి ఆడిన ఏకైక ప్లేయర్ విరాట్ కోహ్లీ. కెప్టెన్‌గా 9 సీజన్లు, జట్టును నడిపించినా ఆర్‌సీబీకి టైటిల్ అందించలేకపోయాడు విరాట్...

2016 ఐపీఎల్ సీజన్‌లో విరాట్ కోహ్లీ వీరవిహారం చేశాడు. 16 మ్యాచుల్లో 4 సెంచరీలు, 7 హాఫ్ సెంచరీలతో 81.08 సగటుతో 973 పరుగులు చేసి రికార్డు క్రియేట్ చేశాడు కోహ్లీ.. ఈ రికార్డు ఇప్పటికీ అలాగే ఉంది...

విరాట్ కోహ్లీ, ఏబీ డివిల్లియర్స్, క్రిస్ గేల్, కెఎల్ రాహుల్ వంటి ప్లేయర్ల బ్యాటింగ్ కారణంగా ఐపీఎల్ 2016 సీజన్‌లో అద్భుత విజయాలతో ఫైనల్ చేరింది రాయల్ ఛాలెంజర్స్ బెంగళూరు...

హోరాహోరీగా జరిగిన ఫైనల్ మ్యాచ్‌లో 8 పరుగుల తేడాతో గెలిచిన సన్‌రైజర్స్ హైదరాబాద్, ఆర్‌సీబీ టైటిల్ ఆశలపై నీళ్లు చల్లింది. 209 పరుగుల లక్ష్యఛేదనలో ఒకానొకదశలో 10.2 ఓవర్లలో 114/0 పరుగులు చేసిన ఆర్‌సీబీ, ఆ తర్వాత వరుస వికెట్లు కోల్పోయి 20 ఓవర్లలో 200 పరుగులకే పరిమితమైంది...

క్రిస్ గేల్ 38 బంతుల్లో 4 ఫోర్లు, 8 సిక్సర్లతో 76 పరుగులు, విరాట్ కోహ్లీ 35 బంతుల్లో 5 ఫోర్లు, 2 సిక్సర్లతో 54 పరుగులు చేయగా ఫైనల్ మ్యాచ్‌లో ఏబీ డివిల్లియర్స్, కెఎల్ రాహుల్, షేన్ వాట్సన్ విఫలం కావడం జట్టుపై తీవ్రంగా ప్రభావం చూపింది...

‘2016 ఫైనల్, అలా జరగాలని రాసుందనుకున్నా. బెంగళూరులో అంత అద్భుతంగా ఆడిన తర్వాత 9 ఓవర్లలోనే 100 పరుగులు చేసిన తర్వాత ఓడిపోతామని ఎవ్వరు మాత్రం అనుకుంటారు...

ఆ మ్యాచ్‌ను ఈ మధ్యే టీవీలో మళ్లీ వేస్తే, కెఎల్ రాహుల్ ఆ స్క్రీన్ షాట్స్ తీసి నాకు పంపాడు. వాటిని చూస్తుంటే ఇప్పటికీ బాధగా ఉంటుంది... ఆ బాధకు అంతం లేదు...

ఎప్పుడు దాని గురించి ఆలోచించినా, గెలవలేకపోయామనే బాధ గుండెలను గుచ్చుతూ ఉంటుంది. ఆ రోజు మాది కాదు అనుకోవడమే. ఐపీఎల్‌లో టైటిల్ గెలవకపోవడం నన్ను ఎప్పటికీ కలిచివేస్తూ ఉంటుంది...

2016 ఐపీఎల్, కెఎల్ రాహుల్ కెరీర్ గ్రాఫ్‌ను పూర్తిగా మార్చేసింది. దీన్ని అతను కూడా ఒప్పుకుంటాడు. ఆ సీజన్‌ మా అందరికీ ఓ అద్భుతం. నలుగురం కూడా ఆకాశమే హద్దుగా చెలరేగిపోయాం...’ అంటూ చెప్పుకొచ్చాడు విరాట్ కోహ్లీ...

2013 ఐపీఎల్ సీజన్‌లో ఆర్‌సీబీ ద్వారా ఎంట్రీ ఇచ్చిన కెఎల్ రాహుల్, ఆ తర్వాత రెండు సీజన్లు సన్‌రైజర్స్ హైదరాబాద్‌కి ఆడాడు. 

2016 సీజన్‌లో తిరిగి ఆర్‌సీబీలోకి వచ్చిన కెఎల్ రాహుల్, ఆ సీజన్‌లో 14 మ్యాచుల్లో 397 పరుగులు చేసి విరాట్ కోహ్లీ, ఏబీ డివిల్లియర్స్ తర్వాతి స్థానంలో నిలిచాడు.