మహిళా పక్షపాత ప్రభుత్వం: వైఎస్ఆర్ ఈబీసీ నేస్తం నిధుల విడుదల చేసిన జగన్

లంచాలు వివక్ష లేని పరిపాలనతో కేవలం నాలుగేళ్లలో చరిత్ర సృష్టించినట్టుగా  ఏపీ సీఎం వైఎస్ జగన్  చెప్పారు.బుధవారంనాడు  ఏపీ సీఎం వైఎస్ జగన్  ప్రకాశం  జిల్లా  మార్కాపురంలో  వైఎస్ఆర్ ఈబీసీ  పథకం  కింద  నిధులను  విడుదల  చేశారు.  ఈ సందర్భంగా  నిర్వహించిన సభలో సీఎం ప్రసంగించారు. కుల, మత, ప్రాంత రాజకీయ పార్టీలనే బేధం లేకుండా ప్రతి పేదవాడికి సంక్షేమ పథకాలను అందించినట్టుగా  ఆయన  చెప్పారు. పేదవారి ఆర్థిక స్వావలంభనకు పటిష్ట చర్యలు తీసుకున్నామని సీఎం జగన్  తెలిపారు. 
 

 ఓసీ కులాల్లోని పేద  మహిళల కోసం ఈబీసీ నేస్తం అమలు చేస్తున్నామన్నారు. 4.39 లక్షల మంది అక్కాచెల్లెమ్మలకు రూ.658 కోట్లు ఇవాళ  నేరుగా వారి ఖాతాల్లో జమ చేస్తున్నట్లు  సీఎం ప్రకటించారు.   వైఎస్ఆర్  ఈబీసీ నేస్తం కింద ఇప్పటివరకూ రూ. 1257 కోట్లు ఇచ్చామన్నారు. దాదాపు 4 లక్షలమంది లబ్ధిదారులు రెండో దఫా ఈ నిధులు అందుకుంటున్నారన్నారు. దేశంలో ఎక్కడా ఇలాంటి పథకం లేదని సీఎం పేర్కొన్నారు. 

మహిళలు  ఆర్థికంగా నిలబడాలని, సామాజికంగా, రాజకీయపరంగా, సాధికారత సాధించాలని అనేక కార్యక్రమాలు అమలు చేస్తున్నామని సీఎం తెలిపారు. అమ్మ ఒడి దగ్గర నుంచి 30 లక్షల ఇళ్లపట్టాల వరకూ  చాలా కార్యక్రమాలు అమలు చేస్తున్నామన్నారు. తమది మహిళా పక్షపాత ప్రభుత్వం అని సీఎం పేర్కొన్నారు. 

ఈబీసీ నేస్తం, కాపు నేస్తం  పథకాలు ఎన్నికల మేనిఫెస్టోలో పెట్టలేదన్నారు. . ఎన్నికల్లో హామీలుగా కూడా ఇవ్వలేదని అయినా కూడా అగ్రకులాల్లోని పేదలకు మంచి జరగాలని ఈ పథకాన్ని అమలు చేస్తున్నట్లు వివరించారు. కేవలం 46 నెలల కాలంలోనే ఇప్పటికే రూ. 2.07లక్షల కోట్లు డీబీటీ ద్వారా లబ్దిదారులకు నేరుగా ఖాతాల్లో జమ చేసిన విషయాన్ని  సీఎం గుర్తు  చేశారు.  ఇందులో 1.42 లక్షల కోట్లు మహిళల ఖాతాల్లో వేసినట్లు  సీఎం  వివరించారు. మన ప్రభుత్వం . రాష్ట్రంలోని కోటి యాభై లక్షలమంది కుటుంబాలకు చేస్తున్న మంచిని గురించి ప్రతి ఒక్కరూ ఆలోచన చేయాలని  సీఎం  కోరారు.  

గత ప్రభుత్వంలో 2014-19 మధ్య పేదవాడికి చేసిన మంచిపై పేదవాడి ఇంటి వద్ద నిల్చొని సెల్ఫీ ఛాలెంజ్ చేయాలని చంద్రబాబుకు సీఎం జగన్ సూచించారు.  చంద్రబాబు పాలనలో  పేదలకు  ఒక్క రూపాయి కూడా  ప్రయోజనం దక్కలేదని  ఆయన విమర్శించారు.  

సంక్షేమ పథకాల కింద వైఎస్సార్ సీపీ ప్రభుత్వం డీబీటీ అమలు చేస్తుంటే.. గతంలో టీడీపీ ప్రభుత్వం దొచుకో.. పంచుకో.. తినుకో పద్దతి అమలు చేసిందని ఆయన  ఆరోపించారు. అమ్మ ఒడి, విద్యాదీవెన, వసతి దీవెన, ఈబీసీ నేస్తం, కాపు నేస్తం, ఆసరా , చేయూత వంటి పథకాల కింద పేదలకు లబ్ది చేకూర్చామన్నారు.
 

 సెల్ఫీ ఛాలెంజ్ అంటే ఫేక్ ఫొటోలు కాదన్నారు. పేదవాడికి చేసే మంచే తనకు సెల్ఫీ అని సీఎం జగన్ పేర్కొన్నారు. ఈ రాష్ట్రంలో ప్రతి ఎస్సీ, ఎస్టీ, బీసీ, మైనార్టీ, ప్రతి పేద ఇంటి ముందు నిలబడి ఈ ఇంటికి మా ప్రభుత్వం వల్ల జరిగిన మంచి ఇదీ  అని చెప్పగలవా అని బాబును సీఎం జగన్ ప్రశ్నించారు.
 

చంద్రబాబు నిజాలు దాచి అబద్దాలు అసత్య ప్రచారాలతో తన ఎల్లో మీడియాను ఉపయోగించుకుని ప్రభుత్వంపై విషం చిమ్ముతున్నారని విమర్శించారు. ఈ అబద్ధాల బ్యాచ్‌ను ఎక్కడికక్కడ ప్రశ్నించాలని ప్రజలకు సూచించారు. గత ఐదేళ్ల హయాంలో ఒక్క ఇళ్లస్థలమైనా ఎందుకు ఇవ్వలేకపోయారని  ప్రశ్నించాలని  కోరారు.  వైఎస్సార్ సీపీ హయాంలో 30 లక్షల ఇళ్ల పట్టాల పంపిణీ ఎలా సాధ్యపడిందని ఎల్లో బ్యాచ్ ను నిలదీయాలని కోరారు.