వివాదాస్పద డైరెక్టర్ రామ్ గోపాల్ వర్మ సంచలన ప్రకటన చేశారు. నిజం పేరుతో యూట్యూబ్ ఛానల్ స్టార్ట్ చేస్తున్నట్లు వెల్లడించారు.
దర్శకుడు వర్మ ఏం చేసినా సంచలనమే. తాజాగా ఆయన కొత్త యూట్యూబ్ ఛానల్ కి శ్రీకారం చుట్టారు. ప్రకటనతోనే సంచలన విషయాలు పంచుకున్నారు. 'నిజం' యూట్యూబ్ ఛానల్ ని ఉద్దేశిస్తూ వర్మ చేసిన కామెంట్స్ ప్రకంపనలు రేపుతున్నాయి. మొదటి ఎపిసోడ్ గా వివేకా మర్డర్ కేసు ఎంచుకున్నారు. ఏపీలో సంచలనం రేపుతున్న వివేకా మర్డర్ ఎపిసోడ్ పై తన ఛానల్ లో విశ్లేషణ పెడుతున్నాడట. ఎక్స్పర్ట్స్ తో మర్డర్ ఎవరు చేశారు? అసలు నిందితులు ఎవరు? హత్యకు కారణాలు ఏమిటీ? మీడియాలో జరుగుతున్న ప్రచారంలో నిజమెంత?... ఇలా కూలంకషంగా చర్చిస్తారట. నా నిజం ఛానల్ తో అబద్దాల బట్టలూడతీస్తా అంటున్నారు.
వర్మ తన వరుస పోస్ట్స్ లో... 'నేను ప్రారంభించబోయే”నిజం" YouTube ఛానల్ ముఖ్య ఉద్దేశం అబద్ధాల బట్టలూడదీయడానికి.. ఆ బట్టలూడదీసి విసిరి పారేస్తేనే , నిజం యొక్క పూర్తి నగ్న స్వరూపం బయటపడుతుంది…''. ''అబద్ధం బ్రతికేదే నిజాన్ని చంపటం కోసం. నిజాన్ని ఎవ్వరూ చంపలేరు.కానీ నిజం అప్పుడప్పుడు చచ్చిపోయినట్టు నటిస్తుంది. .. దానికి మోసపోయి,అబద్ధాలు చెప్పే వాళ్ళు సంబరం తో డాన్స్ లాడుతూండగా ఏదో ఒక రోజు వెనక నుంచి ముందు పోటు పొడుస్తుంది.''
''నిజాన్ని చేధించడానికి ఒకే ఒక్క సాధనం లాజికల్ థింకింగ్ .అనాలిసిస్ ద్వారా , టెక్నాలజీ ద్వారా , సర్కమ్స్టాన్సేస్ ద్వారా. అన్నింటికన్నా ముఖ్యంగా మోటివ్ మీద కాన్సంట్రేట్ చేయడం ద్వారా నిజాన్ని అబద్ధం నుంచి కాపాడవచ్చు''. ''“నిజం”ఛానల్ లో కేవలం పొలిటికల్ కాంట్రవర్సీస్ మాత్రమే కాకుండా కొన్ని కరెంట్ సిట్యుయేషన్స్, సైన్స్, హిస్టరీ, ఆర్టిఫిషియల్ ఇంటెలిజెన్స్, సెక్స్ , ఫిలాసఫీ, పోలీస్, క్రైమ్, న్యాయ స్థానాలు ,ఇంకా ఎన్నెన్నో టాపిక్స్ ఉంటాయి''.
''నిజం గురించి ప్రతి ఎపిసోడ్లో,నేనే కాకుండా ఎక్స్పర్ట్స్ వేరే వేరే టాపిక్స్ అనలైజ్ చేస్తారు. కొన్నిసార్లు నేను వాళ్ళతో ,కొన్నిసార్లు స్వప్నగారు వాళ్ళతో, కొన్నిసార్లు వేరేవాళ్ళు ఎవరెవరితోనో .అలా నిజాన్ని గౌరవించే ప్రతి ఒక్కరికీ నిజం ఛానల్ గొడుగు కింద కేటాయించిన ప్రత్యేక చోటుంటుంది''. ''వివేకా మర్డర్ వెనక నిజం లోని అబద్ధాలు,ఆ అబద్ధాలు చెప్పే వాళ్ళ వెనక ఉన్న నిజాలు,ఆ నిజాల వెనక వేరే వాళ్ళు ప్రభోధిస్తున్న అబద్ధపు నిజాలు, ఇంకా వాళ్ళ పైవాళ్లు అందరి నెత్తి మీద రుద్దుతున్న నిజమైన అబద్ధాలు ,వాటన్నింటి వెనుక నిజాలన్నింటినీ తవ్వి తీయడమే "నిజం" ఛానల్ ముఖ్య ఉద్దేశం''.
''నిజం నివురు కప్పిన నిప్పు లాంటిది.. ఎప్పుడో అప్పుడు మంటగా మారి అబద్దాన్ని కాలుస్తుంది.. నిజం” ఛానల్ 1st ఎపిసోడ్ “వివేకా హత్య వెనక నిజం లో అబద్దముందా ?'' అని వర్మ ఇంస్టాగ్రామ్ లో వరుస పోస్ట్స్ తో హీటెక్కించారు. ఏప్రిల్ 25 సాయంత్రం 4 గంటలకు నిజం ఛానల్ ప్రారంభం కానుంది. ఏపీ రాజకీయాలపై వర్మ ఛానల్ నిజం ఈ మేరకు ప్రభావం చూపుతుందో చూడాలి...
