వేసవిలో ఎక్కువగా కనిపించే పండ్లలో పుచ్చకాయ మొదటి స్థానంలో ఉంటుందని చెప్పడంలో ఎలాంటి సందేహం లేదు. మండుటెండల్లో పుచ్చకాయ తింటే కడుపు హాయిగా అనిపిస్తుంది. అయితే ప్రస్తుతం కల్తీ కాలంలో పుచ్చకాయలను కూడా కల్తీగా మార్చేస్తున్నారు కొందరు కేటుగాళ్లు. ఇలాంటి కల్తీ పుచ్చకాయలను తినడం వల్ల క్యాన్సర్ వచ్చే ప్రమాదం ఉందని నిపుణులు హెచ్చరిస్తున్నారు. ఇంతకీ కల్తీ పుచ్చకాయలను ఎలా గుర్తించాలో ఇప్పుడు తెలుసుకుందాం.
కాదేది కల్తీకి అనర్హం అన్నట్లు పరిస్థితి మారింది. ఉప్పు నుంచి పప్పు వరకు అన్ని కల్తీ చేస్తున్నారు. అడ్డదారిలో డబ్బులు సంపాదించాలని కొందరు కేటుగాళ్లు తినే తిండిని కూడా కల్తీ చేస్తున్నారు. దీనికి పుచ్చకాయ కూడా మినహాయింపు కావడం లేదు. పుచ్చకాయ త్వరగా పండడానికి, కాయ ఎర్రగా కనిపించడానికి కొన్ని రకాల రసాయనాలను ఉపయోగిస్తున్నారు. ఇలాంటి వాటిని తింటే కచ్చితంగా క్యాన్సర్ రావడం ఖాయని నిపుణులు హెచ్చరిస్తున్నారు.
అసలు పుచ్చకాయ క్యాన్సర్‌కు ఎలా కారణమవుతుందో తెలుసా.?
నిజానికి పుచ్చకాయ ఆరోగ్యానికి ఎంతో మేలు చేస్తుంది. ఇందులో దాదాపు 90 శాతం వాటర్‌ కంటెంట్‌ ఉంటుంది. దీంతో డీహైడ్రేషన్‌ మొదలు ఎన్నో రకాల సమస్యల నుంచి ఉపశమనం లభిస్తుంది. అయితే ప్రస్తుతం మార్కెట్లో కొంత మంది పుచ్చకాయలను పండించడానికి ఈథర్, కార్బైడ్ లేదా కలర్ వంటి రసాయనాలను ఉపయోగిస్తున్నారు. ఈ రసాయనాలు శరీరంలోకి ప్రవేశించినప్పుడు క్యాన్సర్, కాలేయం దెబ్బతినడం, మూత్రపిండాల సమస్యలు, హార్మోన్ల అసమతుల్యతకు కారణమవుతాయి.
పుచ్చ కాయలోని గుజ్జు మరింత ఎర్రగా కనిపించేందుకు కృత్రిమ రంగులను కాయలోకి ఇంజెక్ట్ చేస్తున్నారు. ఈ రంగులు క్యాన్సర్‌కు దారి తీసే అవకాశాలు ఉంటాయని నిపుణులు హెచ్చరిస్తున్నారు. అదే విధంగా ఎక్కువ రోజులు సరైన వాతావరణంలో నిల్వ చేయని పుచ్చకాయలో బూజు పెరిగే అవకాశం ఉంటుంది. ఈ బూజు అఫ్లాటాక్సిన్స్ అనే విషాన్ని ఉత్పత్తి చేస్తుంది, ఇది కాలేయ క్యాన్సర్ ప్రమాదాన్ని కలిగిస్తుంది.
కల్తీ పుచ్చకాయను ఎలా గుర్తించాలి.?
పుచ్చకాయ గుజ్జు చాలా ఎర్రగా, మెరుస్తూ కనిపిస్తే అది నకిలీ పుచ్చకాయ అని అర్థం చేసుకోవాలి. అదే సమయంలో, మీరు పుచ్చకాయను కోసినప్పుడు దాని నుంచి నురుగు వస్తే రసాయనాలు ఉపయోగించారని అర్థం. అలాగే రసాయనాలతో నిండిన పుచ్చకాయ రుచి కొంచెం వింతగా ఉంటుంది. అదే సమయంలో, పై తొక్క చాలా మెరుస్తూ లేదా అసహజంగా నునుపుగా కనిపిస్తే దానిని అస్సలు కొనకండి.
మంచి పుచ్చకాయను ఎలా గుర్తించాలి.?
పుచ్చకాయను కొనుగోలు చేసే ముందు కచ్చితంగా కొంత కట్‌ చేసి చూడాలి. గుజ్జును పట్టుకుంటే రంగు అంటుకుంటే అలాంటి వాటిని కొనుగోలు చేయొద్దు. ఇక పుచ్చకాయను తినే ముందు చల్లటి నీటిలో 30 నిమిషాలు ఉంచండి. గుజ్జు మరీ ఎక్కువ ఎర్ర రంగులో కనిపిస్తే అది తినకండి. నురుగు వస్తున్నా, కెమికల్ వాసన వస్తున్నా వాటికి దూరంగా ఉండండి.
నోట్‌: ఈ వివరాలను కేవలం ప్రాథమిక సమాచారంగానే భావించాలి. ఆరోగ్యానికి సంబంధించినంత వరకు వైద్యుల సూచనలే పాటించాలి.
క్లిక్ చేసి ఏసియా నెట్ న్యూస్ తెలుగు వాట్సాప్ చానెల్·ను ఫాలో అవ్వండి