బోర్డర్ గవాస్కర్ ట్రోఫీ భాగంగా మార్చి 1 నుంచి ఇండోర్ వేదికగా మూడో టెస్టు మ్యాచ్ జరగనుంది. తొలి రెండు టెస్టుల్లో చిత్తుగా ఓడిన ఆస్ట్రేలియా, మిగిలిన రెండు మ్యాచుల్లో గెలిచి పరువు నిలుపుకోవాలని చూస్తోంది. అయితే రెండో టెస్టు ముగిసిన తర్వాత వ్యక్తిగత కారణాలతో స్వదేశానికి వెళ్లిన ఆసీస్ టెస్టు కెప్టెన్ ప్యాట్ కమ్మిన్స్, మూడో టెస్టులో ఆడడం లేదు...

Ad1

ప్యాట్ కమ్మిన్స్ తల్లి అనారోగ్యంతో బాధపడుతోంది. రెండో టెస్టు మూడు రోజుల్లోనే ముగియడంతో తల్లిని చూసేందుకు సిడ్నీ బయలుదేరి వెళ్లిన ప్యాట్ కమ్మిన్స్, మూడో టెస్టు సమయానికి తిరిగి ఇండియాకి వస్తాడని ప్రకటించింది క్రికెట్ ఆస్ట్రేలియా. అయితే అమ్మ ఆరోగ్యం విషమించడంతో తనతోనే ఉండాలని నిర్ణయం తీసుకున్నాడు ప్యాట్ కమ్మిన్స్...

ప్యాట్ కమ్మిన్స్ గైర్హజరీలో ఆస్ట్రేలియా టీమ్‌ని మాజీ కెప్టెన్ స్టీవ్ స్మిత్ నడిపించబోతున్నాడు. మిచెల్ స్టార్క్ గాయం నుంచి పూర్తిగా కోలుకోవడంతో సీనియర్ ఫాస్ట్ బౌలర్ లేని కొరత కూడా ఆస్ట్రేలియాకి తీరిపోనుంది. ప్యాట్ కమ్మిన్స్, మూడో టెస్టు ముగిసిన తర్వాత ఇండియాకి తిరిగి రాబోతున్నట్టు ప్రచారం జరుగుతోంది. దీనిపై తాజాగా స్పందించాడు ఆస్ట్రేలియా మాజీ పేసర్ జాసన్ గిల్లెస్పీ...

Ad2

‘ప్యాట్ కమ్మిన్స్, మిగిలిన రెండు టెస్టుల్లో కానీ వన్డే సిరీస్‌లో కానీ ఆడతాడని నేను అనుకోవడం లేదు. నేను టీమ్ మేనేజ్‌మెంట్‌లో ఉండి ఉంటే ఇదే విషయం చెప్పేవాడిని. ఎందుకంటే ఇప్పటికే టెస్టు సిరీస్ పోయింది. మిగిలిన రెండు టెస్టుల్లో గెలిచినా సిరీస్ అయితే గెలవలేరు..

వచ్చే ఏడాది కూడా ఇలాంటి సిరీస్ వస్తుంది. ఆ తర్వాతి యేడు కూడా ఉంటుంది. అయితే కుటుంబంతో విలువైన సమయం గడిపేందుకు ప్యాట్ కమ్మిన్స్‌కి ఇదే సరైన అవకాశం.. కుటుంబం కంటే ఏదీ ముఖ్యం కాదు...

కుటుంబంతో ఆత్మీయులతో సమయం గడిపేందుకు క్రికెటర్లకు తీరిక దొరకడమే చాలా కష్టం. ముఖ్యంగా అనారోగ్యంతో బాధపడుతున్న మీ అమ్మగారితో నువ్వు గడిపే ఈ సమయం చాలా విలువైనది. నాలుగు టెస్టుల సిరీస్ ఇప్పటికే ఓడిపోయారు. మూడో టెస్టు ఎలాగో మిస్ అవ్వబోతున్నాడు...

Ad3

మిగిలిన ఆఖరి టెస్టుకి వచ్చినా దక్కేది ఏముంటుంది. కాబట్టి ప్యాట్ కమ్మిన్స్, ఇండియా టూర్ నుంచి తప్పుకోవడమే మంచిది. ఓ కొడుకుగా, ఓ సోదరుడిగా... కుటుంబానికి అండగా నిలబడు...’ అంటూ చెప్పుకొచ్చాడు ఆస్ట్రేలియా మాజీ క్రికెటర్ జాసన్ గిల్లెస్పీ...

ఐసీసీ నెం.1 టెస్టు టీమ్‌గా బోర్డర్ గవాస్కర్ ట్రోఫీ 2023 సీజన్‌ని ఆరంభించింది ఆస్ట్రేలియా. నాగ్‌పూర్ టెస్టులో ఇన్నింగ్స్ 132 పరుగుల తేడాతో చిత్తుగా ఓడిన ఆస్ట్రేలియా, ఢిల్లీ టెస్టులో 6 వికెట్ల తేడాతో ఓడింది. వరుసగా మూడు సీజన్లుగా బోర్డర్ గవాస్కర్ ట్రోఫీని గెలుస్తూ వచ్చిన భారత జట్టు, నాలుగోసారి కూడా టైటిల్‌ని నిలుపుకుంది..

ఇండోర్ వేదికగా జరిగే మూడో టెస్టు గెలిస్తే టీమిండియా, ఆస్ట్రేలియాని వెనక్కి నెట్టి నెం.1 టెస్టు టీమ్‌గా నిలుస్తుంది. అలాగే వరల్డ్ టెస్టు ఛాంపియన్‌షిప్ ఫైనల్‌కి నేరుగా అర్హత సాధిస్తుంది.

Ad4