PSL 2023: మూడు రోజుల క్రితం క్వెట్టా గ్లాడియేటర్స్ చేతిలో ఓడిన పెషావర్ జల్మీకి తాజాగా ముల్తాన్ సుల్తాన్స్ కూడా షాకిచ్చింది. బాబర్ ఆజమ్ రాణిస్తున్నా జట్టు మాత్రం ఓటముల బాటే పడుతోంది.
పాకిస్తాన్ క్రికెట్ లీగ్ (పీఎస్ఎల్) లో సంచలనాలు నమోదవుతున్నాయి. నాలుగు రోజుల క్రితం పెషావర్ జల్మీ - క్వెట్టా గ్లాడియేటర్స్ మ్యచ్ లో పీఎస్ఎల్ లోనే అత్యధిక టార్గెట్ ను క్వెట్టా ఛేదించగా ఇప్పుడు మరో మ్యాచ్ లో కూడా పెషావర్ జల్మీకి భారీ ఓటమి తప్పలేదు. ముల్తాన్ సుల్తాన్స్ తో జరిగిన మ్యాచ్ లో పెషావర్ జల్మీ.. 242 పరుగులు చేసినా ముల్తాన్ బ్యాటర్లు లక్ష్యాన్ని మరో ఐదు బంతులు మిగిలుండగానే ఊదేశారు. దక్షిణాఫ్రికా బ్యాటర్ రిలీ రూసో (ముల్తాన్ సుల్తాన్స్ కు ఆడుతున్నాడు) పీఎస్ఎల్ లో ఫాస్టెస్ట్ సెంచరీ రికార్డు నమోదు చేశాడు.
రావల్పిండి వేదికగా జరిగిన మ్యాచ్ లో పెషావర్.. నిర్ణీత 20 ఓవర్లలో ఆరు వికెట్ల నష్టానికి 242 పరుగులు చేసింది. ఆ జట్టు సారథి బాబర్ ఆజమ్ (39 బంతుల్లో 73, 9 ఫోర్లు, 2 సిక్సర్లు) కు తోడు సయీబ్ అయూబ్ (33 బంతుల్లో 58, 5 ఫోర్లు, 4 సిక్సర్లు) తొలి వికెట్ కే 14 పరుగులు జోడించారు. వన్ డౌన్ లో వచ్చిన మహ్మద్ హరీస్ (35), కొహ్లర్ (38) లు రాణించారు. ఫలితంగా ఆ జట్టు ముల్తాన్ ఎదుట భారీ లక్ష్యాన్ని నిలిపింది.
కాగా భారీ లక్ష్యాన్ని ఛేదించే క్రమంలో ముల్తాన్ కు ఆదిలోనే డబుల్ షాకులు తాకాయి. ఓపెనర్లు షాన్ మసూద్ (5), మహ్మద్ రిజ్వాన్ (7) లు వెంటవెంటేనే పెవిలియన్ చేరారు. కానీ వన్ డౌన్ లో వచ్చిన రిలీ రూసో (51 బంతుల్లో 121, 12 ఫోర్లు, 8 సిక్సర్లు) వీరబాదుడు బాదాడు. 41 బంతుల్లోనే అతడి సెంచరీ పూర్తయింది. తద్వారా పీఎస్ఎల్ లో అతి తక్కువ బంతుల్లోనే సెంచరీ చేసిన ప్లేయర్ గా రూపో రికార్డులకెక్కాడు.
రూసో.. కీరన్ పొలార్డ్ (25 బంతుల్లో 52, 3 ఫోర్లు, 5 సిక్సర్లు) తో కలిసి మూడో వికెట్ కు 99 పరుగులు జోడించాడు. తర్వాత పొలార్డ్ నిష్క్రమించినా రూసో చివరివరకూ నిలిచాడు. మధ్యలో ముల్తాన్ సుల్తాన్స్ త్వరత్వరగా వికెట్లు కోల్పోయింది. టిమ్ డేవిడ్ (2), ఖుష్దిల్ (18) లు విఫలమయ్యారు. కానీ చివర్లో అన్వర్ అలీ (8 బంతుల్లో 24 నాటౌట్, 2 ఫోర్లు, 2 సిక్సర్లు) ఉస్మాన్ మీర్ (3 బంతుల్లో 11, 1 ఫోర్, 1 సిక్సర్) ల ధాటికి పెషావర్ జల్మీకి ఓటమి తప్పలేదు. ఫలితంగా ముల్తాన్.. 19,.1 ఓవర్లలోనే 244 పరుగుల స్కోరు చేసి అద్భుత విజయాన్ని అందుకుంది. ఈ విజయంతో ముల్తాన్.. ప్లేఆఫ్స్ కు అర్హత సాధించింది. పెషావర్ జల్మీ తర్వాత ఆడే అన్ని మ్యాచ్ లను గెలిచినా ప్లేఆఫ్స్ చేరడం కష్టమే..
మూడు రోజుల క్రితం క్వెట్టా గ్లాడియేటర్స్ కూడా పెషావర్ ను చిత్తుగా ఓడించిన సంగతి తెలిసిందే. ఈ మ్యాచ్ లో పెషావర్ .. నిర్ణీత 20 ఓవర్లలో 2 వికెట్ల నష్టానికి 240 పరుగులు చేసింది. కానీ భారీ లక్ష్యాన్ని క్వెట్టా.. 18.2 ఓవర్లలోనే లక్ష్యాన్ని ఛేదించింది. జేసన్ రాయ్ (145) వీరబాదుడుకు తోడు మహ్మద్ హఫీజ్ (41) మెరుపులు తోడవడంతో క్వెట్టా.. పీఎస్ఎల్ లోనే భారీ టార్గెట్ ను విజయవంతంగా ఛేదించిన జట్టుగా నిలిచింది.
