Mahesh K

పంజాబ్ అసెంబ్లీ ఎన్నికలు సమీపిస్తుండటంతో రాజకీయ పార్టీలు వ్యూహ ప్రతివ్యూహాలు అమలు చేస్తున్నాయి. మిగతా రాష్ట్రాలకు భిన్నంగా ఈ రాష్ట్రంలో రాజకీయ పార్టీలు సింగర్‌లపై ఫోకస్ పెట్టాయి. వీరిని పార్టీలోకి చేర్చుకుని టికెట్లు ఇచ్చి బరిలోకి దింపనున్నారు. ఆప్ ఇప్పటికే పలువురు సింగర్లను అభ్యర్థులుగా ఖరారు చేసింది. స్థానికంగా ప్రజల్లో విశేష ఆదరణ ఉండటం, రైతు ఉద్యమంలోనూ కీలక పాత్ర పోషించి మన్ననలు పొందడంతో వీరికి డిమాండ్ పెరిగింది. ఈ సారి ఓటర్లూ ఎక్కువ మంది యువకులే ఉండటమూ మరో కారణంగా ఉన్నది.

జాతీయ గీతాన్ని అవమానించారని మమతా బెనర్జీపై మహారాష్ట్రలో 25వ మెట్రోపాలిటన్ మెజిస్ట్రేట్ కోర్టులో ఫిర్యాదు నమోదైంది. ముంబయి బీజేపీ సెక్రెటరీ దేవానంద్ గుప్తా ఫిర్యాదు చేశారు. ఈ నెలలో ఆమె మహారాష్ట్రలో రెండు రోజుల పర్యటన చేసిన సంగతి తెలిసిందే. అప్పుడే ఆమె జావేద్ అక్తర్ నిర్వహించిన ఓ కార్యక్రమంలో హాజరై చివరిలో జాతీయ గీతాన్ని అర్ధంతరంగా ఆపేశారని ఫిర్యాదు నమోదైంది. డిసెంబర్ 17న వాదనలు జరగనున్నాయి.
 

కేంద్ర మంత్రి అజయ్ మిశ్రా విలేకరులపై విరుచుకుపడ్డారు. జైలులో ఉన్న తన కొడుకు అశిష్ మిశ్రాపై ప్రశ్నలు వేయగానే ఆయన సహనం కోల్పోయి విలేకరులను దూషించారు. మైక్ లాక్కున్నారు. మీరంతా దొంగలు అంటు తిట్టారు. ఈ ఘటన లఖింపూర్ ఖేరి ఘటన జరిగిన రీజియన్‌లోనే చోటుచేసుకోవడం గమనార్హం. లఖింపూర్ ఖేరిలో ఆక్సిజన్ ప్లాంట్ ప్రారంభోత్సవానికి వెళ్లిన కేంద్ర మంత్రిని విలేకరులు ప్రశ్నించారు.

కరోనా మహమ్మారి రూపం మారుస్తూ ప్రజలను వణికిస్తుంటే ఇతర కొన్ని వ్యాధులు పంజా విసురుతున్నాయి. సూడాన్ దేశంలో ఓ అంతు చిక్కని వ్యాధి కోరలు చాస్తున్నది. ఆ వింత వ్యాధి కారణంగా ఇప్పటి వరకు సుమారు 100 మంది మరణించిచారు. దీంతో ప్రపంచ ఆరోగ్య సంస్థ కూడా వెంటనే రంగంలోకి దిగింది. ఓ టాస్క్ ఫోర్స్ బృందాన్ని సూడాన్‌కు పంపింది.

మన దేశంలో తొలి గ్రీన్ హైడ్రోజన్ మైక్రోగ్రిడ్ ప్రాజెక్టు తెలుగు రాష్ట్రం ఆంధ్రప్రదేశ్‌లో త్వరలో ఏర్పాటు కానుంది. ఎన్‌టీపీసీ రూపొందించిన ఈ ప్రాజెక్టును విశాఖపట్నం సమీపంలోని సింహాద్రిలో ఏర్పాటు చేయనున్నట్టు కేంద్రం ఓ ప్రకటనలో వెల్లడించింది. ఇది ప్రపంచంలోని అతిపెద్ద ప్రాజెక్టుల్లో ఒకటని పేర్కొంది. భారత్‌లో భారీ హైడ్రోజన్ ఎనర్జీ స్టోరేజీ ప్రాజెక్టులకు ఇది నాందీ పలకనుంది.

సుప్రీంకోర్టు సంచలన నిర్ణయం తీసుకుంది. బైపోలార్ డిజార్డర్‌తో బాధపడుతున్న ఓ వ్యక్తికి న్యాయమూర్తిగా ఎదిగేందుకు మార్గం సుగమం చేసింది. ఢిల్లీ హైకోర్టు నిర్ణయాన్ని సమర్థిస్తూ మెడికల్ బోర్డు సూచనల మేరకు సుప్రీంకోర్టు.. బైపోలార్ డిజార్డర్‌తో బాధపడుతున్న వ్యక్తిని డిజేబిలిటీ కోటాలో జ్యూడీషియల్ ఆఫీసర్‌గా ఎంపిక చేయడానికి గ్రీన్ సిగ్నల్ ఇచ్చింది.

కరీబియన్ దేశం హైతీలో ఘోర ప్రమాదం జరిగింది. ఓ గ్యాస్ ట్యాంకర్ బోల్తా పడటంతో చమురు భారీగా లీక్ అయింది. ఆ తర్వాత అక్కడ మంటలు వ్యాపించాయి. సమీపంలోని సుమారు 20 ఇళ్లు దగ్దమయ్యాయి. ఈ దుర్ఘటనలో 50 నుంచి 54 మంది సజీవ దహనం అయ్యారని ఓ అధికారి వెల్లడించారు. మృతుల సంఖ్య ఇంకా పెరిగే అవకాశం ఉన్నదని వైద్యులు చెబుతున్నారు. 

జమ్ము కశ్మీర్‌లోని పూంచ్‌లో ఈ రోజు ఉదయం ఎన్‌కౌంటర్ జరిగింది. ఈ ఎన్‌కౌంటర్‌లో కరడుగట్టిన లష్కరే తాయిబా టాప్ టెర్రరిస్టు హతమయ్యాడు. ఆ టెర్రరిస్టు ప్రధానంగా భారత భద్రతా బలగాలపై దాడులు, స్థానిక యువతను ఉగ్రవాదంలోకి ఆకర్షించే లక్ష్యంతో ఇక్కడకు వచ్చినట్టు ఓ సీనియర్ పోలీసు అధికారి వెల్లడించారు. టెర్రరిస్టు అబు జరారా హతమవ్వడం పాకిస్తాన్‌కు చెందిన లష్కరే ఉగ్ర సంస్థకు దెబ్బ అని పేర్కొన్నారు.

ముంబయి నుంచి అబుదాబికి బయల్దేరాల్సిన ఓ విమానంలోకి కార్గో లోడ్ ఎక్కించి ఓ వర్కర్ లోపలే అలసటతో నిద్రలోకి జారిపోయాడు. ఆయన అందులోనే నిద్రిస్తుండగా ఇండిగో విమానం ముంబయి నుంచి అబుదాబికి బయల్దేరింది. ఫ్లైట్ టేకాఫ్ అయిన తర్వాత ఆ వర్కర్‌కు తెలిసింది. గంటల వ్యవధిలోనే ఆయన అబుదాబి ఎయిర్‌పోర్టు చేరుకున్నారు. అక్కడ ఆయన ఆరోగ్యాన్ని పరీక్షించి తర్వాతి ఫ్లైట్‌లోనే ప్యాసింజర్‌గా వెనక్కి పంపించేశారు.

ఒమిక్రాన్ వేరియంట్ విజృంభిస్తున్న తరుణంలో బూస్టర్ డోసు చర్చ పెరుగుతున్నది. ఈ తరుణంలోనే కేంద్ర ప్రభుత్వం బూస్టర్ డోసు వేయాలని యోచిస్తున్నదా? లేదా? ఒక వేళ వేయాలని భావిస్తే దాని టైమ్ లైన్ ఏమిటీ? అని ఓ ఫిర్యాదు ఢిల్లీ హైకోర్టులో దాఖలైంది. దీనిపై స్పందించాల్సిందిగా కోర్టు కేంద్రప్రభుత్వాన్ని అడిగింది. బూస్టర్ డోసు అంశం పరిశీలనలో ఉన్నదని వివరించింది.