ఏదైనా పదవి ఇస్తే చేస్తా.. లేదంటే ఫారిన్ పోతా: టీఆర్ఎస్ ఎమ్మెల్యే జీవన్ రెడ్డి

తెలంగాణ మంత్రివర్గ విస్తరణ సందర్భంగా అసంతృప్త నేతలు బహిరంగంగానే తమ అక్కసు వెళ్లగక్కుతున్నారు. ఇప్పటికీ మాజీ మంత్రి నాయిని నర్సింహారెడ్డి కేసీఆర్‌ను టార్గెట్ చేస్తూ విమర్శలు చేశారు.

తాజాగా ఆర్మూర్ ఎమ్మెల్యే జీవన్ రెడ్డి సైతం ఇలాంటి వ్యాఖ్యలే చేశారు. అసెంబ్లీ బడ్జెట్ సమావేశాలకు హాజరైన ఆయన మీడియాతో మాట్లాడుతూ.. ప్రభుత్వంలో తనకు పని లేనందునే పరీక్షలు రాస్తున్నానని.. ఏదైనా పదవి ఇస్తే పని చేస్తానని వ్యాఖ్యానించారు.

రాష్ట్రంలో ఏ పని లేకపోతే విదేశాలకు వెళ్తానని స్పష్టం చేశారు. వినాయక మండపంలో జీవన్ రెడ్డి విగ్రహాన్ని ఏర్పాటు చేయడంపై మీడియా ప్రతినిధులు ప్రశ్నించగా.. ఆర్మూర్ ప్రజలు తనను దైవంలా ఆరాధిస్తారని.. అందులో తప్పేముందన్నారు.

ఏళ్ల తరబడి పని చేస్తున్నా.. మీ విగ్రహాలు ఎందుకు పెట్టడం లేదు.. తనను ఆరాధిస్తూ విగ్రహాలు పెట్టిన వాళ్లను ఎలా నియంత్రించగలను అని జీవన్ రెడ్డి స్పష్టం చేశారు.