బోటు ప్రమాదంపై హర్షకుమార్ వ్యాఖ్యలు: ఖండించిన అవంతి, తూగో.జిల్లా ఎస్పీ

దేవీపట్నం బోటు ప్రమాదంపై మాజీ ఎంపీ హర్షకుమార్ చేసిన వ్యాఖ్యలను ఖండించారు మంత్రి అవంతి శ్రీనివాస్. బోటుకు అనుమతి ఇవ్వాలని తాను ఎవరిపైనా ఒత్తిడి తీసుకురాలేదని అవంతి స్పష్టం చేశారు.

హర్షకుమార్ చేసిన వ్యాఖ్యలు అబద్ధమని ఆయనపై పరువునష్టం దావా వేస్తానని మంత్రి వెల్లడించారు. మరోవైపు తూర్పుగోదావరి జిల్లా ఎస్పీ సైతం హర్షకుమార్ వ్యాఖ్యలను ఖండించారు.

ఆయన వ్యాఖ్యలు నిరాధారమైనవని... మంత్రి అవంతి నుంచి తమకు ఎలాంటి కాల్ రాలేదని జిల్లా ఎస్పీ స్పష్టం చేశారు. అలాగే బోటును అనుమతించాలని తమపై ఎవరూ ఒత్తిడి తీసుకురాలేదన్నారు.

కాగా.. ఈ ప్రమాదం జరిగిన సమయంలో బోటులో 93 మంది ఉన్నారని ఆయన చెప్పారు. దేవీపట్నం ఎస్ఐ వద్దని వారించినా కూడ పర్యాటక శాఖ మంత్రి అవంతి శ్రీనివాస్ ఫోన్ చేయడం వల్లే బోటు ముందుకు కదిలిందని హర్షకుమార్ ఆరోపించారు. 

సోమవారం నాడే బోటు జాడ తెలిసిందన్నారు. కానీ, దాన్ని బయటకు తీస్తే అనేక వాస్తవాలు బయటకు వస్తాయని బయటకు తీయడం లేదని ఆయన ఆరోపించారు.

ఈ ప్రాంతంలో బోట్లలో అసాంఘిక కార్యక్రమాలు జరుగుతున్నాయని ఆయన చెప్పారు. ప్రమాదం జరిగిన బోటులో కూడ ఇలానే జరిగి ఉండొచ్చని ఆయన అభిప్రాయపడ్డారు. ఫ్లోటింగ్ జట్టీ ద్వారా మునిగిన బోటును వెలికి తీసే అవకాశం ఉందన్నారు. అధికారులు ఈ బోటును తీసేందుకు ప్రయత్నాలు చేయడం లేదన్నారు.

గోదావరిలో తిరిగే బోట్లలో నాయకులు, పర్యాటక శాఖ అధికారుల పెట్టుబడులు ఉన్నాయన్నారు. ఈ ప్రమాదం విషయంలో  అధికారులు సీఎం జగన్ కు తప్పుదోవ పట్టిస్తున్నారని చెప్పారు. 

మృతుల కుటుంబాలు మానసిక క్షోభను అనుభవిస్తున్నాయన్నారు. ఈ ప్రమాదంపై ప్రత్యేక  అధికారితో విచారణ జరిపించాలని ఆయన డిమాండ్ చేశారు.

సంబంధిత వార్తలు: