Relationship: సిట్యుయేషన్షిప్ అంటే ఏంటి.? Gen Z జమానాలో కొత్త ప్రేమ కథలు
Relationship: కాలంతోపాటు సంబంధాలు కూడా మారుతున్నాయి. ముందు ప్రేమ, పెళ్లి వంటి స్పష్టమైన సంబంధాలు ఎక్కువగా కనిపించేవి. కానీ ఇప్పుడు “సిట్యుయేషన్షిప్” (Situationship) అనే కొత్త రకమైన సంబంధం గురించి ఎక్కువగా వినిపిస్తోంది. ఇంతకీ ఇది ఏంటంటే?
సిట్యుయేషన్షిప్ అంటే ఏమిటి?
సిట్యుయేషన్షిప్ అనేది ఇద్దరి మనసుల మధ్య ఉండే సంబంధమే. కానీ అందులో స్పష్టమైన కమిట్మెంట్ ఉండదు. ఉదాహరణకు, ఇద్దరూ మాట్లాడుకుంటారు, కలుస్తారు, దగ్గరగా ఉంటారు. కానీ “మనం రిలేషన్లో ఉన్నాం” అని చెప్పే స్థాయి మాత్రం ఉండదు. ఈ కారణంగా ఆ సంబంధం ఏ దిశగా వెళ్తుందో అర్థం కాకపోవచ్చు. ఇది ప్రేమలాగా కనిపించినా, అసలు సంబంధానికి స్పష్టమైన నిర్వచనం ఉండదు.
కమిటెడ్ రిలేషన్షిప్తో తేడా ఏంటి.?
ఒక స్థిరమైన సంబంధంలో ఇద్దరికీ స్పష్టత, నమ్మకం, భవిష్యత్తు గురించి ఆలోచనలు ఉంటాయి. కానీ సిట్యుయేషన్షిప్లో పరిస్థితి వేరుగా ఉంటుంది. సంబంధానికి స్పష్టమైన పేరు ఉండదు. ఒక రోజు చాలా దగ్గరగా ఉంటారు, మరో రోజు దూరంగా ఉంటారు. ఈ విధంగా వచ్చే మిక్స్డ్ సిగ్నల్స్ వల్ల చాలా మందికి గందరగోళం ఏర్పడుతుంది.
మీ సంబంధం ఏంటో ఎలా తెలుసుకోవాలి.?
మీరు కూడా ఈ తరహా సంబంధంలో ఉన్నారా అనేది కొన్ని ప్రశ్నల ద్వారా తెలుసుకోవచ్చు. మీ ఇద్దరి మధ్య సంబంధం స్పష్టంగా ఉందా? కలుసుకునే ప్లాన్లు ఎప్పుడూ చివరి నిమిషంలోనే జరుగుతున్నాయా? చాలా కాలం అయినా మీ భాగస్వామి తన స్నేహితులకు పరిచయం చేయలేదా? ప్రేమగా మాట్లాడుతున్నా, “గర్ల్ఫ్రెండ్” లేదా “బాయ్ఫ్రెండ్” అని ఎప్పుడూ చెప్పలేదా? ఈ ప్రశ్నలకు ఎక్కువగా “అవును” అనే సమాధానం వస్తే, మీరు సిట్యుయేషన్షిప్లో ఉండే అవకాశముంది.
మానసిక ఆరోగ్యంపై ప్రభావం
ఇలాంటి సంబంధాలు మొదట్లో సరదాగా అనిపించినా, తరువాత మానసిక ఒత్తిడిని పెంచవచ్చు. ఇది జంక్ ఫుడ్లాంటిదని నిపుణులు చెబుతున్నారు. మొదట్లో ఆనందంగా అనిపించినా, చివరికి సంతృప్తి ఇవ్వదు. సంబంధంలో స్పష్టత లేకపోవడం వల్ల.. అసురక్షిత భావన, ఆత్మవిశ్వాసం తగ్గడం, భావోద్వేగ గందరగోళం లాంటి సమస్యలు వచ్చే అవకాశం ఉంది.
ఇలాంటి పరిస్థితుల్లో ఏం చేయాలి?
సిట్యుయేషన్షిప్లో ఎక్కువగా ఒకరు మాత్రమే ఎక్కువగా అనుబంధం పెంచుకుంటారు. మరో వ్యక్తి మాత్రం దూరంగా ఉంటూ తన అవసరాలకే ప్రాధాన్యం ఇస్తాడు. అందుకే ఇలాంటి పరిస్థితుల్లో కొన్ని విషయాలు గుర్తుంచుకోవాలి. మీ భావాలను స్పష్టంగా చెప్పాలి, సంబంధం గురించి క్లారిటీ అడగాలి, కమిట్మెంట్ లేకపోతే ముందుకు వెళ్లకుండా ఆలోచించాలి. ఎవరైనా వ్యక్తి సంబంధానికి స్పష్టత ఇవ్వకుండా ఉంటే, అది కూడా ఒక సమాధానమే అని గుర్తించాలి.
