Night time Thirst: అర్థరాత్రి తరచుగా దాహం వేస్తోందా ? నిర్లక్ష్యం చేయకండి..
Nighttime Thirst : అర్ధ రాత్రిళ్లు గొంతు ఎండిపోవడం, విపరీతంగా దాహం వేయడం వలన నిద్రభంగం వాటిల్లుతుంది. అయితే.. ఇది చిన్న సమస్యే అని భావిస్తే తప్పే. ఈ సమస్య కొన్ని వ్యాధులకు సంకేతం కావచ్చు. ఆ వ్యాధులేంటీ? సమస్య నివారణ మార్గాలేంటో తెలుసుకోండి.
రాత్రిళ్లు గొంతు ఎండుకపోతుందా?
చాలా మందికి రాత్రిళ్లు నిద్రలో దాహం వేస్తుంది. అయితే.. ఇదొక సాధారణ సమస్యలా అనిపించవచ్చు, కానీ, ఇది కొన్నిసార్లు ఆరోగ్య సమస్యల సంకేతం కావచ్చు. తరచుగా అర్థరాత్రి లేచి నీళ్లు తాగాలనిపిస్తే, అది డయాబెటిస్, డయాబెటిస్ ఇన్సిపిడస్, లేదా కిడ్నీ సంబంధిత సమస్యలకు సూచన కావచ్చు. ఈ అలవాటు నిరంతరంగా కొనసాగితే, దానిని నిర్లక్ష్యం చేయకూడదు. ఆరోగ్య పరీక్షలు చేయించుకోవాలి.
డయాబెటిస్ :
రాత్రిళ్లు దాహం వేయడం డయాబెటిస్‌కి సంకేతం కావచ్చు. టైప్ 2 డయాబెటిస్‌లో రక్తంలో చక్కెర స్థాయి పెరిగినప్పుడు శరీరం అదనపు గ్లూకోజ్‌ను మూత్రంతో బయటకు పంపుతుంది. దీని వల్ల తరచూ మూత్రవిసర్జన, డీహైడ్రేషన్, దాహం వంటి సమస్యలు వస్తాయి. ఇది డయాబెటిస్ ఇన్సిపిడస్ అనే వ్యాధికీ సంకేతం కావచ్చు. ఈ వ్యాధి యాంటీడియురెటిక్ హార్మోన్ లోపం వల్ల కలుగుతుంది. దీనివల్ల ఎక్కువ దాహం, అధిక మూత్రవిసర్జన జరుగుతుంది.
కిడ్నీ సమస్య :
దీర్ఘకాలిక కిడ్నీ సమస్య వల్ల శరీరంలోని నీరు, ఎలక్ట్రోలైట్స్ సమతుల్యత దెబ్బతింటుంది. ఫలితంగా రాత్రిళ్లు తరచుగా దాహం వేయడం, మూత్రవిసర్జన చేస్తారు. ఈ లక్షణాలు నిర్లక్ష్యం చేయకుండా వెంటనే కిడ్నీ పరీక్ష చేయించుకోవడం మంచిది. త్వరితంగా కారణం గుర్తించి, సరైన చికిత్స తీసుకోవచ్చు.
శ్వాసకోశ సమస్యలు
రాత్రిళ్ళు నోరు ఎండిపోవడం లేదా తరచుగా దాహం వేయడం శ్వాసకోశ సమస్యకు సంకేతం కావచ్చు. ఈ సమస్య గురక, రాత్రిళ్ళు తరచుగా మేల్కొనడానికి దారితీస్తుంది.
మెనోపాజ్ : మెనోపాజ్ సమయంలో శరీరంలో వచ్చే హార్మోన్ల మార్పుల వల్ల రాత్రిళ్ళు ఎక్కువగా చెమటలు పట్టడం, దాహం వేస్తుంది.
ఇతర కారణాలు :
- మందుల దుష్ప్రభావం: మందుల వాడకంతో డీహైడ్రేషన్ కలిగి, రాత్రి దాహం వేయవచ్చు.
- ఉప్పు, కారం ఎక్కువగా తీసుకోవడం: రాత్రి వేళ భోజనంలో ఉప్పు, కారం అధికంగా ఉంటే శరీరంలో నీరు తగ్గి దాహం కలుగుతుంది.
- నోటి ద్వారా శ్వాస: నిద్రలో నోటి ద్వారా శ్వాస తీసుకుంటే నోరు ఎండిపోతుంది, దాంతో దాహం ఎక్కువగా వేస్తుంది.
- ఆల్కహాల్ లేదా కాఫీ తీసుకోవడం: ఇవి డీహైడ్రేషన్‌కి కారణమవుతాయి, దీని ప్రభావంగా అర్ధరాత్రి దాహం వేయవచ్చు.
