రాత్రిపూట ఈ లక్షణాలు కనిపిస్తున్నాయా? వెంటనే వైద్యులను సంప్రదించాల్సిందే
రాత్రిపూట కనిపించే కొన్ని లక్షణాలతో మన గుండె, కిడ్నీ, లివర్ సంబంధిత సమస్యలను ముందుగానే గుర్తించొచ్చు.
ఈ లక్షణాలు కనపడుతున్నాయా?
చాలా మందికి రాత్రి నిద్ర మధ్యలో మూత్రం వస్తూ ఉంటుంది. ఇది చాలా కామన్. కానీ, పదే పదే మూత్ర విసర్జన కోసం లేవడం మాత్రం నార్మల్ కాదు. అంతేకాదు, పడుకున్నప్పుడు ఊపిరి తీసుకోవడంలో ఇబ్బంది పడటం, నిద్ర లేచిన వెంటనే ఎక్కువగా చెమటలు పట్టడం, రాత్రిపూట సరిగా నిద్రపట్టకపోవడం ఇవన్నీ జరుగుతున్నాయి అంటే.. ఏదో ఆరోగ్య సమస్య రాబోతుందని అర్థం. ముఖ్యంగా మీ గుండె, లివర్, కిడ్నీ ల్లో ఏదైనా సమస్య ఉందని సంకేతం కావచ్చు.
రాత్రి పూట కనిపించే లక్షణాలు..
రాత్రిపూట మాత్రమే కనిపించే ఈ సంకేతాలను ప్రజలు చాలా వరకు నిర్లక్ష్యం చేస్తారని వైద్యులు చెబుతున్నారు. కానీ ఇవి గుండె వైఫల్యం ప్రారంభ సంకేతాలు కావచ్చు. నిజానికి, ఈ సమస్యలు రక్త నాళాల అడ్డంకి, దీర్ఘకాలిక మూత్రపిండ వ్యాధి (CKD) , లివర్ దెబ్బతినడం వల్ల కూడా సంభవించవచ్చు.
మూత్ర విసర్జన..
అంతేకాదు, రాత్రిపూట మూత్ర విసర్జన కోసం పదే పదే లేస్తూ ఉంటే దానిని నోక్టురియా అంటారు. ఇది సాధారణ సమస్య కాదు, కానీ గుండె వైఫల్యం లేదా మూత్రపిండ వ్యాధి ప్రారంభ సంకేతం కావచ్చు.
వైద్యులు ఏమన్నారంటే..
అపోలో హాస్పిటల్ సీనియర్ కార్డియాలజిస్ట్ డాక్టర్ విక్రమ్ బి. కోల్హరి చెప్పినట్లుగా, రాత్రి పడుకున్నప్పుడు ద్రవం రక్తంలో కలిసి మూత్రపిండాల ద్వారా ఫిల్టర్ అవుతుంది. తరచుగా మూత్ర విసర్జన చేయాల్సి ఉంటుంది. రోగికి మూత్రపిండ సంబంధిత సమస్యలు ఉంటే మూత్రపిండాలు వాటి ఫిల్టరింగ్ సామర్థ్యాన్ని కోల్పోతాయి. దీనివల్ల పగలు , రాత్రి తేడా లేకుండా మూత్ర విసర్జన చేయాల్సి వస్తుంది. ముఖ్యంగా రాత్రి పూట ఈ సమస్య మరింత ఎక్కువగా ఉంటుంది.
వైద్యుడిని ఎప్పుడు సంప్రదించాలి?
రాత్రి ఎక్కువగా మూత్ర విసర్జన చేస్తుంటే, మీ కాళ్ళు వాచి ఉంటే, అలసట , ఊపిరి ఆడకపోతే, మీరు వెంటనే వైద్యుడిని సంప్రదించాలి.
ఊపిరితిత్తుల్లో సమస్య
రాత్రి ఊపిరి ఆడకపోవడం అంటే ఊపిరితిత్తులలో ద్రవం చేరడం వల్ల మీ గుండె రక్తాన్ని సరిగ్గా పంప్ చేయలేకపోవచ్చు. కాబట్టి, ఆలస్యం చేయకుండా వైద్యులను సంప్రదించాలి.
ఎక్కువగా చెమటలు పడితే..
రాత్రిపూట మీకు ఎక్కువగా చెమట పడుతుంటే కూడా వైద్యులను సంప్రదించడం ఉత్తమం. ఇది రక్త నాళాలలో అడ్డంకి లక్షణం. ఈ సమయంలో మీకు ఛాతి నొప్పి, అధిక ఒత్తిడి అనిపిస్తే, గుండె సమస్య లేదా అధిక రక్తపోటు ఉండవచ్చు. ఇలాంటి లక్షణాలు కనిపించినప్పుడు అశ్రద్ధ చేయకూడదు.