సెట్లో అందరి ముందు అవమానించిన దర్శకుడు.. ఆ చేదు జ్ఞాపకాన్ని గుర్తు చేసుకున్న నేచురల్ స్టార్ నాని..
హీరో నాని `దసరా` చిత్రంతో పాన్ ఇండియా లెవల్లో సత్తా చాటేందుకు రెడీ అవుతున్నారు. ఈ క్రమంలో చిత్ర ప్రమోషన్లో భాగంగా తనకెదురైన అవమానం గురించి వెల్లడించారు.
నేచురల్ స్టార్ నాని తన రూట్ మార్చి ఇప్పుడు `దసరా` చిత్రంలో నటించారు. దీన్ని పాన్ ఇండియా మూవీగా రిలీజ్ చేస్తున్నారు. తనకు బలమైన ఫ్యామిలీ ఇమేజ్ని పక్కన పెట్టి ఓ రా, రస్టిక్ కథతో మాస్ మూవీ చేశాడు నాని. ఊరమాస్ పాత్రలో నటించారు. ఈ చిత్రం ఈ నెల 30న విడుదల కాబోతుంది. సినిమా ప్రమోషన్స్ లో భాగంగా ఇండియా వైడ్గా తిరుగుతున్నారు నాని. అందులో భాగంగా ఇప్పుడు ఆయన ముంబయిలో ప్రమోషన్స్ చేస్తున్నారు.
తన సినిమా ప్రమోషన్స్ లో భాగంగా అనేక విషయాలను పంచుకుంటున్నారు. ఈ క్రమంలో తన స్ట్రగుల్స్ గురించి ఓపెన్ అయ్యారు నాని. తనకు ఎదురైన అవమానాలను వెల్లడించారు. అసిస్టెంట్ డైరెక్టర్గా ఉన్నప్పుడు అనేక అవమానాలు ఎదుర్కొన్నట్టు చెప్పారు. అందులో ఓ దర్శకుడు తనని సెట్లోనే అందరి ముందు అవమానించాడని, అది మాత్రం ఎప్పటికీ మర్చిపోలేనని తెలిపారు.
నాని మాట్లాడుతూ, తాను బ్యాక్ గ్రౌండ్ లేకుండా వచ్చానని, ఇక్కడ ఏం జరుగుతుందో అర్థం కాదు, సాయం చేయడానికి ఎవరూ ఉండరు, మనం నేర్చుకుంటున్న సమయంలోనే కాస్త ఇబ్బందిగా ఉంటుంది. కానీ దాని తర్వాత వచ్చే సక్సెస్ చాలా స్పెషల్గా ఉంటుంది. ఆ ఫీలింగ్ వేరే అని వెల్లడించారు. అయితే ప్రారంభంలో తాను అనేక సవాళ్లు, తిరస్కరణలు ఎదుర్కొన్నారట. `ఆ విషయాలు ఇప్పుడు చెప్పను, సినీ పరిశ్రమలో ఉన్న ఎంతో మందితో పోలిస్తే నేను పెద్దగా ఇబ్బందులు పడలేదని భావిస్తున్నా. నాకంటే ఇంకా ఎక్కువ కష్టాలు పడ్డవాళ్లు నాకు తెలుసు` అని చెప్పాడు నాని.
ఈ క్రమంలో ఆయన తనకు జరిగిన అవమానాన్ని వెల్లడించారు. అసిస్టెంట్ డైరెక్టర్గా ఉన్నప్పుడు తాను క్లాప్ బాయ్ గా ఉండేవాడట. ఆ సమయంలో ఓ దర్శకుడు తనని చాలా అవమానించాడని చెప్పారు. క్లాప్ బాయ్ తాను ఎన్నో ఇబ్బందులు ఎదుర్కొన్నట్టు చెప్పాడు. క్లాప్ బోర్డ్ ఆలస్యమైనా ఏదో ఒకటి అనేవారు, నీకు ఎవరు పడితే వాళ్లు పనులు చెబుతుంటారు. ఇష్టం వచ్చిన మాటలు అనేవారని, వారందరికి గట్టిగా సమాధానం చెప్పాలని ఉన్నా చెప్పలేని స్థితి, అన్నింటిని దిగమింగక తప్పదని తెలిపారు నాని. ఇలాంటి ఎన్నో ఇబ్బందులు తాను ఫేస్ చేసినట్టు చెప్పారు.
అయితే తనని మాటలు అన్నందుకు ఎప్పుడూ బాధపడలేదట, కానీ ఓ దర్శకుడు మాత్రం సెట్ అందరి ముందు తనని అవమానించాడట. తాను ఎప్పటికీ దర్శకుడిని కాలేనని అన్నాడు. ఆ మాట తనని తీవ్రంగా మనో వేదనకు గురి చేసిందని, ఇలాంటి ఎన్నో విమర్శలు ఎదుర్కొని ఈ స్థాయికి వచ్చానని చెప్పాడు నాని. స్టార్ అయ్యాక ఆ దర్శకుడిని కలిశా, అప్పుడు కూడా మా చుట్టూ ఉన్న వాతావరణం చెప్పుకోదగిన విధంగా లేదని వెల్లడించారు నేచురల్ స్టార్.
రేడియో జాకీ నుంచి అసిస్టెంట్ డైరెక్టర్గా, అట్నుంచి హీరోగా ఇప్పుడు స్టార్ హీరోగా ఎదిగారు నాని. ఎలాంటి బ్యాక్ గ్రౌండ్ లేకుండా వచ్చి స్టార్గా ఎదగడం మామూలు విషయం కాదు. ఒక్కో మెట్టు ఎక్కుతూ తనని తాను బిల్డ్ చేసుకుంటూ వస్తున్నారు. ఇప్పుడు `దసరా` తో పాన్ ఇండియా మూవీ చేస్తున్నారు. శ్రీకాంత్ ఓదెల దర్శకత్వం వహిస్తున్న ఈ చిత్రంలో కీర్తిసురేష్ హీరోయిన్గా నటించింది. ఈ చిత్రం మార్చి 30న విడుదల కాబోతుంది.