17 ఏళ్ళ యువతిపై రేప్, రెండో అంతస్తు నుండి తోసివేత
ముంబైలో దారుణం యువతిపై అత్యాచారం
ముంబై: 17 ఏళ్ళ యువతిపై లైంగిక దాడికి పాల్పడిన ఓ యువకుడు ఆమెను రెండో అంతస్తు పై నుండి కిందకు తోసేశాడు. ఈ ఘటన ముంబైలో చోటు చేసుకొంది. తీవ్రంగా గాయపడిన బాధితురాలు ఆసుపత్రిలో చికిత్స పొందుతుంది.
ముంబైలోని ఎంఐడీసీ ఏరియాలోని 17 ఏళ్ళ యువతి అత్త, మామలతో కలిసి ఓ అపార్ట్మెంట్లో నివాసం ఉంటుంది. గురువారం నాడు సాయంత్రం పూట పని మీద బయటకు వెళ్ళిన యువతిని అదే అపార్ట్మెంట్లో నివాసం ఉంటున్న 21 ఏళ్ళ యువకుడు ఆ యువతిని తమ ఇంట్లోకి లాక్కెళ్ళి అత్యాచారానికి పాల్పడ్డాడు. చాలా సేపటి వరకు యువతి ఆచూకీ దొరకకపోవడంతో కుటుంబసభ్యులు ఆమె కోసం వెతికారు.
అయితే యువతిపై అత్యాచారానికి పాల్పడిన ఆ నిందితుడు ఆమెను రెండో అంతస్తులోని తమ ఇంటి కిటికీ నుండి కిందకు తోసేశాడు. అంతేకాదు అక్కడి నుండి అతను పారిపోయాడు. రెండో అంతస్తు మీద నుండి కింద పడి ఆ యువతి తీవ్రంగా గాయపడింది.
యువతిని యువకుడు తమ ఇంట్లోకి లాక్కెళ్ళిన విషయాన్ని చూసిన కొందరు అపార్ట్మెంట్ వాసులు ఆ ఇంట్లోకి వెళ్ళి చూసే సరికి రెండో అంతస్థు నుండి కిందపడి తీవ్ర గాయాలతో గాయపడిన యువతిని ఆసుపత్రిలో చేర్చారు. ఆసుపత్రిలో ఆమె చికిత్స పొందుతోంది. బాధితురాలి ఫిర్యాదు మేరకు పోలీసులు కేసు నమోదు చేసుకొని దర్యాప్తు చేస్తున్నారు.